Sa unsa nimo ikakomparar ang imong konsensiya?

•   kompas

•   samin

•   amigo

•   huwes

 Kanang upat mao ang saktong tubag. Hisgotan niining artikuloha kon ngano.

•  Unsa ang konsensiya?

•  Nganong kinahanglan nimong bansayon ang imong konsensiya?

•  Unsaon nimo pagbansay ang imong konsensiya?

•  Ang giingon sa ubang batan-on

 Ang konsensiya mao ang imong pagbati sa kon unsay husto ug sayop. Sama nig ‘balaod nga nasulat sa kasingkasing,’ nag-ingon ang Bibliya. (Roma 2:15, Maayong Balita Biblia) Ang maayong konsensiya makatabang nimo sa pagkahibalo kon husto ba o sayop ang imong gihimo o ang imong himoon.

•   Ang imong konsensiya morag kompas. Giyahan ka niini sa saktong direksiyon aron makalikay ka sa kadaot.

•   Ang imong konsensiya morag samin. Ipakita niini kanimo kon unsa gyod kang klaseha sa tawo.

•   Ang imong konsensiya morag maayong amigo. Kini maghatag nimog maayong tambag ug motabang nimo nga molampos​—kon maminaw ka.

•   Ang imong konsensiya morag huwes. Hukman ka niini kon makahimo kag di maayo.

 Ang punto: Ang imong konsensiya makatabang gyod nimo (1) sa paghimog maalamong mga desisyon ug (2) sa pagpakita nga naguol ka sa imong mga sayop ug gusto nimo kining tul-iron.

 Ang Bibliya nag-ingon nga ‘mentinahon nato ang maayong konsensiya.’ (1 Pedro 3:16) Lisod nang himoon kon ang imong konsensiya wala mabansay.

 “Mamakak ko sa akong ginikanan kon diin ko miadto. Sa primero, makonsensiya ko, pero kadugayan dili na.”​—Jennifer.

 Ngadtongadto, ang konsensiya ni Jennifer nagpalihok niya nga motug-an sa iyang ginikanan kon unsay iyang ginahimo.

 Hunahunaa kini: Kanus-a unta angayng milihok ang konsensiya ni Jennifer?

 “Lisod ug maka-stress kaayo ang dobleng pagkinabuhi. Kon tugtan ka sa imong konsensiya sa paghimog dili maayo, sayon na lang ang paghimog dili maayo sa sunod higayon.”​—Matthew.

 Balewalaon sa ubang tawo ang ilang konsensiya. Ang Bibliya nag-ingon nga sila “dili na makaila kon unsay maayo ug daotan.” (Efeso 4:19) Mao ni ang pagkahubad sa Maayong Balita Biblia: “Nawad-an na sila sa kaulaw.”

 Hunahunaa kini: Dihang ang mga tawo dili na makonsensiya sa daotan nilang ginahimo, mas maayo ba ang ilang kinabuhi? Unsang mga problema ang ilang maatubang?

 Ang punto: Aron molihok kanunay ang konsensiya, ang imong “katakos sa panghunahuna” kinahanglang bansayon aron kini ‘makaila sa maayo ug sa daotan.’​—Hebreohanon 5:14.

 Aron mabansay ang imong konsensiya, nagkinahanglan kag sukdanan nga katandian nimo sa imong ginahimo. Ang pipila nagsunod sa sukdanan sa:

•   ilang pamilya ug kultura

•   mga tawo sa ilang palibot

•   sikat nga mga tawo

 Pero, ang sukdanan sa pagkinabuhi nga naa sa Bibliya labaw kaayo kon itandi nianang tanan. Dili nâ ikatingala kay ang Bibliya “gisulat pinaagi sa paggiya sa Diyos,” ang Usa nga naghimo kanato ug nahibalo sa kon unsay pinakamaayo para kanato.​—2 Timoteo 3:16.

 Konsideraha ang pipila ka pananglitan.

 SUKDANAN: “Gusto namong magmatinud-anon sa tanang butang.”​—Hebreohanon 13:18.

•   Sa unsang paagi kana nga sukdanan makaapektar sa imong konsensiya kon matental ka nga mangopya sa eksam, mamakak sa imong ginikanan, o mangawat?

•   Kon ang imong konsensiya magpalihok nimo nga mahimong matinud-anon sa tanang butang, sa unsang paagi makabenepisyo ka karon ug sa umaabot?

 SUKDANAN: “Kalagiw gikan sa seksuwal nga imoralidad.”​—1 Corinto 6:18.

•    Sa unsang paagi kana nga sukdanan makaapektar sa imong konsensiya kon matental ka nga motan-aw ug pornograpiya o makigsekso nga wala pay kasal?

•    Kon ang imong konsensiya magpalihok nimo nga mokalagiw sa seksuwal nga imoralidad, sa unsang paagi makabenepisyo ka karon ug sa umaabot?

 SUKDANAN: “Magpakita mog kaayo sa usag usa, magmabination, kinasingkasing nga magpasaylo sa usag usa.”​—Efeso 4:32.

•    Sa unsang paagi kana nga sukdanan makaapektar nimo dihang mag-away mo sa imong igsoon o amigo?

•    Kon ang imong konsensiya magpalihok nimo nga mahimong maluluy-on ug mabination, sa unsang paagi makabenepisyo ka karon ug sa umaabot?

 SUKDANAN: “Ginadumtan [ni Jehova] ang bisan kinsa nga nahigugma sa kapintasan.”​—Salmo 11:5.

•    Sa unsang paagi kana nga sukdanan makaapektar sa imong pagpilig pelikula, salida sa TV, ug video game?

•    Kon ang imong konsensiya magpalihok nimo sa paglikay sa bayolente nga kalingawan, sa unsang paagi makabenepisyo ka karon ug sa umaabot?

 TINUOD NGA HITABO: “May mga amigo ko nga gadulag bayolente nga mga video game, ug gadula pod ko ana. Dayon giingnan ko ni Papa nga di na ko puwedeng magdulag bayolente nga mga video game. Mao nga magdula lang ko kon moadto ko sa akong mga amigo. Inig-uli nako, dili ko magsaba. Pangutan-on ko ni Papa kon nganong gahilomhilom ko, ug motubag ko nga OK ra ko. Pero usa ka adlaw niana, gibasa nako ang Salmo 11:5 ug nakonsensiya ko sa akong ginahimo. Nakahunahuna ko nga kinahanglan kong moundang sa pagdulag bayolente nga mga video game. Ug miundang gyod ko. Tungod ana, ang usa sa akong mga amigo miundang pod sa pagdulag bayolenteng mga video game.”​—Jeremy.

 Hunahunaa kini: Kanus-a milihok ang konsensiya ni Jeremy, ug kanus-a niya kini gipaminawan? Unsay imong makat-onan sa eksperyensiya ni Jeremy?

 Ang punto: Ang imong konsensiya magpakita kon kinsa gyod ka ug kon unsay importante kanimo. Unsa may gipakita sa imong konsensiya bahin nimo?