Ang kagubot ug krisis sa Venezuela nagpadayon. Ang mga tawo nalisdan pag-ayo sa pagpangitag pagkaon, tubig, gasolina, ug tambal tungod sa kanihit ug kamahal niini. Sagad walay koryente, mao nga mas lisod makakuhag pagkaon kay dili ma-refrigerate ang pagkaon. Ug problema gihapon ang krimen.

Bisan pa niining lisod nga mga kahimtang, kapig 136,500 ka magmamantala sa Venezuela ang padayong nakigbahin sa pagsangyaw. Pananglitan, niadtong Enero 2019, bisag mius-os ug 7,000 ang mga magmamantala sa nasod kon itandi sa miaging tuig, mas taas ug 90,000 ang oras nga ilang gigahin sa pagsangyaw. Niadtong Abril 2019, kapig 195,600 ka Bible study ang ilang gidumala. Ang gidaghanon sa regular pioneer misakag kapin sa 30,000. Panahon sa espesyal nga kampanya sa tibuok kalibotan sa pagpangimbitar para sa Memoryal sa kamatayon sa Kristo, ang gidaghanon sa mga auxiliary pioneer misakag 20,400. Tungod sa madasigong pagsangyaw, halos 471,000 ang mitambong sa Memoryal—kapig tulo ka pilo sa gidaghanon sa mga magmamantala. Dugang pa, daghan ang tigtambongan sa mga tigom sa kongregasyon kay ang mga igsoon padayong nagpaambit sa mensahe sa Bibliya ngadto sa mga tawo nga nangitag kasaligang solusyon sa ilang mga problema.

Ang sangang buhatan sa Venezuela padayong nag-organisar ug pagpanghatag ug hinabang aron tabangan ang atong mga igsoon nga makabaton ug pagkaon nga ilang gikinahanglan. Kada bulan, uban sa tabang sa duol nga mga sangang buhatan ug sa donasyon para sa tibuok kalibotang buluhaton, ang sangang buhatan sa Venezuela nag-apod-apod ug gatosan ka toneladang pagkaon ngadto sa 75,000 ka magmamantala diha sa 1,595 ka kongregasyon.

Ang atong mga igsoon sa Venezuela nakaatubang ug daghang kalisdanan, pero nadasig ta nga sila padayong ‘nagsadya kang Jehova ug naglipay sa Diyos sa ilang kaluwasan.’—Habacuc 3:17, 18.