Ang bagyong Dorian, usa sa kinakusgang mga bagyo diha sa Atlantic Ocean, mi-landfall ingong Category 5 nga bagyo diha sa Great Abaco Island sa amihanang Bahamas sa buntag sa Dominggo, Septiyembre 1, 2019. Nakapahinabo kinig dakong kadaot kay hinay ang gikusgon sa dagan niini ug nagdala kinig kusog kaayong hangin ug ulan. Miigo kini sa Leeward Islands, Puerto Rico, ug sa Virgin Islands, pero diyutay o walay gireport nga danyos niini.

Ang sangang buhatan sa United States padayong nanguhag impormasyon samtang nagmonitor sa epekto sa bagyo ngadto sa atong mga igsoon ug sa mga propidad nga gipanag-iya sa sangang buhatan. Sa pagkakaron, walay report nga dihay naangol sa 46 ka magmamantala sa duha ka kongregasyon sa Great Abaco Island. Pero ang nag-inusarang Kingdom Hall sa isla grabeng naguba.

Sa Grand Bahama Island, dunay upat ka kongregasyon ug 364 ka magmamantala. Sumala sa inisyal nga report, dihay 196 sa atong mga igsoon ang namakwet ug 22 ka balay ang naguba. Tulo ka balay ang napayhag.

Ang sangang buhatan abante nang naghatag ug instruksiyon sa mga tigdumala sa sirkito ug sa mga ansiyano sa apektadong mga lugar. Misugyot kini nga ang tanang igsoon pabakweton sa kaulohang siyudad sa Nassau o uban pang luwas nga dapit.

Ginaampo nato ang atong mga igsoon nga naapektohan niini nga bagyo. Kita nahibalo nga nakita ni Jehova ang ilang lisod nga kahimtang ug padayon siyang maghatag ug kusog aron sila makalahutay.—Salmo 46:1, 2.