Makapasubo, niadtong Marso 29, 2022, pito pa sa atong mga igsoon sa siyudad sa Mariupol ang namatay. Tanantanan, 17 na ka igsoon ang namatay sa Ukraine.

Ang mga Disaster Relief Committee (DRC) sa Ukraine naghago pag-ayo sa pagtaganag hinabang, nga nagpameligro sa ilang kinabuhi aron pangitaon ang ilang isigkamagtutuo diha sa mga lugar nga grabeng naapektohan sa giyera.

Pananglitan, ang mga igsoon nga mitabang sa DRC nakahatod ug pagkaon, tambal, ug uban pang panginahanglan ngadto sa mga siyudad nga grabeng naapektohan, sama sa Kharkiv, Kramatorsk, ug Mariupol. Usa ka membro sa DRC ang mobiyahe kada adlaw ug kapig 500 kilometros, nga moagi sa daghang military checkpoint, aron hatdan ug pagkaon ug tambal ang mga 2,700 ka publisher.

Ang mga DRC nag-andam sab ug kasakyan aron ma-rescue ang mga igsoon. Usa ka brader sa Chernihiv DRC ang miingon: “Dihang gisugdag bomba sa mga sundalo ang kabalayan, klaro nga delikado na gyong magpabilin sa siyudad. Kay walay koryente ug Internet panahon sa pagpamomba, giadto dayon sa mga ansiyano ang mga igsoon nga nanago sa mga basement ug giingnan sila nga naay giandam nga mga sakyanan aron makaikyas sila sa siyudad.”

Dihay tag-iya sa usa ka transportation business nga misugot nga gamiton ang iyang mga van ug bus, ug siyam ka beses siyang mibiyahe aron i-rescue ang 254 ka igsoon sa Chernihiv. Gani, dihay higayon nga iyang giayo ang dalan pinaagig heavy equipment aron makaagi ang iyang bus. Mapasalamaton kaayo ang atong mga igsoon sa maong tabang.

Naguol gyod ta para niadtong nawad-ag mga minahal sa kinabuhi tungod niining nagpadayon nga giyera. Kitang tanan naghinamhinam nga matuman ang saad sa Pulong sa Diyos, ang Bibliya, nga wala na unyay kamatayon ug pagbangotan.—Pinadayag 21:3, 4.

Niadtong Marso 29, 2022, ang mosunod mao na ang total nga report gikan sa Ukraine. Kini gibase sa kompirmadong mga report gikan sa lokal nga mga igsoon. Pero lagmit mas taas pa ang aktuwal nga gidaghanon, kay lisod ang komunikasyon sa tanang rehiyon sa nasod.

• 17 ka publisher ang namatay

• 35 ka publisher ang na-injured

• 36,313 ka publisher ang mibiya sa ilang balay aron moadto sa mas luwas nga dapit

• 114 ka balay ang di na kapuy-an

• 144 ka balay ang dunay major damage

• 612 ka balay ang dunay minor damage

• 1 ka Kingdom Hall ang di na magamit

• 7 ka Kingdom Hall ang dunay major damage

• 23 ka Kingdom Hall ang dunay minor damage

• 27 ka DRC ang naglihok karon sa Ukraine

• 34,739 ka publisher ang gitabangan sa DRC nga makakitag mas luwas nga kapuy-an

• 16,175 ka publisher ang mibakwet ngadto sa laing nasod ug gitabangan sa mga igsoon sa pagtuo