Gihapak sa bagyong Dorian ang Bahamas sa Septiyembre 1 hangtod Septiyembre 3, 2019. Sa wala pa moabot ang bagyo, gisugdan na sa sangang buhatan sa United States ang pag-organisar sa pagpadalag hinabang gikan sa Florida, U.S.A. Dihang dili na delikadong mobiyahe, ang mga igsoon nga dunay kaugalingong mga lansa o eroplano mitabang dayon sa pagpadalag hinabang. Apil sila sa mga unang miboluntaryo nga nangabot sa mga isla.

Dihay 13 ka mga brader ug sister nga mipalupad ug eroplano sa kapig 300 ka mugbong flight para magdalag 15 ka toneladang hinabang ug mahatod ang kapig 700 ka boluntaryo ngadto sa apektadong mga lugar. Gawas pa, 13 ka lansa sa mga igsoon ang gigamit aron magpadala ug duolan sa 90 ka toneladang mga suplay. Sagad moabot ug 12 ka oras ang biyahe sa lansa paingon sa Bahamas ug pabalik sa Florida.

“Pagkahuman sa bagyo, mibiyahe dayon ang mga eroplano [sa mga Saksi], nga nagdalag mga hinabang aron motabang,” miingon si Jose Cabrera, station manager sa Palm Beach International Airport sa Florida. “Maayo kaayo sila nga ehemplo sa paghimog labaw pa kay sa gidahom aron motabang.”

“Mao ni ang unang higayon para sa kadaghanan namo nga magamit ang among skill sa pagtabang sa mga igsoon,” matod ni Brader Glenn Sanders, usa sa mga piloto nga miboluntaryo. “Makapalipay hunahunaon nga kami nga gamayng parte sa lawas nagdalag hinabang sa laing parte sa lawas nga nag-antos.”​—1 Corinto 12:26.

Sumala sa sangang buhatan sa United States, gibanabana nga mokantidad ug mga $1,750,000 (U.S.) ang magasto para niini nga relief work ug mahuman ni sa Mayo 1, 2020.