Ang ngalang Miguel, nga gitawag sa ubang relihiyon nga “San Miguel,” mao ang ngalan ni Jesus didto sa langit. a Si Miguel nakiglalis kang Satanas human mamatay si Moises. Gitabangan sab niya ang usa ka anghel nga mahatod ang mensahe sa Diyos kang propetang Daniel. (Daniel 10:13, 21; Judas 9) Ang ngalang Miguel nagkahulogang “Kinsa ang Sama sa Diyos?” Gituman ni Miguel ang kahulogan sa iyang ngalan pinaagi sa pagdepensa sa pagmando sa Diyos ug sa pagpakig-away sa mga kaaway sa Diyos.​—Daniel 12:1; Pinadayag 12:7.

 Sayra ang mga ebidensiya nga si Jesus mao si Miguel nga arkanghel.

•   Si Miguel mao ang “arkanghel.” (Judas 9) Ang titulong “arkanghel,” nga nagkahulogang “pangulo sa mga anghel,” kaduha lang makita sa Bibliya. Sa maong mga teksto, kining pulonga parehong singular, nga nagpasabot nga usa ra ka anghel ang gitumong niana. Usa niini nga mga teksto nag-ingon nga ang nabanhawng Ginoong Jesus “manaog gikan sa langit uban sa singgit sa pagsugo, uban sa tingog sa arkanghel.” (1 Tesalonica 4:16) Ang tingog ni Jesus maoy “tingog sa arkanghel,” kay siya ang arkanghel, si Miguel.

•   Si Miguel ang pangulo sa kasundalohan sa mga anghel. “Si Miguel ug ang iyang mga manulonda [o, anghel] nakiggubat sa dragon,” si Satanas. (Pinadayag 12:7) Si Miguel dunay dakong posisyon sa langit, kay siya “usa sa mga labawng prinsipe” ug “ang dakong prinsipe.” (Daniel 10:13, 21; 12:1) Kini nga mga titulo nagpaila kang Miguel ingong “pangulong komandante sa mga anghel,” matod ni David E. Aune, eskolar nga nagtuon sa New Testament.

   Gawas sa ngalang Miguel, usa lang ka ngalan ang gihisgotan sa Bibliya nga dunay awtoridad sa kasundalohan sa mga anghel. Gihisgotan sa Bibliya ang ‘pagpadayag sa Ginoong Jesus gikan sa langit uban sa iyang gamhanang mga manulonda [o, anghel] sa nagdilaab nga kalayo, sa dihang siya manimalos.’ (2 Tesalonica 1:7, 8; Mateo 16:27) Si Jesus “miadto sa langit; ug ang mga manulonda ug ang mga awtoridad ug ang mga gahom gipailalom kaniya.” (1 Pedro 3:21, 22) Siyempre, dili rasonable nga iasayn sa Diyos si Jesus ug si Miguel ingong magkaribal nga pangulong komandante sa mga anghel. Busa mas makataronganon ang pagtuo nga ang ngalang Jesus ug Miguel nagtumong sa usa lang ka persona.

•   Si Miguel “mobarog” sa “panahon sa kasakit” nga wala pa gyod sukad mahitabo. (Daniel 12:1) Sa basahon ni Daniel, ang ekspresyong “mobarog” kasagarang gigamit dihang maghisgot ug hari nga andam nang mohimog espesyal nga aksiyon. (Daniel 11:2-4, 21) Si Jesu-Kristo, nga mao “Ang Pulong sa Diyos,” andam nang mohimog espesyal nga aksiyon ingong “Hari sa mga hari,” sa pagpatay sa tanang kaaway ug sa pagprotektar sa katawhan sa Diyos. (Pinadayag 19:11-16) Iya kining himoon panahon sa ‘dakong kasakitan nga wala pa mahitabo sukad sa sinugdan sa kalibotan.’—Mateo 24:21, 42.