Nadunggan ni Mike Iwuchukwu ang iyang anak nga si Melody nga nagdalidalig naog sa hagdanan kay lunch break na niya sa iyang online nga klase. Iyang giadto ang iyang sayis anyos nga anak ug nagdahom siya nga nagkaon na kini sa iyang sandwich o nagdula sa iyang mga dulaan. Pero nasorpresa siya sa iyang nakita.

“Nag-atubang siya sa iyang laptop ug naggunit siyag libro nga Mga Leksiyon Gikan sa Bibliya, ug tulo sa iyang mga klasmet ang naminaw niya,” miingon si Mike. “Giingnan ko ni Melody: ‘Pa, nag-Bible study ko sa akong mga klasmet!’”

Gusto gyod ni Melody nga makasugod ug Bible study sukad pa niadtong Septiyembre 2020, dihang ang iyang eskuwelahan sa Houston, Texas, nagsugod ug online nga mga klase tungod sa coronavirus nga pandemic. Maong nag-ampo siya kang Jehova ug nangitag mga kahigayonan nga makasugod ug Bible study.

Proud kaayo si Mike ug Octavia sa ilang anak. Si Mike midugang: “Pirmeng estoryahan ni Melody ang iyang mga klasmet bahin kang Jehova. Pero dihang nakita namo siya nga nagdumalag Bible study, natandog kaayo mi sa akong asawa.”

Padayon gihapong nag-Bible study si Melody sa iyang mga klasmet. Si Melody miingon: “Natudloan na nako sila bahin sa Paraiso ug kang Jesus. Gusto nako nga mahimo silang Saksi ni Jehova!”

Ang nuybe anyos nga si Samuel Molnar sa Ingleside, Illinois, nagasangyaw sab sa uban.

Nadasig siya sa eksperyensiya sa usa ka brader nga nagsangyaw sa iyang silingan diha sa koral sa ilang balay, maong gisulayan sab na ni Samuel. Dihang nakita niya ang apo nga lalaki sa iyang silingan nga nagduladula duol sa koral, iyang gipangutana ang bata kon gusto ba siyang mahibalo bahin sa Paraiso. Misugot ang bata, ug si Samuel midagan aron kuhaon ang iyang libro nga Akong Basahon sa mga Estorya sa Bibliya.

Si Samuel miingon: “Ako siyang giingnan nga sa umaabot puwede na siyang makigdula sa mga hayop nga dili ra siya maunsa. Dayon ako siyang gibasahan sa estorya bahin kang Daniel diha sa langob sa mga leyon.”

Dili lang kana ang gihimo ni Samuel. Gipadad-an niyag sulat ang bata bahin sa mga kalingawan ug mga video diha sa jw.org. Nagsabot silang duha nga magbasag laing estorya sa Bibliya sa sunod nilang kita.

Nalipay kaayo si Samuel sa iyang eksperyensiya ug naningkamot siya karon sa pagkab-ot sa iyang sunod nga tumong. “Gusto nakong tun-an ang tanang tracts sa Teaching Toolbox para magamit nako ni sa pagsangyaw sa uban,” siya miingon.

Tulo ka batan-ong sister sa Houston ang bag-o lang nakakab-ot sa ilang espirituwal nga tumong: mag-oksilyare payunir panahon sa bakasyon sa eskuwela.

Niadtong Agosto, si Joselyn Horta, 13 anyos; Melanie Alvarez, 12 anyos; ug Chloe Rodriguez, 10 anyos, nag-videoconference aron maghimog mga sulat. Naay mga panahon nga kalima nila ni himoon kada semana, ug magsugod silag alas 7:00 sa buntag.

“Magdungan mig kaon ug mag-estoryahanay, ug inigka-alas 7:30 sa buntag, maghimo na mig mga sulat,” miingon si Joselyn. Usahay, naay usa namo nga dugay makamata, ug ang duha mag-text ug “Good morning! Bangon na! Manangyaw na ta!”

Dili lang sila ang nadasig sa ilang mga paningkamot, nadasig sab ang ilang mga higala ug membro sa pamilya. “Naay mga panahon nga morag wala koy ganang mosangyaw,” miingon si Alicia, nga mama ni Joselyn. “Pero dihang makita nako si Joselyn nga naglingkod na para mosangyaw, moingon ko sa akong kaugalingon, ‘Mosangyaw pod ko!’”

Si Jehova nalipay nga makita ang tanang matinumanong kabataan nga naningkamot gyod sa pagsangyaw bisan sa pandemic.—Proverbio 27:11.