Malipay mi sa pagreport nga gipanalanginan ni Jehova ang iyang katawhan sa Ukraine mao nga ang atong mga igsoon sa tibuok nasod nakasaulog sa Memoryal sa kamatayon sa Kristo. Sa kasadpang Ukraine, ang Memoryal gihimo diha sa ubay-ubayng Kingdom Hall diin mibakwet ang mga igsoon. Ang kadaghanang Memoryal gihimo sa ginagmayng grupo, ug kadtong dili makabiya sa ilang balay mitambong pinaagig videoconference.

Sa kadaghanang lugar sa nasod, ang sirina gipatingog sa tibuok adlaw sa Memoryal. Dihang migabii na, ang sirina mihunong. “Nagsige mig ampo nga ang Memoryal dili unta mabalda sa binombahay,” miingon si Sherhiy sa Druzhkivka, Donetsk Region. “Sa hapit nang magsugod ang Memoryal, ang binombahay ug ang sirina mihunong.”

Dihay grupo sa mga tigulang ug infirm nga mga publisher sa Nemishaeve, nga duol sa Kyiv, nga kapin nag usa ka bulan nga wala makatambong ug tigom. Nagsige silag ampo nga makatambong unta sila sa Memoryal. Ang grupo gitabangan sa ansiyano nga si Vitaliy nga makasaulog sa Memoryal. “Walay koryente,” siya miingon, “busa migamit mig flashlight sa pagsaulog sa Memoryal. Wala mi heater. Wala pod mi musika, maong ang akong anak nga babaye mitugtog ug violin aron duyogan mi sa pagkanta.”

Si Oleksandr, ansiyano nga nagpuyo sa war zone, miingon: “Panahon sa pagpanagtag sa imbitasyon sa Memoryal, dili mi makapadalag mga sulat sa mga tawo sa among teritoryo kay ang mga balay naigo sa mga bomba ug wala nay nagpuyo. Busa giimbitar namo ang among mga kaila, ang mga tawo nga nailaila namo sa mga basement, ug ang mga tawo nga kauban namong mibakwet. Daghan sa among nailaila ang dili maminaw sa mga Saksi sa una. Ug daghan kanila ang mitambong sa Memoryal.”

Bisag wala pa makuha ang kompletong report sa tanang kongregasyon sa Ukraine, nahibaloan nga kapig 210,000 ang mitambong sa Memoryal.

Usa ka brader sa Ukraine nga misulti sa iyang pagbati bahin sa Memoryal ang miingon: “Sama nga ang lighthouse magpasalig sa mga marinero nga duol na sila sa baybay, ang pagsaulog sa Memoryal nagpasalig nako nga hapit na gyod ang adlaw ni Jehova. Ang Memoryal niining tuiga mas nagpalig-on sa akong pagtuo.”

Niadtong Abril 21, 2022, ang mosunod mao na ang total nga report gikan sa Ukraine. Kini gibase sa kompirmadong mga report gikan sa lokal nga mga igsoon. Pero lagmit mas taas pa ang aktuwal nga gidaghanon, kay lisod ang komunikasyon sa tanang rehiyon sa nasod.

• 35 ka publisher ang namatay

• 60 ka publisher ang na-injured

• 43,792 ka publisher ang mibiya sa ilang balay aron moadto sa mas luwas nga dapit

• 374 ka balay ang di na kapuy-an

• 347 ka balay ang dunay major damage

• 874 ka balay ang dunay minor damage

• 1 ka Kingdom Hall ang di na magamit

• 10 ka Kingdom Hall ang dunay major damage

• 27 ka Kingdom Hall ang dunay minor damage

• 27 ka Disaster Relief Committee (DRC) ang naglihok karon sa Ukraine

• 44,971 ka indibiduwal ang gitabangan sa DRC nga makakitag mas luwas nga kapuy-an

• 19,961 ka publisher ang mibakwet ngadto sa laing nasod ug gitabangan sa mga igsoon sa pagtuo