“Gisulti nako kini kaninyo aron nga pinaagi kanako makabaton mog kalinaw. Sa kalibotan makaagom mog kasakitan, apan magmalig-on kamo! Gidaog na nako ang kalibotan.”—Juan 16:33, Bag-ong Kalibotang Hubad.

 “Gisulti nako kini kaninyo aron nga dinhi kanako makabaton kamo ug kalinaw. Dinhi sa kalibotan aduna kamoy kalisdanan. Apan pagmadasigon, gibuntog na nako ang kalibotan.”—Juan 16:33, Ang Biblia 2011.

 Niini nga mga pulong, mahigugmaong gipasaligan ni Jesus ang iyang mga sumusunod nga molampos sab sila sa paglipay sa Diyos bisan pa sa mga pagsulay ug pagsupak.

 “Gisulti nako kini kaninyo aron nga pinaagi kanako a makabaton mog kalinaw.” Ang teksto nagpakita nga kini nga kalinaw wala magpasabot nga walay panag-away. Hinunoa, kini maoy kalinaw sa kasingkasing ug hunahuna. Kini nga kalinaw naposible “pinaagi” kang Jesus, kinsa misaad nga ang iyang mga tinun-an makadawat sa balaang espiritu. Kining gamhanang “magtatabang” magpaposible nga molampos sila sa pag-atubang sa bisan unsang kalisdanan.—Juan 14:16, 26, 27.

 “Sa kalibotan makaagom mog kasakitan, apan magmalig-on kamo!” Matinud-anong giingnan ni Jesus ang iyang mga tinun-an nga makaatubang silag mga pagsulay, sama sa inhustisya ug paglutos. (Mateo 24:9; 2 Timoteo 3:12) Bisan pa niana, duna silay rason nga “magmalig-on,” o ‘dili mahadlok.’—Juan 16:33, Maayong Balita Biblia.

 “Gidaog na nako ang kalibotan.” Dinhi, ang pulong nga “kalibotan” nagtumong sa dili matarong nga katilingban sa mga tawo nga nahimulag sa Diyos. b Ang 1 Juan 5:19 nag-ingon: “Ang tibuok kalibotan nailalom sa gahom sa usa nga daotan,” si Satanas. Busa, ang panghunahuna ug binuhatan sa mga tawo niini nga “kalibotan” supak sa kabubut-on sa Diyos.—1 Juan 2:15-17.

 Si Satanas ug ang iyang kalibotan misulay sa pagpugong kang Jesus sa pagbuhat sa kabubut-on sa Diyos, nga naglakip sa pagtudlo ni Jesus sa uban bahin sa Diyos ug sa paghatag sa iyang hingpit nga kinabuhi ingong lukat. (Mateo 20:28; Lucas 4:13; Juan 18:37) Pero wala tugoti ni Jesus ang kalibotan sa pag-impluwensiya sa iyang panghunahuna ug sa pagpatalikod kaniya sa Diyos. Nagpabilin siyang matinumanon bisan hangtod sa kamatayon. Busa, nakaingon si Jesus nga gidaog na niya ang kalibotan ug nga si Satanas, ang “magmamando niining kalibotana,” ‘wala makaimpluwensiya’ kaniya.—Juan 14:30.

 Gigamit ni Jesus ang iya mismong panig-ingnan aron ipakita sa iyang mga sumusunod nga sila sab makapabiling matinumanon sa Diyos bisan pag masulayan ang ilang integridad. Mora bag miingon si Jesus: “Kon nadaog nako ang kalibotan, madaog sab ninyo kini.”

 Si Jesus miingon niining mga pulonga sa gabii una siya mamatay. Kay nahibalo nga hapit na siyang mamatay, iyang gigamit ang kahigayonan sa paghatag ug pipila ka pangataposang tambag sa iyang matinumanong mga apostoles. Iyang gilakip ang pipila ka importanteng mga kamatuoran: Dili na sila makakita kaniya, ug sila lutoson, o patyon pa gani. (Juan 15:20; 16:2, 10) Kay kini posibleng makapahadlok sa iyang mga apostoles, giingon ni Jesus ang mga pulong sa Juan 16:33 aron dasigon ug pasaligan sila.

 Ang mga pulong ug panig-ingnan ni Jesus makadasig sab sa iyang mga sumusunod karon. Ang tanang Kristohanon makapabiling matinumanon sa Diyos bisan pa sa mga kalisdanan.