MGA BATAN-ON NANGUTANA

Nganong Magsamad Ko sa Akong Lawas?

I-PLAY

Unsa ang pagsamad sa lawas?

Ang pagsamad sa lawas maoy nabatasan, lisod pugngan nga pagpasakit sa lawas pinaagig hait nga mga gamit. Duna pay laing matang sa pagpasakit sa lawas, sama sa pagpaso, pagbun-og, o pagbunal. Kini nga artikulo naghisgot bahin lang sa pagsamad, apan ang mga prinsipyo nga gihisgotan niini aplikado sa tanang matang sa pagpasakit sa lawas.

Tan-awa kon nahibalo ka ba: Tinuod o Dili Tinuod.

Mga babaye lang ang magsamad sa lawas.
Ang pagsamad sa lawas supak sa sugo sa Bibliya nga mabasa diha sa Levitico 19:28, nga nag-ingon: “Dili ninyo samadsamaran ang inyong unod.”

Hustong tubag:

Dili Tinuod. Bisag mga babaye ang kadaghanang naghimo niini, may mga lalaki nga magsamad pod o magpasakit sa ilang lawas sa ubang paagi.
Dili Tinuod. Ang Levitico 19:28 nagtumong sa karaang paganong rituwal, dili sa lisod pugngan nga pagsamad sa lawas nga gihisgotan niining artikuloha. Bisan pa niana, dayag nga ang atong mahigugmaong Maglalalang dili gusto nga pasakitan nato ang atong lawas.—1 Corinto 6:12; 2 Corinto 7:1; 1 Juan 4:8.

Nganong dunay magsamad ug lawas?

Tan-awa kon nahibalo ka ba: Pilia ang hustong tubag.

Ang uban magsamad sa lawas . . .

kay gusto silang mahuwasan sa grabeng kaguol.
kay gusto silang maghikog.

Hustong tubag: A. Ang kadaghanan sa tigsamad sa lawas dili gustong mamatay. Gusto lang nilang matapos ang ilang kaguol.

Aniay giingon sa ubang batan-on bahin sa pagsamad nila sa ilang lawas.

Celia: “Mahupayan ko niini.”

Tamara: “Kini daw makapalimot sa akong kaguol. Ang kasakit sa samad mas maayo na lang kay sa sakit sa dughan.”

Carrie: “Dili ko gustong maguol. Dihang magsamad ko, ang akong hunahuna tua na sa kasakit sa samad, dili na sa kaguol.”

Jerrine: “Dihang magsamad ko sa akong lawas, daw dili na ko makamatikod sa akong palibot ug dili na makahunahuna sa akong problema. Kanay akong gusto.”

Kon tigsamad ka sa imong lawas, unsay imong himoon aron makahunong ka?

Ang pag-ampo kang Jehova nga Diyos dakog tabang. Ang Bibliya nag-ingon: “Itugyan kaniya ang tanan ninyong mga kabalaka, kay siya may kahingawa kaninyo.”—1 Pedro 5:7.

Sugyot: Pagsugod pinaagi sa mubong pag-ampo, tingali pinaagi sa pagsulti kang Jehova, “Tabangi intawon ko.” Sa kadugayan, makabubo ka na sa imong pagbati kang Jehova, “ang Diyos sa tanang paghupay.”—2 Corinto 1:3, 4.

Ang pag-ampo dili lang pangpalinaw sa hunahuna. Ikaw nakig-estorya mismo sa imong langitnong Amahan, kinsa nagsaad: “Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.”—Isaias 41:10.

Daghan niadtong nagsamad sa lawas nahupayan usab pinaagi sa pagpakigsulti sa ilang ginikanan o sa laing kasaligang hamtong. Aniay giingon sa tulo ka batan-on nga naghimo niana.

Interbiyo

Diana, 21
Kathy, 15
Lorena, 17

Pilay imong edad sa nagsugod ka pagsamad sa imong lawas?

Lorena: Sa nag-14 ko.

Diana: Sa nag-18 ko. Ug dili parehas ang kasagunson. Usahay magsamad ko kada adlaw sulod sa usa o duha ka semana ug dayon moundang kog usa ka bulan.

Kathy: Sa nag-14 ko. May mga panahon nga magsamad gihapon ko.

Nganong gipasakitan man nimo ang imong kaugalingon?

Kathy: Naglagot ko sa akong kaugalingon. Nagtuo man god ko nga walay ganahang makig-amiga nako.

Diana: Usahay maguol ko ug kini mograbe nga dili na nako maantos. Mora kinig mangtas diha sa sulod nako, ug kinahanglang magsamad ko sa akong lawas aron makagawas kini.

Lorena: Ako maguol kaayo o masuko o maluya. Mobati ko nga morag basura, ug gusto ko nga mawala kining ngil-ad nga pagbati. Usahay makaingon ko nga angay lang nga pasakitan nako ang akong kaugalingon.

Mahupayan ka ba dihang pasakitan nimo ang imong kaugalingon?

Diana: Oo. Mogaan ang akong pagbati, ug daw nahaw-as ang bug-at kong gipas-an.

Kathy: Sama kinig epekto sa paghilak. Mahuwasan ko human ko magsamad sa akong lawas, parehas nianang bation sa uban human sila makahilak.

Lorena: Ang pagpasakit sa lawas samag pagtusok sa balloon nga punog kaguol. Kini dili mobuto kondili mohiyos lang nga hinay-hinayng magpahuwas sa akong mga kaguol.

Nahadlok ka ba sa pagtug-an sa imong ginahimo?

Lorena: Oo. Nahadlok ko kay basig maghunahuna ang mga tawo nga weird ko. Ug dili pod ko gusto nga ang uban mahibalo bahin sa akong kinabuhi.

Diana: Ang uban mosulti pirme nako nga lig-on ko, ug gusto ko nga magpadayon sila sa pagtuo niana. Kon mangayo kog tabang, basig maghunahuna sila nga dili diay ko lig-on.

Kathy: Dili ko gusto nga ang mga tawo magtuo nga may diperensiya ko, ug makapasamot lang kana sa akong kaguol. Gawas pa, nagtuo ko nga angay lang nga pasakitan nako ang akong kaugalingon.

Unsay nakatabang nimo sa paghunong?

Lorena: Gisulti nako kang Mama ang akong ginahimo. Nagpakonsulta usab kog doktor, kinsa mitabang nako kon unsaon pagkontrolar sa akong gibati. Usahay makabalik ko sa akong batasan, apan natabangan ko sa dihang akong gihimong regular ang akong pagtuon sa Bibliya. Nagpabilin pod kong aktibo sa pag-alagad sa Diyos. Tingali, dili gyod bug-os mawala kining akong pagbati, apan maningkamot ko nga dili magpadaog niini.

Kathy: Usa ka babaye, nga igsoon sa pagtuo ug magulang nakog napulo ka tuig, nakamatikod nga may problema ko, ug sa ulahi misulti ko kaniya. Nakurat ko kay siya pod diay tigsamad sa una. Wala ko maulaw pagpakigsulti kaniya kay nakaagi siya niini. Nagpakonsulta usab kog doktor kinsa mitabang nako ug sa akong ginikanan sa pagsabot sa akong kahimtang.

Diana: Usa ka gabii, didto ko sa balay sa magtiayon nga suod nako ug ang bana may namatikdan diha kanako. Maluloton niya akong gidasig sa pagsulti kanila kon unsay akong problema. Gihalog ko sa iyang asawa ug gipapauraray sa iyang dughan sama sa ginahimo ni Mama sa bata pa ko. Mihilak ko, ug mihilak pod siya. Naglisod ko pagsulti kanila sa akong ginahimo, apan maayo na lang nga ako kadtong gisulti.

Sa unsang paagi natabangan ka sa Bibliya?

Diana: Sa tabang sa Bibliya nakaamgo ko nga dili nako kini mabuntog nga ako-ako ra. Gikinahanglan ko ang tabang ni Jehova nga Diyos.—Proverbio 3:5, 6.

Kathy: Ang pagbasag Bibliya—ug pagkahibalo nga ang mensahe niini gikan sa Diyos—nakapahupay kaayo nako!—2 Timoteo 3:16.

Lorena: Dihang makabasa kog teksto nga aplikado nako, isulat nako kana aron akong mapamalandong.—1 Timoteo 4:15.

Duna bay partikular nga teksto nga nakatabang nimo?

Diana: Ang Proverbio 18:1 nag-ingon: “Ang nagalain sa iyang kaugalingon mangita sa iyang hakog nga tinguha; siya mobatok sa tanang praktikal nga kaalam.” Usahay dili ko gustong dunay daghang tawo sa duol, apan kini nga teksto nagpaamgo nako nga dili maayong ipalain nako ang akong kaugalingon.

Kathy: Ang paborito nakong teksto mao ang Mateo 10:29 ug 31, diin miingon si Jesus nga walay goryon nga mamatay nga dili mamatikdan ni Jehova. Ug siya midugang: “Ayaw kamo kahadlok: kamo labaw pag bili kay sa daghang goryon.” Bisan karon, ang pagbasa niini magpahinumdom nako nga bililhon ako kang Jehova.

Lorena: Natandog ko sa gipamulong sa Isaias 41:9, 10, diin si Jehova miingon sa iyang katawhan: “Ako wala magsalikway kanimo. Ayaw kahadlok, kay ako uban kanimo. . . . Ako magapalig-on kanimo.” Kon maghunahuna kog butang nga gipalig-on, maghunahuna kog butang nga dili maatraka, usa ka tinukod nga pinarilag bato. Kining tekstoha nakapalig-on nako sa pagkasayod nga si Jehova nahigugma nako ug anaa siya kanunay sa akong tapad.

Mga pangutana nga pamalandongon

Kon gusto kang mangayog tabang, kinsay imong duolon?
Unsay imong iampo kang Jehova bahin sa imong problema?
May mahunahunaan ka bang duha ka paagi (nga dili kinahanglang pasakitan ang kaugalingon) sa pagpahuwas sa imong tensiyon ug kabalaka?

Akong notbok sa mga teksto

Sugyot: Dihang makabasa kag teksto sa Bibliya nga nagpasalig kanimo sa gugma ni Jehova o makatabang nimo sa pagbaton ug timbang nga panglantaw sa imong kaugalingon ug sa imong mga kapakyasan, isulat kana sa notbok. Dayon pagsulat ug mubong komento kon nganong nakapadasig kanimo kanang tekstoha. Aron may ideya ka, aniay mga teksto nga nakatabang kang Diana, Kathy, ug Lorena.

Roma 8:38, 39

“Kining tekstoha nagpakita nga gihigugma ko ni Jehova, bisan sa panahong guol kaayo ko.”—Diana.
Salmo 73:23

“Ang mga teksto nga sama niini nagpasalig nako nga wala ko mag-inusara. Si Jehova daw anaa sa akong tapad.”—Kathy.
1 Pedro 5:10

“Ang kahupayan dili dihadiha; tingali kita mag-antos ‘sa makadiyot.’ Pero si Jehova makahatag natog kusog sa pag-antos sa bisan unsang problema.”—Lorena.