“Makadawat mog gahom dihang mokunsad kaninyo ang balaang espiritu, ug kamo mahimong akong mga saksi sa Jerusalem, sa tibuok Judea ug Samaria, ug hangtod sa kinalay-ang bahin sa yuta.”—Buhat 1:8, Bag-ong Kalibotang Hubad.

 “Apan makadawat kamo ug gahom sa diha nga mokunsad na kaninyo ang Espiritu Santo ug kamo mao unya ang akong mga saksi sa Jerusalem ug sa tibuok Judea ug Samaria ug hangtod sa kinatumyan sa kalibotan.”—Mga Buhat 1:8, Ang Biblia 2011.

 Si Jesus nagsaad sa iyang mga sumusunod nga makadawat silag gahom sa balaang espiritu sa Diyos aron matuman nila ang ilang ministeryo sa kinalay-ang bahin sa kalibotan.

 “Makadawat mog gahom dihang mokunsad kaninyo ang balaang espiritu.” Gisulti pag-usab ni Jesus ang iyang saad ngadto sa iyang mga tinun-an nga makadawat silag tabang sa espiritu sa Diyos a inigbalik niya sa langit. (Juan 14:16, 26) Napulo ka adlaw human misaka si Jesus sa langit sa tuig 33 C.E., ang iyang mga sumusunod nakadawat sa gisaad nga balaang espiritu. (Buhat 2:1-4) Ang balaang espiritu sa Diyos wala lang magtabang nila nga makasulti silag lainlaing pinulongan ug makahimog mga milagro. Nakahatag pod ni nilag kaisog nga mosangyaw bahin kang Jesus.—Buhat 3:1-8; 4:33; 6:8-10; 14:3, 8-10.

 “Kamo mahimong akong mga saksi.” Ang pulong nga gihubad ug “saksi” nagpasabot ug “usa nga motestigo” o “mopamatuod sa usa ka butang” base sa iyang nakita o naeksperyensiyahan. Kay nakasaksi sa kinabuhi ni Jesus, ang mga apostoles makapamatuod sa mga hitabo panahon sa iyang ministeryo apil ang iyang kamatayon ug pagkabanhaw. (Buhat 2:32; 3:15; 5:32; 10:39) Ang ilang lig-ong pagpamatuod nagkombinsir sa daghan nga si Jesus ang Kristo, ang gisaad nga Mesiyas. (Buhat 2:32-36, 41) Kadtong mituo sa mga apostoles nahimong mga saksi ni Jesus, ug ingong resulta, gisangyaw nila sa uban ang kahulogan sa kinabuhi, kamatayon, ug pagkabanhaw ni Jesus.—Buhat 17:2, 3; 18:5.

 “Hangtod sa kinalay-ang bahin sa yuta.” Kini nga ekspresyon puwede sab hubaron ug “hangtod sa kinatumyan sa yuta” o “ngadto sa ubang mga nasod.” Gipakita sa mga pulong ni Jesus kon unsa ka layo ang maabot sa iyang mga sumusunod sa pagpamatuod bahin kaniya. Dili lang sa Judea ug Samaria nga makapamatuod sila bahin sa ilang gituohan. Sa pagkatinuod, mas dako ang ilang makobrehan nga teritoryo ug mas daghan ang ilang masangyawan kay sa kang Jesus. (Mateo 28:19; Juan 14:12) Wala pay 30 ka tuig human gisulti ni Jesus kining mga pulonga, si apostol Pablo misulat nga ang maayong balita bahin kang Jesus “gisangyaw [na] sa tibuok kalibotan,” bisan sa lagyong mga lugar sama sa Roma, Partia (habagatan-sidlakan sa Dagat Caspian), ug North Africa.—Colosas 1:23; Buhat 2:5, 9-11.

 Ang basahon sa Buhat gisugdan pinaagi sa paghisgot sa parehas nga mga hitabo nga narekord sa kataposang bahin sa Ebanghelyo ni Lucas. (Lucas 24:44-49; Buhat 1:4, 5) Gisugdan ni Lucas pagsulat kini nga basahon pinaagi sa paghisgot kon sa unsang paagi nagpakita si Jesus sa iyang mga sumusunod human sa iyang pagkabanhaw. (Buhat 1:1-3) Dayon gisulat pod niya kon sa unsang paagi nagsugod ang Kristohanong kongregasyon ug kon sa unsang paagi ni miuswag sulod sa 33 C.E. hangtod sa mga 61 C.E.—Buhat 11:26.

 Ang konteksto sa Buhat 1:8 nagpakita nga ang mga sumusunod ni Jesus naghunahuna kon magsugod ba siya sa pagmando ingong Hari sa Gingharian sa Diyos sa ilang panahon. (Buhat 1:6) Pero giingnan sila ni Jesus nga dili sobrang mabalaka kon kanus-a matukod ang Gingharian. (Buhat 1:7) Hinuon, ang iyang mga sumusunod kinahanglang magpokus sa pagpamatuod bahin kang Jesus “hangtod sa kinalay-ang bahin sa yuta.” (Buhat 1:8) Mao sab nay gibuhat sa mga Kristohanon karon, sila madasigong nagsangyaw sa maayong balita bahin sa Gingharian sa Diyos.—Mateo 24:14.

 Tan-awa kining mubo nga video nga nagsumaryo sa basahon sa Buhat.