“Busa usbon nako ang akong sugo, ‘Magmaisogon ka ug magmalig-on. Ayawg kalisang o kahadlok, kay si Jehova nga imong Diyos magauban kanimo bisan asa ka moadto.’”—Josue 1:9, Bag-ong Kalibotang Hubad.

 “Hinumdomi ang akong sugo nga magmalig-on ka ug magmaisogon! Ayaw kahadlok o kaluya tungod kay ako, ang GINOO nga imong Dios, mag-uban kanimo bisan asa ka.”—Josue 1:9, Ang Bag-ong Maayong Balita Biblia.

 Niining mga pulonga, gipasaligan ni Jehova a nga Diyos ang iyang matinumanong magsisimba nga si Josue nga siya mahimong ‘maisogon ug lig-on’ bisan pa sa lisod nga mga kahimtang ug dagkong pagsulay. Kon sundon ni Josue ang mga sugo sa Diyos, wala siyay rason nga mahadlok kay samag kauban niya si Jehova aron tabangan siyang molampos. Ang Diyos nagauban kang Josue pinaagi sa pagtudlo kaniya ug paghatag niyag kadaogan batok sa iyang mga kaaway.

 Sa unsang paagi si Josue mahimong ‘maisogon ug lig-on’? Siya makabatog kaisog ug kusog pinaagi sa balaang mga sinulat nga gitagana ni Jehova niadtong panahona. Apil niini ‘ang tibuok Balaod nga gihatag ni Moises’ kang Josue. b (Josue 1:7) Si Jehova nagsugo kang Josue: “Angay nimo kining basahon sa hinay nga tingog [“Pamalandongi kini,” Ang Pulong sa Dios] adlaw ug gabii.” (Josue 1:8, footnote) Ang pagbasa ug pagpamalandong nakatabang kang Josue nga maandam ang iyang hunahuna ug kasingkasing sa pagbuhat sa kabubut-on sa Diyos. Ug kinahanglang molihok si Josue sumala sa iyang nakat-onan sa Pulong sa Diyos, aron ‘matuman niya ang tanang nasulat niini.’ Kon iya kanang himoon, siya molihok nga maalamon ug magmalamposon. Ug mao gyod nay nahitabo. Bisan pag nag-atubang ug mga kalisdanan, si Josue mibatig kalipay ug katagbawan ingong matinumanong alagad ni Jehova.—Josue 23:14; 24:15.

 Ang gisulti ni Jehova kang Josue makapadasig gihapon kanato karon. Gipakita niini nga gimahal pag-ayo ni Jehova ang tanan niyang magsisimba, ilabina dihang mag-atubang silag mga pagsulay. Gusto niyang magmalamposon sab sila sama kang Josue! Ug sama kang Josue, sila mahimong ‘maisogon ug lig-on’ pinaagi sa regular nga pagbasa ug pagpamalandong sa Pulong sa Diyos, ang Bibliya, ug pagsunod sa giya niini.

 Human mamatay si Moises, si Jehova nagsugo kang Josue sa pagpanguna sa nasod sa Israel. (Josue 1:1, 2) Niadtong panahona, ang mga Israelinhon nangandam na sa pagsulod sa Yutang Saad, ang yuta sa Canaan. Pero kinahanglan nilang atubangon ang gamhanang mga kaaway. Pananglitan, kinahanglang makiggubat si Josue sa mga Canaanhon, kinsa grabe ka daotan. c (Deuteronomio 9:5; 20:17, 18) Ang mga Canaanhon sab mas daghan ug mas maayog hinagiban kay sa mga Israelinhon. (Josue 9:1, 2; 17:18) Pero maisogong gisunod ni Josue ang mga instruksiyon ni Jehova. Ug ang Diyos nag-uban gyod kaniya, kay napildi sa mga Israelinhon ang kadaghanan sa ilang mga kaaway sulod lang sa unom ka tuig.—Josue 21:43, 44.