“Igo na kanimo ang akong dili hitupngang pagkamaayo, kay mas kusgan ang akong gahom dihang huyang ka.”—2 Corinto 12:9, Bag-ong Kalibotang Hubad.

 “Ang akong tabang mao lang ang imong gikinahanglan. Kay makita gayod ang akong gahom diha sa imong kaluyahon.”—2 Corinto 12:9, Ang Pulong sa Dios.

 Ang Diyos nagsaad nga Iyang ihatag kang apostol Pablo ang kusog nga iyang gikinahanglan aron malahutay ang mga pagsulay ug molampos bisan pa sa iyang mga limitasyon.

 “Igo na kanimo ang akong dili hitupngang pagkamaayo.” Ang tubag sa Diyos sa kanunayng ginaampo ni Pablo puwede sab hubaron nga “ang akong pagkamaayo mao lang ang imong gikinahanglan.” Sa ato pa, ang dili hitupngang pagkamaayo sa Diyos igo na aron makalahutay si Pablo sa mga pagsulay. Ngano? Ang pulong nga gihubad ug “dili hitupngang pagkamaayo” o “tabang” nagpaila sa walay bayad nga gasa nga dagayang gihatag sa Diyos. Gipakita sa mga sulat ni Pablo nga nakabenepisyo siya pag-ayo sa dili hitupngang pagkamaayo sa Diyos. Bisag magsusupak si Pablo kaniadto, gihatagan siya sa Diyos ug kusog nga iyang gikinahanglan aron mausab ang iyang kinaiya ug matabangan ang uban nga mahimong Kristohanon. (1 Corinto 15:9, 10; 1 Timoteo 1:12-14) Busa, makasalig gyod si Pablo sa tabang sa Diyos aron malahutay ang bisan unsang problema o pagsulay nga iyang maatubang.

 “Kay mas kusgan ang akong gahom dihang huyang ka.” Ang Ginoong Jehova a nagpahinumdom kang Pablo nga ang Iyang gahom mas makita dihang Iya kining gamiton sa pagtabang sa huyang ug dili hingpit nga mga tawo. (2 Corinto 4:7; 12:8) Dihang ilhon sa mga Kristohanon ang ilang limitasyon ug mangayog tabang kang Jehova, gitugotan nila ang gahom sa Diyos nga motabang gyod kanila. (Efeso 3:16; Filipos 4:13) Busa, ang gahom sa Diyos makita nga nagalihok diha sa tawong huyang.

 Niadtong mga 55 C.E., si Pablo misulat sa mga Kristohanon sa Corinto. Sa ulahing bahin sa maong sulat, iyang gidepensahan ang iyang awtoridad ingong apostol. Kinahanglan niya ning himoon kay ang nangangkong mga magtutudlo nanaway ug nanghukom niya, tingali tungod sa iyang hitsura o paagi sa pagsulti.—2 Corinto 10:7-10; 11:5, 6, 13; 12:11.

 Sa iyang depensa, gipatin-aw ni Pablo nga dili tungod sa iyang kaugalingong kusog nga milampos siya sa iyang ministeryo ug milahutay sa daghang pagsulay. (2 Corinto 6:4; 11:23-27; 12:12) Sa kapitulo 12, siya naghisgot ug “tunok sa unod,” tingali usa ka problema nga maoy hinungdan sa iyang pisikal o emosyonal nga kasakit. (2 Corinto 12:7) Bisag wala espesipikong hisgoti ni Pablo ang iyang problema, determinado siyang molahutay sa tabang sa Diyos.

 Ang mga Kristohanon karon posible pong makaatubang ug mga kalisdanan ug paglutos. Nahupayan sila sa pagkahibalo nga ang gahom sa Diyos motabang nila nga makaya ang bisan unsang pagsulay nga posible nilang masinatian. Sama kang Pablo, sila pod makaingon: “Dihang huyang ko, gamhanan hinuon ko.”—2 Corinto 12:10.

 Tan-awa kining mubo nga video nga nagsumaryo sa basahon sa 2 Corinto.