Para sa uban, wala nay mas grabe pa kay sa pagpondo sa balay tungod sa ulan, diin wala kay mahimo ug walay kaadtoan. “Kon ingon ana ang panahon,” miingon ang batan-ong si Robert, “maglingkod lang ko ug wala mahibalo kon unsay himoon.”

 Gibati ba pod na nimo? Kon mao, kini nga artikulo makatabang nimo!

•  Ang angay nimong mahibaloan

•  Ang imong mahimo

•  Ang giingon sa ubang batan-on

•   Basin dili makatabang ang paggamit ug gadyet.

   Ang pag-Internet maoy usa ka paagi sa pagpalabay sa oras, pero mahimong makapugong kini sa pagkahimo nimong creative ug mosamot hinuon ang imong kalaay. “Makaamgo ka nga nagtan-aw ra diay ka sa screen ug wala mogana ang imong utok,” miingon si Jeremy nga 21 anyos.

   Uyon ana ang batan-ong si Elena. “Limitado ra ang imong mahimo sa mga gadyet,” siya miingon. “Makawala ni sa imong atensiyon sa realidad, pero human ka mogamit ug gadyet, laayon kag samot!”

•   Importante ang positibong panglantaw.

   Kon daghan kag himoon, dili na ba ka laayon? Depende sa imong interes sa imong ginahimo. Pananglitan, ang batan-ong si Karen miingon: “Laayan kaayo ko sa eskuylahan bisag daghag ginapahimo sa ako sa tibuok adlaw. Kinahanglang interesado ka sa imong ginahimo aron dili ka laayon.”

 Nahibalo ba ka? Ang “kawalay mahimo” dili babag kondili kahigayonan​—samag tambok nga yuta diin motubo ang pagka-creative.

 Pagbaton ug interes sa lainlaing butang. Pakighigala. Pangitag bag-ong kalingawan. Pag-research ug bag-ong mga topiko. Ang mga tawo nga dunay lainlaing interes lagmit dili laayon kon mag-inusara ug dili pod laay ikauban!

 Prinsipyo sa Bibliya: “Ang tanan nga makaplagan sa imong kamot nga buhaton, buhata uban sa imong kusog mismo.”​—Ecclesiastes 9:10.

 “Di pa dugay, nagtuon kog Mandarin Chinese, ug ang pagpraktis kada adlaw nakapaamgo nako nga gimingaw ko sa pagkat-on. Malingaw ko kon naa koy tun-an kay kanunay kong maghunahuna ug magamit nako ang akong panahon sa mapuslanong paagi.”​—Melinda.

 Pagpokus sa imong tumong. Kon makita nimo ang katuyoan sa imong ginahimo, mas mainteres ka niini. Dili pod laay bisan ang pag-eskuyla kon naa kay tumong.

 Prinsipyo sa Bibliya: “Wala nay laing mas maayo alang sa tawo kay sa . . . makapahimulos ug maayo sa iyang kahago.”​—Ecclesiastes 2:24.

 “Sa hapit na kong mahuman ug eskuyla, walo ka oras kong magtuon kada adlaw kay kinahanglan kong moapas. Laay? Dili, kay determinado kong kab-oton ang akong tumong. Nagpokus ko sa resulta​—nga maka-graduate ko—​ug kini ang nakatabang nako nga magpadayon.”​—Hannah.

 Dawata ang dili nimo mausab. Bisan ang eksayting kaayo nga buluhaton dunay dili makalingaw nga mga bahin. Ug usahay bisan ang suod kaayong mga higala dili modayon sa plano, maong wala na hinuon kay buhaton. Imbes maguol o tugotan kini nga makawala sa imong kalipay, paningkamoti nga magmapositibo.

 Prinsipyo sa Bibliya: “Ang malipayon ug kasingkasing may kombira sa kanunay.”​—Proverbio 15:15.

 “Giingnan ko sa akong higala nga i-enjoy ang mga panahon nga mag-inusara ko. Siya miingon nga importanteng makat-onan ang pagkabalanse, nga duna tay panahon nga kauban ang ubang tawo ug duna pod tay panahon para sa kaugalingon.”​—Ivy.