Dihang nag-lockdown ang mga prisohan sa United States tungod sa COVID-19 nga pandemic, gatosan ka Saksi ni Jehova ang wala na mobisita sa mga prisohan sa pagtanyag ug literatura sa Bibliya ug sa pagdumalag mga Bible study. Busa wala na makadawat ang linibo ka piniriso ug paghupay sa Bibliya. Pero ang atong mga igsoon migamit ug bag-ong mga pamaagi aron masangyawan gihapon ang mga prisohan samtang nagsunod sa mga safety protocol sa COVID-19.

“Nabalaka mi para sa tanan nga nag-agad sa among mga pagduaw aron makabaton ug espirituwal nga pagkaon,” miingon si Brader Dan Houghton, nga mitabang sa pag-organisar sa pagsangyaw sa mga prisohan sa teritoryo sa sangang buhatan sa United States. “Mas gikinahanglan ta nila karon.”

Pananglitan, gikontak ni Brader Micah Seierstad ang mga opisyales sa prisohan sa Vacaville, California, aron mangayog permiso sa pagpadalag mga video sa mga programa sa JW Broadcasting sa ilang pasilidad. Nakurat siya kay gihangyo siya sa mga opisyales nga magpadalag mga video aron ilang i-broadcast sa mga TV sa tanang 33 ka prisohan sa California. Tungod niini, ang 2020 “Paglipay Kanunay”! nga Kombensiyon gipasalidag tulo ka beses kada adlaw sa tag-28 minutos nga segment ug posibleng natan-aw ni sa 130,000 ka piniriso.

Si Brader Seierstad miingon: “Makapahinganghang makita kon unsay mahimo ni Jehova. Dihang duna siyay gustong himoon, walay makababag niya!”

Nahibaloan sa atong mga igsoon nga gusto sa mga opisyales sa prisohan sa Sarasota County Jail sa Florida nga makabaton ang mga piniriso ug makapadasig nga mga libro aron mahupayan sila gikan sa stress tungod sa lockdown. Busa ang atong mga igsoon mitanyag ug mga Bibliya ug lainlaing publikasyon nga gibase sa Bibliya sa Iningles ug Spanish nga pinulongan. Gidawat kini sa mga opisyales. Gihikay sab sa mga igsoon ang pagdumalag mga Bible study pinaagig videoconference. Usa ka piniriso nga nag-Bible study online ang misulat sa nag-Bible study niya: “Eksayted ko sa atong mga pagtuon. Nagdasig ni nako nga basahon ang Bibliya. Nabag-o ang akong panglantaw sa umaabot.”

Makapalipay nga walay pandemic o prisohan ang makababag sa atong mahigugmaong Amahan, si Jehova, sa pagtagana sa espirituwal nga panginahanglan sa interesadong mga tawo.—Salmo 139:7-10.