Oo! Ang Bibliya naggikan sa “Diyos, kinsa nagahupay niadtong mga magul-anon.” (2 Corinto 7:6) Bisag ang Bibliya dili libro bahin sa mental health, nakatabang ni sa daghan nga masuklan ang ilang tinguha nga maghikog. Ang praktikal nga tambag niini makatabang sab nimo.

•  Unsang praktikal nga tambag ang gihatag sa Bibliya?

•  Naghisgot ba ang Bibliya ug mga tawo nga gustong mamatay?

•  Unsang mga teksto sa Bibliya ang makatabang nimo nga masuklan ang tinguha nga maghikog?

•  Unsay akong himoon kon moingon ang akong higala, “Gusto na kong mamatay”?

•  Komosta kon misulay kog hikog sa una?

•  ● Isulti ang imong gibati.

   Ang giingon sa Bibliya: “Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”—Proverbio 17:17.

   Kahulogan: Gikinahanglan nato ang tabang sa uban dihang mobati tag grabeng kaguol.

   Kon iluom nimo ang imong gibati, posible nga dili na unya nimo ni makaya. Pero kon imo ning isulti sa uban, mogaan ang imong gibati ug lantawon na nimo ang situwasyon sa mas positibong paagi.

   Sulayi ni: Pakig-estorya karon, tingali sa usa ka membro sa pamilya o sa kasaligang higala. a Puwede sab nimong isulat ang imong gibati.

• ● Pangayog tabang sa doktor.

   Ang giingon sa Bibliya: “Ang mga tawong himsog wala magkinahanglag doktor, apan kadto lang mga masakiton.”—Mateo 9:12.

   Kahulogan: Angay tang mangonsultag doktor kon naa tay sakit.

   Ang tinguha nga maghikog posibleng simtoma sa sakit sa hunahuna o emosyon. Sama sa pisikal nga sakit, dili ni angayng ikaulaw. Ang sakit sa hunahuna ug emosyon matambalan.

   Sulayi ni: Pangonsulta dayon ug doktor.

• ● Hinumdomi nga gimahal ka sa Diyos.

   Ang giingon sa Bibliya: “Dili ba ang lima ka goryon ginabaligya lang ug duha ka sensilyo nga gamayg bili? Apan walay usa kanila nga gikalimtan sa Diyos. . . . Ayaw mog kahadlok; mas labaw mog bili kay sa daghang goryon.”—Lucas 12:6, 7.

   Kahulogan: Bililhon ka sa Diyos.

   Tingali mobati ka nga way nagmahal nimo, pero nakita sa Diyos ang imong pag-antos. Gimahal ka niya—bisag nawad-an ka nag ganang mabuhi. Ang Salmo 51:17 nag-ingon: “Ang kasingkasing nga gun-ob ug dugmok, Oh Diyos, dili nimo isalikway.” Gusto sa Diyos nga mabuhi ka kay gimahal ka niya.

   Sulayi ni: Susiha ang ebidensiya sa Bibliya nga gimahal ka sa Diyos. Pananglitan, tan-awa ang kapitulo 24 sa basahong Pakigsuod Kang Jehova, nga usa ka tabang sa pagtuon sa Bibliya.

• ● Pag-ampo sa Diyos.

   Ang giingon sa Bibliya: “Itugyan kaniya ang tanan ninyong kabalaka, kay gimahal mo niya.”—1 Pedro 5:7.

   Kahulogan: Gusto sa Diyos nga isulti nimo kaniya kon unsa gyoy imong gibati ug gikabalak-an.

   Ang Diyos makahatag nimog kalinaw ug kusog aron makalahutay ka. (Filipos 4:6, 7, 13) Niining paagiha, siya motabang niadtong sinserong motawag niya.—Salmo 55:22.

   Sulayi ni: Pag-ampo sa Diyos karon. Gamita ang iyang ngalang Jehova ug isulti kaniya ang imong gibati. (Salmo 83:18) Hangyoa siya nga tabangan ka nga makalahutay.

• ● Pamalandonga ang paglaom nga gihisgotan sa Bibliya.

   Ang giingon sa Bibliya: “Kining paglaom nga atong nabatonan samag angkla sa atong kinabuhi, nga segurado ug lig-on.”—Hebreohanon 6:19.

   Kahulogan: Ang imong emosyon mahimong mag-usab-usab, samag barko nga gihapakhapak sa dagkong balod, pero ang paglaom nga gihatag sa Bibliya makatabang nga mahimong balanse ang imong emosyon.

   Kini nga paglaom dili imposible kay gibase ni sa saad sa Diyos nga wad-on ang tanang hinungdan sa atong kasakit.—Pinadayag 21:4.

   Sulayi ni: Pagkat-on ug dugang bahin sa paglaom nga gihisgotan sa Bibliya pinaagi sa pagbasa sa leksiyon 5 sa brosyur, Maayong Balita Gikan sa Diyos!

• ● Himoa ang mga butang nga makapalipay nimo.

   Ang giingon sa Bibliya: “Ang malipayong kasingkasing maayo nga tambal.”—Proverbio 17:22.

   Kahulogan: Dihang himoon nato ang mga butang nga makapalipay nato, moarang-arang ang atong hunahuna o emosyon.

   Sulayi ni: Himoa ang butang nga sagad makapalipay nimo. Pananglitan, paminawg makapalipayng musika, pagbasag makapadasig nga basahon, o paghimog mga buluhaton nga makapalingaw nimo. Mas malipay pod ka kon motabang ka sa uban bisan sa ginagmayng paagi.—Buhat 20:35.

• ● Atimana ang imong panglawas.

   Ang giingon sa Bibliya: “Ang pagbansay sa lawas naay . . . kaayohan.”—1 Timoteo 4:8.

   Kahulogan: Makabenepisyo ta kon kita mag-ehersisyo, sakto sa tulog, ug mokaog sustansiyadong pagkaon.

   Sulayi ni: Pag-brisk walking (paspas nga paglakaw) bisag 15 minutos lang.

• ● Hinumdomi nga ang pagbati ug ang ubang butang sa kinabuhi mausab.

   Ang giingon sa Bibliya: “Wala mo masayod kon unsay mahitabo sa inyong kinabuhi ugma.”—Santiago 4:14.

   Kahulogan: Ang bug-at nga problema—bisan kadtong sa tan-aw nimo walay solusyon—lagmit temporaryo lang.

   Bisan unsa ka lisod ang imong situwasyon karon, puwede ning mausab ugma. Busa pangitag paagi nga makalahutay ka. (2 Corinto 4:8) Ang imong lisod nga kahimtang lagmit mausab paglabay sa panahon. Pero kon maghikog ka, dili na nimo ni mabawi.

   Sulayi ni: Basaha ang mga estorya sa Bibliya bahin sa mga tawo nga naguol pag-ayo nga gusto na nilang mamatay, ug tan-awa kon sa unsang paagi miarang-arang ang ilang situwasyon—sagad sa mga paagi nga wala nila dahoma. Tagda ang pipila ka pananglitan.

 Oo. Ang Bibliya naghisgot ug pipila ka tawo nga sama rag miingon, “Gusto na kong mamatay.” Imbes kasab-an, gitabangan hinuon sila sa Diyos. Puwede sab ka niyang tabangan.

Elias

•  ● Kinsa siya? Si Elias maoy isog nga propeta. Pero dihay mga higayon nga naguol siya pag-ayo. “Si Elias maoy usa ka tawong may pagbati nga sama kanato,” nag-ingon ang Santiago 5:17.

•  ● Nganong gusto niyang mamatay? Usa ka higayon niana, si Elias nahadlok ug mibating nag-inusara ug walay pulos. Mao nga mihangyo siya: “Kuhaa na karon, Oh Jehova, ang akong kinabuhi.”—1 Hari 19:4.

•  ● Unsay nakatabang niya? Gisulti ni Elias sa Diyos kon unsay iyang gibati. Giunsa siya pagpalig-on sa Diyos? Gipakita sa Diyos kang Elias ang iyang pagmahal ug ang iyang gahom. Gipasaligan sab siya sa Diyos nga mapuslanon gihapon siya ug gihatagan siyag mapinanggaon ug maayong katabang.

•  ▸ Basaha ang estorya bahin kang Elias: 1 Hari 19:2-18.

Job

•  ● Kinsa siya? Si Job dato, pamilyado, ug matinumanong nagsimba sa matuod nga Diyos.

•  ● Nganong gusto niyang mamatay? Kalit lang nga nahitabo ang daotang mga butang sa iyang kinabuhi. Nawad-an siya sa tanan niyang kabtangan. Ang tanan niyang anak namatay sa katalagman. Gitakboyan siyag grabeng sakit. Ug sa kataposan, sayop ug way kaluoy siyang giakusahan nga siyay mabasol sa iyang mga problema. Si Job miingon: “Gikasilagan ko ang akong kinabuhi; dili na ko gustong mabuhi.”—Job 7:16.

•  ● Unsay nakatabang niya? Si Job miampo sa Diyos ug nakigsulti sa uban. (Job 10:1-3) Gidasig siya sa mabination niyang higala, si Elihu, kinsa mitabang niya sa paghunahuna sa iyang kahimtang sa laing paagi. Labaw sa tanan, gidawat ni Job ang tambag ug tabang sa Diyos.

•  ▸ Basaha ang estorya bahin kang Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

•  ● Kinsa siya? Si Moises usa ka lider sa karaang Israel ug matinumanong propeta.

•  ● Nganong gusto niyang mamatay? Si Moises dakog responsibilidad, kanunayng gisaway, ug nabug-atan pag-ayo. Maong mihangyo siya sa Diyos: “Palihog patya ko karon dayon.”—Numeros 11:11, 15.

•  ● Unsay nakatabang niya? Gisulti ni Moises sa Diyos ang iyang gibati. Gipagaan sa Diyos ang responsibilidad ni Moises aron mamenosan ang iyang stress.

•  ▸ Basaha ang estorya bahin kang Moises: Numeros 11:4-6, 10-17.