Niining artikuloha

•  Unsa ang pagpakigdeyt?

•  Andam na ba kang makigdeyt?

  Para sa uban, ang pagpakigdeyt lingawlingaw ra. Pero niining artikuloha, ang “pagpakigdeyt” nagtumong sa panahon nga igahin sa managtrato sa usag usa aron mahibaloan kon bagay ba sila nga mahimong magtiayon. Busa ang pagpakigdeyt naay katuyoan. Di lang ni basta pag-enjoy sa atensiyon sa usag usa.

 Ang pagpakigdeyt angayng makatabang sa usa sa paghimog desisyon—magpakasal o makigbulag. Maong kon makigdeyt ka, kinahanglang andam ka kon unsay mahitabo.

 Ang punto: Kon naghunahuna ka nga andam na kang makigdeyt, angayng andam na pod ka nga magminyo.

  Kon makigdeyt ka, posibleng maminyo ka. Busa angay nimong hunahunaon kon unsang mga hiyas nimo ang makaapektar sa inyong relasyon. Pananglitan, konsideraha ang mosunod:

•   Relasyon sa pamilya. Ang imong pagtratar sa imong ginikanan ug mga igsoon—ilabina dihang stress ka—magpakita kon unsaon nimo pagtratar ang imong kapikas.

   Prinsipyo sa Bibliya: “Wad-a ang tanang klase sa pagdumot, kasuko, kapungot, siningkahay, ug sakit nga sinultihan, apil na ang bisan unsa nga makapahinabog kadaot.”—Efeso 4:31.

   Pangutan-a ang kaugalingon: ‘Makaingon ba ang akong ginikanan ug mga igsoon nga naa koy respeto nila? Dihang naa mi dili pagsinabtanay, makapabilin ba kong kalmado, o masuko ko ug makiglalis?’

•   Pagsakripisyo sa kaugalingon. Kon minyo na ka, kinahanglan nimong konsiderahon—ug sagad unahon—ang gusto sa imong kapikas.

   Prinsipyo sa Bibliya: “Ang matag usa padayong magtinguha, dili sa iyang kaugalingong kaayohan, kondili nianang sa laing tawo.”—1 Corinto 10:24.

   Pangutan-a ang kaugalingon: ‘Kanunay ba nakong ipamugos ang akong gusto? Para sa uban, rasonable ba ko? Sa unsang mga paagi gipakita nako nga ginauna nako ang panginahanglan sa uban?’

•   Pagkamapainubsanon. Ang maayong kapikas moangkon sa iyang mga sayop ug sinserong mangayog pasaylo.

   Prinsipyo sa Bibliya: “Kitang tanan masayop sa makadaghan.”—Santiago 3:2, footnote.

   Pangutan-a ang kaugalingon: ‘Angkonon ba dayon nako ang akong sayop, o mangatarongan pa ko? Malain ba ko dihang tambagan ko?’

•   Kuwarta. Kon ang usa maayong mogunit ug kuwarta, malikayan niya ang usa sa komon nga mga rason nga mag-away ang magtiayon.

   Prinsipyo sa Bibliya: “Kinsa kaninyo nga buot magtukod ug torre ang dili una molingkod ug kuwentahon ang gasto aron matino kon duna ba siyay igong kuwarta nga ikahuman niini?”—Lucas 14:28.

   Pangutan-a ang kaugalingon: ‘Makontrol ba nako ang akong paggasto, o pirme kong naay utang? Sa unsang paagi nako gipakita nga maayo ko mogunit ug kuwarta?’

•   Espirituwal nga rutina. Kon Saksi ni Jehova ka, angay nga naa kay regular nga rutina sa pagtuon sa Bibliya ug pagtambong sa Kristohanong mga tigom.

   Prinsipyo sa Bibliya: “Malipayon kadtong mahunahunaon sa ilang espirituwal nga panginahanglan.”—Mateo 5:3.

   Pangutan-a ang kaugalingon: ‘Naningkamot ba ko nga magpabiling lig-on ang akong pagtuo? Prayoridad ba nako ang akong espirituwal nga rutina, o ginatugotan nako nga mabalda ni sa ubang butang?’

 Ang punto: Ang imong minyoan takos makabaton ug maayo nga kapikas. Kon naningkamot ka nga mahimong maayong kapikas, lagmit maayong tawo pod ang makagusto nimo.