“Naa koy kusog sa pag-atubang sa tanang butang tungod kaniya nga naghatag nakog gahom.”—Filipos 4:13, Bag-ong Kalibotang Hubad.

 “May kalig-on ako sa pagsagubang sa tanan tungod sa gahom nga gihatag kanako ni Cristo.”—Filipos 4:13, Ang Bag-ong Maayong Balita Biblia.

 Kining mga pulonga, nga gisulat ni apostol Pablo, nagpasalig niadtong mga nagsimba sa Diyos nga makadawat silag gahom sa pagtuman sa Iyang kabubut-on.

 Ang ubang hubad sa Bibliya nag-ingon nga ang Kristo mao ang naghatag ug gahom kang Pablo. Pero niini nga teksto, ang pulong nga “Kristo” dili makita sa labing karaang Gregong mga manuskrito. Busa, daghang modernong hubad ang naggamit sa mga pulong sama sa “kaniya nga naghatag nakog gahom” (Bag-ong Kalibotang Hubad), “kaniya nga naglig-on kanako” (Ang Biblia), ug “kaniya nga nagapalig-on kanako” (Ang Balaan Nga Kasulatan). Busa kinsay gitumong ni Pablo dinhi?

 Ang konteksto nagpaila nga ang gitumong ni Pablo mao ang Diyos. (Filipos 4:6, 7, 10) Sa nag-unang bahin sa mao rang sulat, si Pablo miingon sa mga taga-Filipos: ‘Ang Diyos nagpalig-on sa inyong tinguha sa pagbuhat sa mga butang nga gusto niya.’ (Filipos 2:13) Ug sa 2 Corinto 4:7, siya misulat nga ang Diyos mao ang naghatag niyag gahom sa pagtuman sa iyang ministeryo. (Itandi ang 2 Timoteo 1:8.) Busa, makataronganon lang nga mohinapos ta nga ang Diyos mao ang gitumong ni Pablo nga ‘naghatag niyag gahom.’

 Unsay gipasabot ni Pablo dihang misulat siya nga makadawat siyag kusog sa pag-atubang sa “tanang butang”? Ang mga butang nga gihisgotan ni Pablo dayag nga nagtumong sa lainlaing kahimtang nga iyang naatubang sa pagbuhat sa kabubut-on sa Diyos. Daghan man o diyutay ang iyang nabatonan sa materyal, misalig siya nga atimanon siya sa Diyos. Busa si Pablo nakakat-on nga magmakontento bisan unsay iyang kahimtang.—2 Corinto 11:23-27; Filipos 4:11.

 Ang giingon ni Pablo makapalig-on sa mga magsisimba sa Diyos karon. Hatagan sila sa Diyos ug kusog nga ilang gikinahanglan sa paglahutay sa mga pagsulay ug sa pagbuhat sa iyang kabubut-on. Hatagan sila sa Diyos ug gahom pinaagi sa iyang balaang espiritu, o aktibong puwersa, ug pinaagi sa ilang mga isigkamagsisimba ug sa iyang Pulong, ang Bibliya.—Lucas 11:13; Buhat 14:21, 22; Hebreohanon 4:12.

 Kini nga mga pulong maoy bahin sa konklusyon sa sulat ni Pablo ngadto sa mga Kristohanon sa Filipos. Iya kining gisulat niadtong mga 60-61 C.E., panahon sa iyang unang pagkapriso sa Roma. Dihay mga panahon nga ang mga Kristohanon sa Filipos wala makasuportar sa materyal nga panginahanglan ni apostol Pablo. Pero niining higayona, nagapadala silag mga gasa kang Pablo sa pagsuportar sa iyang mga panginahanglan.—Filipos 4:10, 14.

 Mahigugmaong gikomendahan ni Pablo ang mga Kristohanon sa Filipos tungod sa ilang pagkamahinatagon ug gipasaligan sila nga nabatonan ra niya ang iyang mga panginahanglan. (Filipos 4:18) Gipahimuslan sab niya ang kahigayonan sa pagpaambit kanila sa usa ka sekreto sa Kristohanong pagkinabuhi: Ang tanang Kristohanon, dato man o pobre, mahimong kontento kon mosalig sila sa tabang sa Diyos.—Filipos 4:12.