Ang Bibliya nag-ingon nga kabubut-on sa Diyos nga ang mga tawo “maglikay sa seksuwal nga imoralidad.” (1 Tesalonica 4:3) Sa Bibliya, ang terminong “seksuwal nga imoralidad” nag-apil sa pagpanapaw, homoseksuwal nga mga buhat, ug seksuwal nga relasyon tali sa lalaki ug babaye nga dili minyo.

•  Nganong importante sa Diyos nga ang lalaki ug babaye magpakasal?

•  Unsay hunahuna sa Diyos bahin sa pag-ipon una magpakasal aron masulayan kon magkasinabot ba?

•  Sa unsang paagi mapalig-on sa magtiayon ang ilang kaminyoon?

•   Ang kahikayan sa kaminyoon naggikan sa Diyos. Gisugdan niya kini dihang iyang gikasal ang unang magtiayon. (Genesis 2:22-24) Dili niya katuyoan nga ang lalaki ug babaye mag-ipon nga dili magpakasal.

•   Ang Diyos nahibalo kon unsay pinakamaayo para sa mga tawo. Iyang gidisenyo ang kaminyoon ingong permanenteng pag-ubanay sa lalaki ug babaye nga makahatag ug kaayohan ug proteksiyon sa tanang membro sa pamilya. Konsideraha ang usa ka simpleng ilustrasyon. Sama ra nga ang mga instruksiyon gikan sa tighimo magpakita kon unsaon pag-asembol ang usa ka furniture, ang mga instruksiyon sa Diyos magpakita kon sa unsang paagi mapalampos nato ang atong kaminyoon. Ang mga sukdanan sa Diyos kanunayng makahatag ug kaayohan niadtong mosunod niana.—Isaias 48:17, 18.

•   Ang pagpakigsekso sa dili nimo kapikas dunay dili maayong mga resulta. Pananglitan, ang usa mamabdos nga wala sa plano, matakdan ug sakit nga mapasa pinaagig pagpakigsekso, ug mahimong gubot ang iyang hunahuna. a

•   Ang Diyos naghatag sa mga lalaki ug mga babaye sa katakos sa pagpanganak pinaagig pagpakigsekso. Giisip sa Diyos ang kinabuhi ingong sagrado, ug ang katakos sa pagpanganak maoy bililhong regalo. Gusto sa Diyos nga pabilhan nato kana nga regalo pinaagi sa pagtahod sa kahikayan sa kaminyoon.—Hebreohanon 13:4.

 Aron molampos ang kaminyoon, dili kinahanglan nga mag-ipon una ug pipila ka panahon nga walay commitment. Hinunoa, ang relasyon molambo kon ang lalaki ug babaye mag-inunongay ug magtinabangay sa pagsulbad sa mga problema. b Ang kaminyoon makapalig-on sa commitment.—Mateo 19:6.

 Walay perpektong kaminyoon. Pero molampos ang kaminyoon kon ipadapat sa magtiayon ang tambag sa Bibliya. Aniay pipila ka pananglitan:

•   Unaha ang panginahanglan sa imong kapikas.—1 Corinto 7:3-5; Filipos 2:3, 4.

•   Ugmara ang gugma ug pagtahod sa usag usa.—Efeso 5:25, 33.

•   Pag-amping sa imong sinultihan.—Proverbio 12:18.

•   Magmapailobon ug magmapinasayloon.—Colosas 3:13, 14.