Oo, ang Bibliya naghatag ug lig-ong ebidensiya nga dunay Diyos. Kita gidasig nga magbaton ug pagtuo sa Diyos, dili pinaagi sa pagtuo dayon sa gitudlo sa mga relihiyon, kondili sa paggamit sa atong “gahom sa pagpangatarongan” ug “katakos sa pagsabot.” (Roma 12:1; 1 Juan 5:20) Matikdi ang mosunod nga mga pangatarongan nga binase sa Bibliya:

•   Ang paglungtad niining organisado ug hapsay nga uniberso nga may kinabuhi nagpamatuod nga dunay Maglalalang. Ang Bibliya nag-ingon: “Dayag, ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Bisag simple lang kini nga pangatarongan, daghang edukadong tawo ang mouyon nga makapakombinsir kini. a

•   Ingong mga tawo, normal lang nga gusto natong mahibalo sa kahulogan ug katuyoan sa kinabuhi. Usa kini ka matang sa kauhaw nga dili matagbaw bisag natagan-an na ang atong pisikal nga panginahanglan. Apil kini sa gitawag sa Bibliya nga atong “espirituwal nga panginahanglan,” nga naglakip sa tinguha nga mailhan ug simbahon ang Diyos. (Mateo 5:3; Pinadayag 4:11) Kining espirituwal nga panginahanglan dili lang nagpamatuod nga dunay Diyos kondili nagpakita usab nga siya maoy mahigugmaong Maglalalang ug gusto niyang tagbawon nato ang maong panginahanglan.—Mateo 4:4.

•   Eksaktong natuman ang detalyadong mga tagna sa Bibliya nga gisulat ginatos ka tuig nga abante. Ang katukma ug mga detalye niini nga mga tagna lig-ong nagpamatuod nga kini dili gikan sa tawo kondili sa usa ka gamhanang tinubdan.—2 Pedro 1:21.

•   Ang mga magsusulat sa Bibliya dunay kahibalo sa siyensiya nga wala pa mahibaloi sa mga tawo sa ilang panahon. Pananglitan, daghan kaniadto nagtuo nga ang atong planeta gipatong sa usa ka hayop, sama sa elepante, baboyng ihalas, o baka. Apan ang Bibliya nag-ingon nga ‘gibitay [sa Diyos] ang yuta sa wala.’ (Job 26:7) Husto sab ang pagkahubit sa Bibliya nga ‘lingin’ ang porma sa yuta. (Isaias 40:22) Para sa daghan, ang labing makataronganong rason kon nganong nahibalo niana ang mga magsusulat sa Bibliya mao nga kay Diyos ang naghatag nilag impormasyon.

•   Ang Bibliya makatubag sa daghang lisod nga pangutana—mga pangutana nga kon dili matubag, ang usa posibleng mahimong ateyista. Pananglitan: Kon mahigugmaon ug gamhanan kaayo ang Diyos, nganong ang kalibotan punog pag-antos ug pagkadaotan? Nganong ang relihiyon sagad daotan ug impluwensiya imbes maayo?—Tito 1:16.