Niadtong Oktubre 9, 2024, ang Category 3 nga Bagyong Milton mi-landfall sa Gulf Coast sa Florida, U.S.A., ug naguba pag-ayo ang tanang giagian niini. Kining kusog kaayo nga bagyo mihapak wala ray duha ka semana human maagii sa Bagyong Helene ang mao ra nga lugar, nga miresultag dugang pagbaha ug kadaot. Ang gikusgon sa hangin sa Bagyong Milton maoy hangtod 289 kilometros kada oras. Daghang lugar duol sa baybayon ang giulan ug hangtod 45 sentimetros (18 pulgadas) ug ang gitas-on sa balod miabot ug hangtod 3 metros (10 ka piye), nga miresultag grabeng pagbaha.

Dugang pa, ang Bagyong Milton mipahinabog mas grabeng kadaot human kini makapormag dili moubos sa 38 ka buhawi sa tibuok southern ug central Florida. Halos 80,000 ka tawo ang wala gihapoy koryente, ug dili moubos sa 24 ang namatay.

• Walay igsoon nga namatay

• 2 ka magmamantala ang grabeng na-injury

• 4 ka magmamantala ang naay minor injury

• 9,949 ka magmamantala ang gipabakwet o kinahanglang mobiya sa ilang balay

• 16 ka balay ang naguba

• 235 ka balay ang naay major damage

• 1,398 ka balay ang naay minor damage

• 1 ka Kingdom Hall ang naay minor damage

• 30 ka Kingdom Hall ang wala pa gihapoy koryente ug dili pa magamit

• Duha ka adlaw una mi-landfall ang Bagyong Milton, ang sangang buhatan sa United States mipadalag sulat ngadto sa kapig 800 ka kongregasyon nga maagian sa bagyo. Kini nga sulat naay impormasyon nga makatabang niadtong gustong mobakwet

• Ang mga tigdumala sa sirkito ug lokal nga mga ansiyano naghatag ug espirituwal ug praktikal nga tabang sa mga igsoon nga naapektohan sa Bagyong Helene ug Milton

• 3 ka Disaster Relief Committee ang gitudlo aron magdumala sa pagtaganag tabang para sa mga naapektohan sa duha ka bagyo

• Gatosan ka Saksi sa Georgia ug South Carolina, U.S.A., ang mahigugmaong nagpapuyo sa mga igsoon nga kinahanglang mobiya sa ilang balay

Ingong bahin sa tibuok kalibotang panag-igsoonay, atong giampo nga padayong tagan-an ni Jehova ug “dangpanan ug panalipod” ang tanang naapektohan niining di pa dugayng kusog nga mga bagyo.—Isaias 4:6.