Ang nagpadayong kagubot sa pipila ka bahin sa Luhansk ug Donetsk nga mga rehiyon sa sidlakang Ukraine, nga upat na karon ka tuig, nakahatag ug grabeng kalisdanan sa kadaghanang residente. Sa mga Saksi ni Jehova nianang mga dapita, ang kalisdanan nadugangan sa nagkagrabeng diskriminasyon sa relihiyon. Dayag nga ang mga awtoridad naimpluwensiyahan sa bag-o pang mga desisyon sa korte sa Russia nga nagdili sa pagsimba sa mga Saksi ni Jehova didto. Kay gustong sundogon sa pipila ka awtoridad ang Russia, sila naggamit ug ilegal nga mga paagi aron akusahan ang mga Saksi nga nagpuyo sa mga lugar nga kontrolado nila ug naghulga sa ilang kagawasan sa relihiyon.

Ingong pagsundog sa mga taktika sa mga prosecutor sa Russia, ang mga awtoridad niini nga mga rehiyon naghimohimog ebidensiya aron akusahan ang mga Saksi ni Jehova.

• Niadtong Hulyo 2017, gibutang sa Korte Suprema sa Donetsk People’s Republic diha sa Republican Extremist Material List ang duha ka artikulo nga gikan sa miaging mga isyu sa mga magasin sa mga Saksi ni Jehova. Ang mga Saksi wala pahibaloa sa mga husay sa korte. Wala usab sila makadawat ug kopya sa desisyong ipatuman dayon aron makaapelar unta sila niini.

• Niadtong Agosto 2017, ang mga opisina sa prosekusyon sa Novoazovsk ug Debaltsevo nagpadalag mga sulat sa pagpasidaan sa mga Saksi didto, nga kinahanglan una silang mokuhag permit aron makaapod-apod sa ilang magasing Ang Bantayanang Torre ug Pagmata! Pinaagi niini ang mga awtoridad nagbabag sa pag-apod-apod bisan sa relihiyosong mga publikasyon nga wala ideklarar nga extremist ug naghulga sa mga ansiyano sa kongregasyon nga manubag sila kon dunay iapod-apod nga bisan unsang publikasyon sa mga Saksi. Sa ulahi ang mga Saksi sa siyudad sa Makeyevka gihatagan ug samang pasidaan.

• Niadtong Agosto 4, 2017, ang mga special antiterror unit, uban ang mga sundalo ug polis, nagbalda sa mga tigom sa mga Saksi ni Jehova sa Alchevsk ug Luhansk, kay diha kunoy bomba. Dihang napagawas na nila sa bilding ang mga magsisimba, gisusi sa mga opisyal ang mga dokumento sa tanang nanambong. *

Sa Alchevsk, gi-video sa mga opisyal ang ilang inspeksiyon sa bilding sa pagpangita kunog bomba. Sa ilang inspeksiyon, sila nakakitag pipila ka publikasyon sa mga Saksi ug unya “nakakitag” mga pamplet nga kontra-LPR * nga gidala ug gibutang mismo didto sa maong mga opisyal.

Pipila ka semana human gi-raid ang mga Kingdom Hall, gipagawas sa mga awtoridad sa Luhansk nga ang mga Saksi ni Jehova kaaway sa Estado bisag walay basehanan. Niadtong Agosto 28, 2017, ang Deputy Minister of State Security sa teritoryo sa Luhansk, si Oleksandr Basov, mihimog opisyal nga pahayag nga nagdaot sa mga Saksi ni Jehova. Sumala pa niya, ang mga basahon nga naundag propaganda nga gibutang ug “nakit-an” sa Kingdom Hall sa Alchevsk maoy pamatuod sa iyang alegasyon nga ang mga Saksi nagsuportar sa mga grupo nga giisip nga terorista sa teritoryo sa Luhansk.

Ang tigpamaba sa mga Saksi ni Jehova sa Ukraine, si Ivan Riher, miingon: “Bisan unsang basahon nga susama nianang giingon ni Deputy Minister Basov nga ‘nakit-an’ sa Kingdom Hall seguradong gibutang didto sa mao ra pong grupo nga nakakita niini. Lagmit, sama sa alegasyon, ang ingon niini nga literatura giapod-apod sa Alchevsk—pero seguradong wala mag-apod-apod niini ang mga Saksi ni Jehova. Sila neyutral, sama sa napamatud-an sa ginatos ka Saksi sa tibuok kalibotan nga napriso karon kay dili magsundalo tungod sa ilang konsensiya. Walay Saksi ni Jehova nga dunay gidapigan sa kagubot nga nahitabo sa Ukraine.” *

Daghang Saksi ni Jehova sa rehiyon ang mireport nga gipahunong sila sa mga awtoridad sa pagpaambit sa ilang tinuohan ngadto sa uban ug gipasidan-an sila nga dili na magpadayon, hinuon wala pa may gikasohan ang mga polis. Daghang Saksi ang mireport usab nga gitawagan sila sa Security Service aron magkaatubang sila sa mga opisyal. Sa maong pakigkita, ang mga Saksi gisukitsukit, gihadlok, ug gipit-os aron ilang ibutyag ang mga ngalan sa nag-organisar sa ilang relihiyosong kalihokan. Gi-raid ug gibalda usab sa mga awtoridad ang ilang mga tigom.

Ang nagkagrabeng diskriminasyon ug pagpit-os sa relihiyon diha sa mga Saksi ni Jehova sa pipila ka teritoryo sa Luhansk ug Donetsk labaw pa sa pagpangharas—paglutos kini sa relihiyon ug hulga sa kagawasan sa relihiyon. Ang mga Saksi ni Jehova mas nagmabinantayon ug nangitag legal nga mga paagi aron makapadayon sila sa ilang malinawong relihiyosong kalihokan.