Moadto ba sa Langit ang mga Hayop?
Tubag sa Bibliya
Ang Bibliya nagtudlo nga sa tanang linalang sa yuta, mga tawo lang ang moadto sa langit ug limitado ra ang ilang gidaghanon. (Pinadayag 14:1, 3) Moadto sila didto aron magmando ingong mga hari ug saserdote uban ni Jesus. (Lucas 22:28-30; Pinadayag 5:9, 10) Ang kadaghanan sa mga tawo banhawon aron mabuhi sa paraisong yuta.—Salmo 37:11, 29.
Ang Bibliya wala maghisgot nga dunay langit para sa binuhing mga hayop o iro—ug naay maayong rason niana. Ang mga hayop dili makatuman sa mga kuwalipikasyon para sa “langitnong pagtawag.” (Hebreohanon 3:1) Apil niini nga mga kuwalipikasyon ang pagkuhag kahibalo, pagpakitag pagtuo, ug pagtuman sa mga sugo sa Diyos. (Mateo 19:17; Juan 3:16; 17:3) Mga tawo lang ang gilalang nga puwedeng mabuhi sa walay kataposan.—Genesis 2:16, 17; 3:22, 23.
Aron makaadto sa langit, ang mga linalang sa yuta kinahanglang banhawon. (1 Corinto 15:42) Ang Bibliya naghisgot nga dunay mga gibanhaw. (1 Hari 17:17-24; 2 Hari 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Buhat 9:36-42; 20:7-12) Pero tawo ang gipangbanhaw, dili mga hayop.
Duna bay kalag ang mga hayop?
Wala. Ang Bibliya nag-ingon nga ang mga hayop ug tawo maoy kalag. (Numeros 31:28) Dihang gilalang ang unang tawo, si Adan, wala siya hatagig kalag kondili siya “nahimong buhing kalag.” (Genesis 2:7, footnote) Ang kalag gilangkobag duha ka butang: ang “abog sa yuta” ug ang “gininhawa sa kinabuhi.”
Mamatay ba ang kalag?
Oo. Ang Bibliya nagtudlo nga ang kalag mahimong mamatay. (Levitico 21:11, footnote; Ezequiel 18:20) Dihang mamatay, ang mga hayop ug tawo mobalik sa abog. (Ecclesiastes 3:19, 20) Sa laing pagkasulti, wala na sila. a
Makasala ba ang mga hayop?
Dili. Ang usa makasala kon siya maghunahuna, mobati, o mohimog butang nga supak sa sugo sa Diyos. Busa ang usa makasala lang kon naa siyay katakos sa pagdesisyon kon unsay husto ug sayop, pero ang mga hayop wala makabaton niini nga katakos. Sagad molihok sila base sa ilang instinct, o kinaiyanhong katakos, sulod sa mubong panahon nga sila buhi. (2 Pedro 2:12) Dayon sila mamatay bisag walay sala.
Husto ba nga maltrataron ang mga hayop?
Dili. Gihatag sa Diyos sa mga tawo ang awtoridad nga gamhan ang mga hayop pero dili ang katungod nga maltrataron kini. (Genesis 1:28; Salmo 8:6-8) Ang Diyos nagtagad sa kaayohan sa matag hayop—apil sa gagmayng langgam. (Jonas 4:11; Mateo 10:29) Gisugo niya ang iyang mga magsisimba nga trataron ang mga hayop sa maayong paagi.—Exodo 23:12; Deuteronomio 25:4; Proverbio 12:10.
a Alang sa dugang nga impormasyon, tan-awa ang kapitulo 6 sa librong Unsay Gitudlo Kanato sa Bibliya?
Basin Ganahan Pod Ka
TUBAG SA MGA PANGUTANA BAHIN SA BIBLIYA
Unsa ang Kalag?
Naa ba kini sulod sa imong lawas? Padayon ba kining mabuhi human ka mamatay?
TUBAG SA MGA PANGUTANA BAHIN SA BIBLIYA
Kinsay Moadto sa Langit?
Sayop ang komon nga pagsabot nga ang tanang maayong tawo moadto sa langit. Unsay tinuod nga gitudlo sa Bibliya?
ANG BANTAYANANG TORRE
“Wala Na Ko Magtinguha nga Bag-ohon ang Kalibotan”
Sa unsang paagi ang pagtuon sa Bibliya nakatabang sa usa ka aktibista sa pagkat-on bahin sa tinuod nga kausaban alang sa katawhan?
BAHIN KANAMO
Hangyo nga Magpaduaw
Pakighisgot bahin sa usa ka topic sa Bibliya, o pagkat-og dugang bahin sa mga Saksi ni Jehova.