Makahupay ba Nako ang Bibliya?
Tubag sa Bibliya
Oo. (Roma 15:4) Niay pipila ka teksto sa Bibliya nga nakahupay sa daghang tawo dihang nag-atubang silag lisod nga mga situwasyon ug makapaluya nga mga emosyon.
Niining artikuloha
Lisod nga mga problema
Salmo 23:4: “Bisan pag maglakaw ko sa ngiob kaayo nga walog, dili ko mahadlok, kay ikaw nag-uban kanako.”
Kahulogan: Dihang moampo ka sa Diyos ug magpagiya sa iyang Pulong, ang Bibliya, makabaton kag kaisog sa pag-atubang sa imong mga problema.
Filipos 4:13: “Naa koy kusog sa pag-atubang sa tanang butang tungod kaniya nga naghatag nakog gahom.”
Kahulogan: Hatagan ka sa Diyos ug kusog aron makaya ang bisan unsang problema.
Pagkamatay sa minahal sa kinabuhi
Ecclesiastes 9:10: “Walay buluhaton o plano o kahibalo o kaalam sa Lubnganan.”
Kahulogan: Ang mga patay wala mag-antos, ug dili sila makapasakit nato. Wala na silay pagbati.
Buhat 24:15: “Duna unyay pagkabanhaw.”
Kahulogan: Banhawon sa Diyos ang atong mga minahal nga namatay.
Sobrang pagkakonsensiya
Salmo 86:5: “Kay ikaw, Oh Jehova, a maayo ug andam sa pagpasaylo; dagaya ka sa maunongong gugma alang niadtong tanan nga nagatawag kanimo.”
Kahulogan: Pasayloon sa Diyos kadtong tinuod nga nagbasol sa ilang nahimong mga sayop ug naningkamot nga dili na kana himoon pag-usab.
Salmo 103:12: “Sama ka layo sa sidlakan gikan sa kasadpan, ingon usab niana ka layo nga gibutang niya ang atong kalapasan gikan kanato.”
Kahulogan: Dihang magpasaylo ang Diyos, ibutang niya sa layo kaayo ang atong mga sala. Dili na niya kana hinumdoman pa aron akusahan o silotan ta.
Kaguol
Salmo 31:7: “Nakita nimo ang akong kasakitan; nasayod ka sa akong grabeng kagul-anan.”
Kahulogan: Nakita sa Diyos ang tanan nimong pag-antos. Nakasabot siya sa imong gibati—bisan pag wala makasabot ang uban.
Salmo 34:18: “Si Jehova duol niadtong mga dugmok ug kasingkasing; iyang luwason kadtong mga naluya ang buot.”
Kahulogan: Nagsaad ang Diyos nga tabangan ka niya dihang maguol ka. Hatagan ka niyag kusog aron makaya ang kasakit nga imong gibati.
Sakit
Salmo 41:3: “Si Jehova magpalig-on kaniya sa iyang higdaanan dihang siya masakit.”
Kahulogan: Tabangan ka sa Diyos nga makalahutay sa imong grabeng sakit. Hatagan ka niyag kalinaw sa hunahuna, kusog aron makalahutay, ug kaalam sa paghimog maayong mga desisyon.
Isaias 33:24: “Walay residente nga moingon: ‘Masakiton ko.’”
Kahulogan: Nagsaad ang Diyos nga moabot ang panahon nga ang tanang tawo maayo nag panglawas.
Stress ug pagkabalaka
Salmo 94:19: “Dihang nalumsan ko sa mga kabalaka, ang imong paghupay nakapalipay kanako.”
Kahulogan: Kon moduol ta sa Diyos dihang ma-stress ta, tabangan ta niya nga magpabiling kalmado.
1 Pedro 5:7: “Itugyan kaniya ang tanan ninyong kabalaka, kay gimahal mo niya.”
Kahulogan: Nahibalo ang Diyos sa atong mga pag-antos. Gusto niya nga moampo ta kaniya ug isulti nato ang atong mga problema.
Giyera
Salmo 46:9: “Gipahunong niya ang mga gubat sa tibuok yuta.”
Kahulogan: Hapit nang taposon sa Gingharian sa Diyos ang tanang giyera.
Salmo 37:11, 29: “Ang mga maaghop manag-iya sa yuta, ug mabatonan nila ang tumang kalipay tungod sa dagayang pakigdait. . . . Ang mga matarong manag-iya sa yuta, ug sila magpuyo niini hangtod sa hangtod.”
Kahulogan: Kay may kalinaw na sa tibuok yuta, ang maayong mga tawo magmalipayon na hangtod sa hangtod.
Kabalaka bahin sa umaabot
Jeremias 29:11: “‘Nahibalo ko pag-ayo kon unsay akong buhaton kaninyo,’ miingon si Jehova, ‘hatagan mo nakog kalinaw, ug dili katalagman, aron makabaton mog maayong kaugmaon ug paglaom.’”
Kahulogan: Ang Diyos nagpasalig nga makabaton ta ug malipayong kaugmaon.
Pinadayag 21:4: “Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”
Kahulogan: Nagsaad ang Diyos nga wad-on niya ang tanang daotang butang nga atong nakita o naeksperyensiyahan karon.
a Jehova ang personal nga ngalan sa Diyos. (Salmo 83:18) Tan-awa ang artikulo nga “Kinsa si Jehova?”
Basin Ganahan Pod Ka
ANG BANTAYANANG TORRE
Ang Diyos may Pagtagad Kanimo
Ang Bibliya magpalig-on sa atong pagsalig sa mga saad sa Diyos sa umaabot.
TUBAG SA MGA PANGUTANA BAHIN SA BIBLIYA
Asa Ko Makakaplag ug Paglaom?
Kon ang imong paglaom gibase sa Bibliya, mouswag ang imong kinabuhi karon ug makabaton kag positibong panglantaw sa umaabot.
UBANG TOPIKO
Paghupay Alang sa mga Namatyan
Dihang mamatyan tag minahal, mobati tingali ta nga walay makasabot sa atong kasakit. Pero ang Diyos nakasabot sa atong gibati, ug siya makatabang nato.
ANG BANTAYANANG TORRE
Dihang Mobati Ka nga Dili Na Nimo Kaya
Bisag unsa pay kalisdanan, may pulos gihapong mabuhi.
IMPORTANTENG GITUDLO SA BIBLIYA
Nganong Gitugotan sa Diyos ang Pag-antos?
Daghan ang nangutana kon nganong ang kalibotan punog pagdumot ug pag-antos. Naa sa Bibliya ang makapatagbaw ug makapahupay nga tubag.
GITUDLO SA BIBLIYA
Sulayi ang Among Bible Study Program
Libreng interactive nga pagtuon sa Bibliya uban ang usa ka instruktor.