Ang Bibliya wala maghisgot niini sa detalyadong paagi, pero wala kini magdili sa paggamit ug makeup, pagsul-ob ug alahas, o uban pang pagpangarte sa lawas. Imbes magpokus sa pisikal nga panagway, ang Bibliya nagdasig sa pagsul-ob ug “dili-madunot nga sapot sa malinawon ug malumong espiritu.”​—1 Pedro 3:3, 4.

•   Ang Bibliya naghisgot ug buotang mga babaye nga nangarte o nagpaguwapa. Si Rebeca, nga asawa sa anak ni Abraham nga si Isaac, nagsul-ob ug bulawan nga singsing sa ilong, mga pulseras, ug uban pang mahalon nga mga alahas nga hinatag sa iyang umaabot nga ugangang lalaki. (Genesis 24:22, 30, 53) Si Ester sab ‘nagpahimog mga pagmasahe’ o nagpaguwapa ingong pagpangandam alang sa posibilidad nga mahimong rayna sa Imperyo sa Persia. (Ester 2:7, 9, 12) Kini lagmit naglakip sa paggamit ug mga “cosmetic,” o “nagkadaiyang klase sa pangpaguwapa.”​—New International Version; Easy-to-Read Version.

•   Gigamit sa Bibliya ang mga alahas sa pag-ilustrar sa maayong mga buhat. Pananglitan, ang tawo nga mohatag ug maayong tambag gipakasama sa “usa ka ariyos nga bulawan . . . diha sa mapatalinghogong igdulungog.” (Proverbio 25:12) Gipakasama sab sa Diyos ang iyang pagpakiglabot sa nasod sa Israel ngadto sa usa ka bana nga gidayandayanan o gipaguwapahan ang iyang asawa pinaagig mga pulseras, kuwentas, ug ariyos. Tungod niini, ang nasod nahimong “maanyag gayod kaayo.”​—Ezequiel 16:11-13.

 Sayop nga pagsabot: Ang paggamit ni Rayna Jezebel ug pintal sa mata o eye shadow nagpamatuod nga sayop ang paggamit ug makeup.​—2 Hari 9:30.

 Ang tinuod: Si Jezebel gihukmang daotan dili tungod sa iyang panagway kondili tungod sa iyang pagpamarang ug pagpamatay.​—2 Hari 9:7, 22, 36, 37.