“Sa nag-edad kog 15, nakasabot ra ko sa mga balaod sa akong ginikanan, pero 19 na ko karon ug gusto kog dugang kagawasan.”​—Sylvia.

 Parehas ba mog gibati ni Sylvia? Kon mao, kini nga artikulo makatabang nimo dihang makig-estorya ka sa imong ginikanan bahin sa imong situwasyon.

•  Ang angay nimong mahibaloan

•  Ang imong mahimo

•  Ang giingon sa ubang batan-on

 Sa dili pa ka makig-estorya sa imong ginikanan bahin sa ilang mga balaod, konsideraha ang mosunod:

•  Gubot ang kinabuhi kon walay mga balaod. Hunahunaa ang usa ka busy kaayo nga highway. Unsa kahay mahitabo kon walay mga road sign, stoplight, ug speed limit? Ang mga balaod sa balay​—sama sa mga balaod sa trapiko—​makatabang sa pagmentinar sa kahapsay.

•  Ang mga balaod maoy ebidensiya nga gimahal ka sa imong ginikanan. Kon wala sila maghimog mga balaod, basin wala silay pagtagad kon unsay mahitabo nimo. Makaingon ba ka nga maayo silang ginikanan?

 NAHIBALO KA BA? Duna poy ginasunod nga mga balaod ang mga ginikanan! Kon nagduhaduha ka, basaha ang Genesis 2:24; Deuteronomio 6:6, 7; Efeso 6:4; ug 1 Timoteo 5:8.

 Pero unsay imong buhaton kon bation gihapon nimo nga dili rasonable ang mga balaod sa imong ginikanan?

 Sa dili pa ka makig-estorya, pamalandong usa. Kanunay ba nimong gisunod ang mga balaod sa imong ginikanan? Kon talagsa ra kang mosunod nila, basin dili pa kini ang panahon nga mohangyo ka nilag dugang kagawasan. Hinuon, tan-awa ang artikulong, “Unsay Akong Himoon Aron Mosalig Nako ang Akong Ginikanan?”

 Kon kanunay nimong gisunod ang imong ginikanan, pangandami ang gusto nimong isulti kanila. Ang paglista daan sa imong gustong isulti makatabang aron makita nimo kon rasonable ba ang imong hangyo. Sunod, hangyoa ang imong ginikanan nga mopilig oras ug lugar diin kamong tanan relaks ug komportable. Dayon dihang makig-estorya na ka nila, hinumdomi ang mosunod:

 Magmatinahoron. Ang Bibliya nag-ingon: “Ang pulong nga makapasakit makapapukaw sa kasuko.” (Proverbio 15:1) Busa hinumdomi: Kon makiglalis ka sa imong ginikanan o pasanginlan sila nga dili sila makataronganon, dili gyod maayo ang resulta sa inyong panag-estorya.

 “Kon respetohon nako ang akong ginikanan, respetohon sab ko nila. Mas dali ming magkasinabot kon duna miy respeto sa usag usa.”​—Bianca, 19.

 Paminaw. Ang Bibliya nagtudlo nato nga “magmaabtik sa pagpaminaw, magmahinay sa pagsulti.” (Santiago 1:19) Hinumdomi nga makig-estorya ka sa imong ginikanan, dili kay mohatag ug diskurso.

 “Samtang magkahamtong ta, bation tingali nato nga mas daghan na tag nahibaloan kay sa atong mga ginikanan, pero dili gyod na tinuod. Mas maayong maminaw ta ug mosunod sa ilang tambag.”​—Devan, 20.

 Magmasinabtanon. Paningkamoti nga masabtan nimo ang panglantaw sa imong ginikanan. Sunda ang tambag sa Bibliya nga “magatan-aw, dili lamang sa personal nga interes sa mga butang labot sa inyong kaugalingon, kondili sa personal nga interes [o panglantaw] usab sa uban”​—niining situwasyona, ang panglantaw sa imong ginikanan.​—Filipos 2:4.

 “Sa una, giisip nakong kaaway ang akong ginikanan imbes teammate. Pero nasabtan na nako nga naningkamot lang sila nga mahimong maayong ginikanan sama nga naningkamot sab ko nga mahimong hamtong. Ang tanan nilang gihimo maoy tungod sa ilang gugma kanako.”​—Joshua, 21.

 Pagsugyot ug mga solusyon. Pananglit giingnan ka sa imong ginikanan nga dili sila mosugot nga magdrayb kag usa ka oras padulong sa tapoktapok nga gusto nimong adtoan. Sayra kon unsay ilang gikabalak-an​—ang gilay-on ba o ang tapoktapok mismo?

•   Kon ang gilay-on ang ilang gikabalak-an, mosugot kaha sila kon naa kay kauban nga maayo nga drayber?

•   Kon ang tapoktapok ang ilang gikabalak-an, makatabang ba kon imo silang sultihan kon kinsay mga moadto ug kon kinsay magdumala sa maong tapoktapok?

 Magmatinahoron sa imong sinultihan ug mapailobong maminaw sa isulti sa imong ginikanan. Ipakita nga imong ‘gipasidunggan ang imong amahan ug inahan’ pinaagi sa imong sinultihan ug linihokan. (Efeso 6:2, 3) Mausab kaha ang ilang hunahuna? Tingali. Basin pod ug dili. Pero bisag unsa pay ilang desisyon . . .

 Matinahorong dawata ang desisyon sa imong ginikanan. Importante kaayo kini pero sagad dili kini ang mahitabo. Kon makiglalis ka sa imong ginikanan kay wala masunod ang imong gusto, mas maglisod na kag pananghid sa sunod higayon. Pero kon kinabubut-on kang mosunod, basin hatagan na ka nilag dugang kagawasan.