Ang Bibliya wala direktang maghisgot sa mga dinosaur. Apan ang Bibliya nag-ingon nga ang Diyos maoy ‘naglalang sa tanang butang,’ busa tin-aw nga apil kini sa iyang gihimo. a (Pinadayag 4:11) Bisag ang Bibliya wala espesipikong maghisgot sa mga dinosaur, kini naghisgot sa mga grupo sa mga mananap nga lagmit naglakip kanila:

•   “Dagkong linalang sa dagat,” o “dagkong mananap sa kadagatan.”​—Genesis 1:21; Maayong Balita Biblia.

•   “Ang tanang nagalihok nga mananap sa yuta.”​—Genesis 1:25.

•   “Ang ihalas nga mananap sa yuta.”​—Genesis 1:25.

Ang mga dinosaur ba anam-anam nga mitungha gikan sa ubang mananap?

 Ang mga dinosaur wala motungha nga anam-anam pinaagig ebolusyon, apan kini kalit nga mitungha base sa fossil record. Uyon kini sa giingon sa Bibliya nga gibuhat sa Diyos ang tanang mananap. Pananglitan, ang Salmo 146:6 nag-ingon nga ang Diyos mao ang “Magbubuhat sa langit ug sa yuta, sa dagat, ug sa tanan nga anaa niana.”

Kanus-a nabuhi ang mga dinosaur?

 Ang Bibliya nag-ingon nga ang mga mananap sa dagat ug yuta gihimo sulod sa ikalima ug ikaunom nga mga adlaw, o mga yugto sa panahon, sa paglalang. b (Genesis 1:20-25, 31) Busa base sa Bibliya, posible nga ang mga dinosaur naglungtad sulod sa taas nga panahon.

Dinosaur ba ang Behemot ug Leviatan?

 Dili. Bisan tuod dili maseguro kon unsa gyod ning mga mananapa nga gihisgotan sa basahon sa Job, giila sa daghan nga ang Behemot mao ang hipopotamus ug ang Leviatan mao ang buaya. Uyon kini sa deskripsiyon sa Balaang Kasulatan bahin kanila. (Job 40:15-23; 41:1, 14-17, 31) Kon unsa man gyod nga mananap ang “Behemot” ug “Leviatan,” kini dili gyod dinosaur. Ang Diyos miingon kang Job nga obserbahan kini nga mga mananap, ug si Job nabuhi sa panahon nga dugay nang walay dinosaur.—Job 40:16; 41:8.

Unsay nahitabo sa mga dinosaur?

 Ang Bibliya walay giingon bahin sa pagkawala sa mga dinosaur. Apan kini nag-ingon nga ang tanang butang gihimo ‘tungod sa kabubut-on sa Diyos,’ busa klaro nga naay katuyoan ang Diyos sa paghimog mga dinosaur. (Pinadayag 4:11) Dihang natuman na ang maong katuyoan, gitugot sa Diyos nga mawala ang mga dinosaur.