Seguradong nahibalo ka nga makadaot sa imong panglawas ang dili balanseng pagkaon. Kon ang usa dili mokaon ug sustansiyadong pagkaon sa batan-on pa, posibleng iya ning madala inigkahamtong niya. Maong mas maayo nga karon pa lang, maanad na ka sa pagkaon ug balanseng pagkaon.

•  Unsa ang balanseng pagkaon?

•  Unsay akong himoon aron masunod ang balanseng pagkaon?

•  Ang giingon sa ubang batan-on

 Ang Bibliya nagtambag nga angay tang ‘magpugong sa kaugalingon,’ ug apil niana ang atong batasan sa pagkaon. (1 Timoteo 3:11) Base niini nga prinsipyo, maayong mahibaloan nimo nga . . .

•   Ang balanseng pagkaon naglakip sa tanang grupo sa pagkaon. Ang lima ka grupo sa pagkaon naglakip sa prutas, gulay, mga lugas, pagkaon nga may protina, ug mga produkto gikan sa gatas. Gilikayan sa uban ang usa o pipila ka grupo sa pagkaon kay nagtuo sila nga makatabang ni nga mamenosan ang ilang timbang. Pero kon imo ning buhaton, ang imong lawas makulangan sa igong sustansiya nga gikinahanglan niini.

   Sulayi kini: Pag-research o konsultaha ang imong doktor aron mahibalo ka sa mga benepisyo nga makuha gikan sa klaseklaseng pagkaon. Pananglitan:

   Ang carbohydrates makahatag nimog kusog. Ang protina makatabang sa imong lawas sa pagsukol sa impeksiyon ug sa paghimo ug pag-repair sa mga tissue sa lawas. Ang ubang fats​—kon sakto ang gidaghanon—​makatabang sa paglikay sa sakit sa kasingkasing ug makahatag nimog igong kusog.

   “Naningkamot ko nga makakaon gikan sa tanang grupo sa pagkaon aron balanse ang akong pagkaon. Para nako, dili ra sayop kon mokaon panagsa ug chocolate o fast food. Pero dili pod maayo nga kana na lay pirmeng kaonon. Mas maayo gyod kon kanunay tang balanse.”​—Brenda.

•   Ang balanseng pagkaon wala magpasabot nga magpasobra. Apil niini ang pagkaog ginagmay, pagpagutom unya sa ulahi mokaog daghan kaayo, o dili na gyod pagkaon sa imong paboritong pagkaon.

   Sulayi kini: Sulod sa usa ka bulan, i-monitor ang imong ginakaon. Pila ka beses nimong gihimo ang dili maayong batasan sa pagkaon nga gihisgotan sa ibabaw? Unsay kinahanglan nimong himoon aron mabalanse ang imong pagkaon?

   “Naay mga adlaw nga magpatuyang kog kaon sa mga pagkaon nga daghag calorie ug naa poy mga adlaw nga mokaon kog pagkaon nga gamay ra kaayog calorie. Pero kadugayan, nakadesisyon ko nga dili na mag-ihap ug calories, dili magpalabig kaon, ug moundang kon busog na. Taudtaod pod ayha nako nabalanse ang akong pagkaon.”​—Hailey.

•   Pagplano. Ang Bibliya nag-ingon: “Ang mga plano sa kugihan moresulta gyod ug kalamposan.” (Proverbio 21:5) Busa angay kang magplano aron mamentinar nimo ang balanseng pagkaon.

   “Makatabang ang pagplano aron makakaon ug sustansiyadong pagkaon, ug sagad sa balay kini andamon o lutoon. Bisag medyo lisod, nindot ang resulta ug makadaginot pa kag kuwarta.”​—Thomas.

•   Pulihi ang dili sustansiyadong pagkaon. Ang Bibliya nag-ingon: “Ampingi ang praktikal nga kaalam.” (Proverbio 3:21) Makatabang nimo ang praktikal nga kaalam sa paghunahunag mga paagi sa pagkaog sustansiyadong pagkaon.

   “Kada adlaw, pulihan nakog sustansiyadong pagkaon ang usa ka dili sustansiyadong pagkaon. Pananglitan, imbes mokaog chocolate, mokaon kog apple. Sa ngadtongadto, mas daghan na kog makaon nga sustansiyadong pagkaon kay sa dili sustansiyado!”​—Kia.

•   Pagbatog rasonableng pagdahom. Ang Bibliya nag-ingon: “Kan-a ang imong pagkaon uban ang kasadya.” (Ecclesiastes 9:7) Ang pagkahimong balanse sa pagkaon wala magpasabot nga dili na nimo i-enjoy ang imong pagkaon o angay kang mabalaka sa matag pagkaon nga imong kaonon. Bisag kinahanglan nimong menosan ang imong timbang, hinumdomi nga mas importante ang pagkahimong himsog. Busa pagbaton ug rasonableng pagdahom sa kaugalingon.

   “Ning bag-o lang, nakuhaan kog mga 13 kilos, pero wala gyod ko magpagutom o mihunong sa pagkaog sustansiyadong pagkaon o nahasol kay mikaon kog dessert. Nakita nako nga dili gyod daling magpamenos ug timbang ug nga kinahanglan nakong usbon ang akong batasan sa pagkaon.”​—Melanie.