“Walay tentasyon nga miabot kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.”—1 Corinto 10:13, Bag-ong Kalibotang Hubad.

 “Walay pagsulay nga miabot kaninyo nga wala masinati sa tawo. Ang Dios kasaligan, ug dili niya itugot nga kamo sulayon labaw sa inyong masarangan, apan uban sa pagsulay siya magtagana usab ug lutsanan, aron makasugakod kamo niini.”—1 Corinto 10:13, Ang Biblia, 2011.

 Kini nga bersikulo nagpakita sa nindot kaayong hiyas sa Diyos, ang iyang pagkakasaligan. Ang maunongong mga magsisimba sa Diyos makasalig sa iyang tabang, ilabina dihang makaatubang silag mga pagsulay o tentasyon.

 “Walay tentasyon nga miabot kaninyo gawas nianang sagad sa mga tawo.” Ang mga magsisimba sa Diyos matental tingali sa pagbuhat ug butang nga makapaguol kaniya. Kini nga mga tentasyon, bisag lisod, dili talagsaon kay daghan nag nakaeksperyensiya niini. a Busa ang mga magsisimba sa Diyos makaseguro nga makaya pod nila ang maong mga tentasyon.

 “Ang Diyos kasaligan.” Si Jehova b nga Diyos kasaligan. Kanunay na niyang gituman ang iyang saad nga dili niya biyaan kadtong nahigugma kaniya ug nagpabiling maunongon ug matinumanon kaniya. (Deuteronomio 7:9; Salmo 9:10; 37:28) Busa kadtong nagsimba kaniya makasalig nga iya pong tumanon ang duha ka makapadasig nga saad nga naa niini nga bersikulo.

 “Dili niya itugot nga tentalon mo nga labaw sa inyong maantos.” Gipakita sa Diyos nga kasaligan siya kay dili niya tugotan nga mograbe pag-ayo ang pagsulay nga dili na maantos sa usa ka tawo. Nahibalo siya sa limitasyon sa tanan niyang magsisimba.—Salmo 94:14.

 “Uban sa tentasyon siya magtaganag kalingkawasan aron makalahutay mo niini.” Ang Diyos makawagtang sa pagsulay o makahatag ug tabang sa iyang mga magsisimba aron makalahutay. Pananglitan, makahatag siyag giya pinaagi sa balaang espiritu, paghupay gikan sa Bibliya, o praktikal nga tabang gikan sa mga isigkamagtutuo.—Juan 14:26; 2 Corinto 1:3, 4; Colosas 4:11.

 Kini nga bersikulo makita sa sulat ni apostol Pablo ngadto sa Kristohanong kongregasyon sa Corinto. Niini nga sulat, gigamit ni Pablo ang kasaysayan sa karaang Israel ingong pasidaan sa mga taga-Corinto. (1 Corinto 10:11) Gihisgotan ni Pablo ang mga pagsulay ug tentasyon nga naatubang sa mga Israelinhon, apil niana ang idolatriya ug seksuwal nga imoralidad. (1 Corinto 10:6-10) Ang uban kanila nagpadala sa tentasyon. Base sa nahitabo sa mga Israelinhon, gipahinumdoman ni Pablo ang mga Kristohanon nga dili sila angayng magkompiyansa ug maghunahuna nga dili gyod sila matental. (1 Corinto 10:12) Pero ang iyang giingon sa 1 Corinto 10:13 nagpasalig kanila nga ang maunongong mga magsisimba sa Diyos malamposong makaatubang sa bisan unsang pagsulay.

 Tan-awa kining mubo nga video nga nagsumaryo sa basahon sa 1 Corinto.