•  Ang angay nimong mahibaloan

•  Ang imong mahimo

•  Ang giingon sa ubang batan-on

 Ang gidak-on sa pagsalig nga ihatag nimo nagdepende sa imong pagkakasaligan. Ang pagsunod sa mga balaod sa imong ginikanan pareho sa pagbayad ug utang. Kon kasaligan kang ‘mobayad,’ mas dako ang ipautang sa imoha. Ingon ana sab ang pagsalig sa imong ginikanan. Kon masinundanon ka nila, hatagan kag dakodakong kagawasan. Pero kon di ka kasaligan, ayawg katingala kon limitahan nila ang imong kagawasan.

 Dili dihadiha mosalig ang imong ginikanan. Kinahanglang pirme nilang makita nga kasaligan ka aron tagaan ka nilag dugang kagawasan.

 TINUOD NGA EKSPERYENSIYA: “Isip batan-on, kabalo ko sa gustong ipahimo sa akong ginikanan, maong ipakita kunohay nako nga gisunod nako sila pero sekreto nakong buhaton ang akong gusto. Maong dili kaayo sila mosalig nako. Pero sa ulahi, nakita nako nga usa ray paagi nga mosalig sila nako​—kinahanglang dili nako sila ilaron. Ipakita gyod nako nga kasaligan ko.”​—Craig.

 Ayaw pamakak​—bisan pag masilotan ka. Kitang tanan masayop, pero kon molimod ka sa imong sayop (o dili nimo itug-an tanan aron di mahibal-an ang tinuod) mawala ang pagsalig sa imong ginikanan. Sa laing bahin, kon pirme kang matinud-anon, makita nila nga hamtong ka kay modawat ka sa imong sayop. Ingon ana ang tawong kasaligan.

 “Wa magpasabot nga di na ka kasaligan kon masayop ka. Pero kon mamakak ka, mawad-an silag pagsalig nimo.”​—Anna.

 Ang Bibliya nag-ingon: “Buot namong magmaminatud-on sa tanang butang.”​—Hebreohanon 13:18.

•   Hunahunaa: Kon mangutana ang imong ginikanan kon asa ka moadto ug unsay imong himoon, tug-anan ba nimo sila sa tinuod? O kaha mangutana sila kon diin ka gikan ug unsay imong gihimo, isulti lang ba nimo ang gustong madungog sa imong ginikanan?

 Ipakita nga responsable ka. Sunda ang tanang balaod sa balay. Himoa dayon ang gisugo sa imoha. Ayawg ka ulahi sa imong mga appointment. Himoa ang imong mga homework. Pauli sa hustong oras.

 “Kon tugtan ka sa imong ginikanan nga mosuroy uban sa imong mga amigo pero giingnan ka nga mouli sa alas 9 sa gabii, ayaw pagdahom nga tugtan pa ka sa sunod kon mouli kag alas 10:30!”​—Ryan.

 Ang Bibliya nag-ingon: “Ang matag usa magpas-an sa iyang kaugalingong luwan [o palas-anon].”​—Galacia 6:5.

•   Hunahunaa: Kanunay ba kang moabot sa hustong oras, mohimo sa mga buluhaton sa balay, ug mosunod sa mga balaod​—bisan sa mga balaod nga wala nimo maangayi?

 Magpailob. Kon mawala ang pagsalig sa imong ginikanan, dili dayon na mabalik. Paghulat lang.

 “Dihang dakodako na ko, naglagot ko kay wa kaayo mosalig nako ang akong ginikanan. Abi nakog mahimo na dayon kong responsable inigdako nako. Akong giingnan ang akong ginikanan nga tagaan kog tsansa nga ipakita nga kasaligan ko. Taudtaod gyod to, pero misalig ra sila sa ulahi. Nasabtan nako nga dili edad ang basehan nga kasaligan ka; makita na sa buhat.”​—Rachel.

 Ang Bibliya nag-ingon: “Padayong pamatud-i kon unsa kamo sa inyong kaugalingon.”​—2 Corinto 13:5.

•   Hunahunaa: Aron ang imong ginikanan mosalig (o mobalik ang ilang pagsalig) nimo, unsay puwede nimong himoon aron mapamatud-an kon unsa ka nga klase sa pagkatawo?

 SUGYOT: Paghimog tumong, bahin man sa pag-abot sa hustong oras, paghuman sa mga trabaho, pagsunod sa imong curfew, o uban pa. Isulti ni sa imong ginikanan, ug pangutan-a sila kon unsay imong himoon aron mosalig sila nimo. Dayon paningkamot nga masunod ang tambag sa Bibliya: ‘Hukasa ang daan nga pagkatawo nga nahiuyon sa kanhi ninyong paagi sa panggawi.’ (Efeso 4:22) Sa ngadtongadto, makita sa imong ginikanan ang imong pag-uswag!