Nakagusto ka sa imong nailaila, ug nakadesisyon mong duha nga magdeyt aron masayran kon mahimo ba mong maayong kapikas para sa usag usa. Samtang mas nagkailhanay mo, unsay angay nimong dahomon?

Niining artikuloha

•  Dahoma ang matinud-anong panag-estoryahay

•  Dahoma ang managlahing panglantaw

•  Dahoma nga makapa-stress ang pagpakigdeyt

 Ikaw ug ang imong higala daghag mahibaloan bahin sa usag usa samtang maggahin mog panahon aron mas magkailhanay. Makakat-on ka bahin niya kon maniid ka sa iyang panggawi sa lainlaing kahimtang.

 Pero naay mga butang nga kinahanglan gyod ninyong isulti sa usag usa. Dihang inyo nang himoon, paneguroa nga dili ka magpadala sa imong gibati ug hunahunaa pag-ayo ang imong himoong mga desisyon.

 Kini ang mga topiko nga kinahanglan ninyong hisgotan:

•   Kuwarta. Naa ba kay mga utang? Gastador ba ka? Kon magminyo mo, unsaon ninyo paghimog mga desisyon bahin sa kuwarta ug mga galastohan?

•   Panglawas. Naa ba kay sakit? Nakasinati ba kag grabeng problema sa panglawas kaniadto?

•   Tumong. Unsay imong mga tumong? Parehas ba mog mga tumong sa imong trato? Kon magminyo na mo, malipay ba gihapon ka kon ugaling dili na nimo makab-ot ang imong mga tumong kay nausab ang inyong kahimtang?

•   Pamilya. Naa ba kay obligasyon sa imong pamilya karon? Kon wala, naa ba kay posibleng mga obligasyon kanila sa umaabot? Gusto ba kag mga anak? Kon oo, pila man?

 Dihang maghisgot ani nga mga topiko, paningkamoti nga magmatinud-anon. Itug-an gyod ang tinuod ug ayaw pagpakaaron-ingnon aron lang mauyonan ka sa imong trato.—Hebreohanon 13:18.

 Hunahunaa: Unsay angay nimong mahibaloan bahin sa imong trato? Unsay angay niyang mahibaloan bahin nimo? Sa unsang paagi ang inyong pagkamatinud-anon sa usag usa karon makatabang ninyo kon minyo na mo?

 Prinsipyo sa Bibliya: “Ang matag usa kaninyo kinahanglang magsulti sa kamatuoran.”—Efeso 4:25, Ang Biblia, 2011.

 “Maghunahuna tingali ang babaye, ‘Mamalaye na seguro to siya human sa unom ka bulan,’ pero ang lalaki basig maghunahuna nga human sa usa ka tuig pa siya mamalaye. Kon ingon ana ang kahimtang, basin maglibog ug masakitan ra unya ang babaye kay lahi ang iyang gidahom sa gihunahuna sa lalaki. Importante gyod nga parehas silag hunahuna aning bahina.”—Ariana, usa ka tuig nang minyo.

 Managlahi gyod ang matag tawo. Busa ayaw pagdahom nga ikaw ug ang imong trato magkasinabot sa tanang panahon o parehas ug opinyon sa tanang butang. Ang inyong kultura ug gidak-an makaapektar tingali sa inyong panglantaw.

 Hunahunaa: Kon managlahi ang inyong opinyon bahin sa ginagmayng mga butang, andam ba mong magpaalkanse aron dili mabungkag ang kalinaw sa inyong relasyon basta wala lang moy nalapas nga sukdanan sa Bibliya?

 Prinsipyo sa Bibliya: “Ipakita sa tanan ang inyong pagkamakataronganon.”—Filipos 4:5.

 “Bisag para nimo morag bagay kaayo mo, naa gyoy mga butang nga dili mo magkasinabot. Importante man nga parehas mo sa daghang butang, pero mas importante gyod nga inyong panid-an ang mga hiyas nga ipakita sa matag usa dihang managlahi ang inyong panglantaw.”—Matthew, lima ka tuig nang minyo.

 Kon makigdeyt ka, kinahanglan kang mogahin ug dakong panahon ug tungod niana basin ma-stress ka. Unsay makatabang?

 Pagtakda ug mga limitasyon. Likayi nga masobraan ang imong pokus sa inyong relasyon nga mapasagdan na nuon nimo ang imong mga responsibilidad—o ang imong mga higala pa gani. Si Alana, nga lima ka tuig nang minyo, miingon: “Kinahanglan gihapon nimo ang imong mga higala kon minyo na ka, ug gikinahanglan pod ka nila. Ayaw silag balewalaa karon, tungod lang kay naa na kay trato.”

 Hinumdomi, dihang magminyo na ka, kinahanglan nga balanse ka sa tanang bahin sa imong kinabuhi. Unsa kahag sulayan na ninyo sa imong trato samtang dili pa mo minyo?

 Hunahunaa: Sobra ra ba ang panahon ug atensiyon nga imong gipangayo sa imong trato? O gibati ba nimo nga ang imong trato ang sobra rag gipangayo nimo? Unsay inyong mahimo sa pagbalanse sa inyong panahon aron dili mo kapoyon o mapul-an sa inyong relasyon?

 Prinsipyo sa Bibliya: “Dunay gitakdang panahon alang sa tanang butang, panahon alang sa matag kalihokan.”—Ecclesiastes 3:1.

 “Kon paglingawlingaw ra pirme ang gahinan ug panahon sa managtrato, basin makalitan sila sa kinabuhing minyo. Mas maayo kon magdungan pod silag himo sa adlaw-adlawng mga buluhaton sama sa pagpamalit, pagpanghinlo, ug pag-alagad nga magkauban. Makatabang gyod ni nila nga maandam sa kinabuhing minyo.”—Daniel, duha ka tuig nang minyo.

 Hinumdomi, ang inyong relasyon dili kay kutob lang sa pagpakigdeyt. Kinahanglan mong modesisyon kon magminyo ba gyod mo o magbulag. Ang bahin 3 niini nga serye maghisgot kon unsay angay ninyong konsiderahon dihang mohimo ana nga desisyon.