“Apan kadtong mga nagalaom kang Jehova maulian sa kusog. Sila manglupad pataas nga daw may mga pako sa agila. Sila managan ug dili mangaluya; sila manglakaw ug dili kapoyon.”—Isaias 40:31, Bag-ong Kalibotang Hubad.

 “Apan kadtong mosalig sa GINOO makabaton ug bag-ong kusog; manglupad sila daw agila, managan sila ug dili kapuyan, manlakaw ug dili maluya.”—Isaias 40:31, Ang Bag-ong Maayong Balita Biblia.

 Gipasaligan ni Jehova a nga Diyos ang iyang mga magsisimba nga hatagan niya silag kusog nga gikinahanglan sa pagdaog o paglahutay sa bisan unsang problema nga ilang maatubang.

 “Kadtong mga nagalaom kang Jehova maulian sa kusog.” Kadtong nagalaom, o nagasalig, sa katakos ug kaandam sa Diyos sa pagtabang sa iyang katawhan makaseguro nga iya silang paluyohan. (Proverbio 3:5, 6) Ang usa ka paagi nga ang Diyos naghatag ug kusog niadtong nagsimba kaniya mao ang paghatag niya kanila sa iyang balaang espiritu, o aktibong puwersa.—Lucas 11:13.

 “Sila manglupad pataas nga daw may mga pako sa agila.” Kini nga paghulagway nagpakita sa epekto sa gahom sa Diyos diha sa usa ka tawo. Ang usa ka agila makalupadlupad sa tabang sa nagasakang init nga hangin nga gitawag ug thermal. Dihang ang agila makamatikod ug thermal, bukharon niini ang iyang mga pako ug mag-utaw-utaw diha sa thermal, ug ang agila anam-anam nga masaka. Pinaagi sa pagbalhinbalhin sa lainlaing thermal, ang mga agila makalupadlupad sulod sa daghang oras nga dili ra kaayo mogamit ug enerhiya.

 “Sila managan ug dili mangaluya.” Tungod sa mga problema sa kinabuhi mahimong maluya ta sa pisikal ug emosyonal, pero makalahutay ta pinaagi sa gahom nga ihatag sa Diyos kanato. Kini makahatag natog kusog sa paghimo kon unsay husto bisan sa grabeng mga kalisdanan. Si apostol Pablo, kinsa nakalahutay sa grabeng mga pagsulay, misulat: “Naa koy kusog sa pag-atubang sa tanang butang tungod kaniya nga naghatag nakog gahom.”—Filipos 4:13.

 Gigiyahan sa Diyos si propetang Isaias sa pagsulat niini nga mga pulong niadtong ikawalong siglo B.C.E. Bisag kini nga teksto mapadapat sa tanang matinumanong mga alagad sa Diyos, lagmit kini nga mga pulong gipasulat ni Jehova aron dasigon ang mga Hudiyo nga mabihag sa Babilonya sulod sa 70 ka tuig. Pagbalik sa mga Hudiyo sa ilang yutang natawhan gikan sa maong pagkabihag, nakita nila nga natuman ang mga pulong sa Diyos. (Isaias 40:1-3) Gihatagan sila sa Diyos ug kusog alang sa ilang layo ug lisod nga panaw b gikan sa Babilonya ngadto sa Jerusalem niadtong 537 B.C.E.—Isaias 40:29.