“Kay gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.”​—Juan 3:16, Bag-ong Kalibotang Hubad.

 “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon.”​—Juan 3:16, Maayong Balita Biblia.

 Gimahal ta sa Diyos ug gusto niya nga mabuhi ta sa walay kataposan. Tungod niana gipadala niya ang iyang Anak, si Jesu-Kristo, dinhi sa yuta. Samtang nia sa yuta, daghag nalampos si Jesus. Gitudloan niya ang iyang mga sumusunod bahin sa iyang Diyos ug Amahan. (1 Pedro 1:3) Gihatag sab niya ang iyang kinabuhi para sa mga tawo. Aron makabaton ug kinabuhing walay kataposan, kinahanglan tang motuo kang Jesus.

 Ang dakong gugma sa Diyos makita diha sa ekspresyong “gihatag niya ang iyang bugtong nga Anak.” a Si Jesus walay sama. Sa unsang paagi? Si Jesus lang ang direktang gibuhat o gilalang sa Diyos. (Colosas 1:17) Siya “ang panganay sa tanang kalalangan.” (Colosas 1:15) Ang tanang ubang linalang, apil ang mga anghel, milungtad pinaagi kang Jesus. Pero bisan pa niana, kinabubut-ong gipadala ni Jehova b nga Diyos ang iyang pinanggang Anak “aron sa pag-alagad ug sa paghatag sa iyang kinabuhi ingong lukat baylo sa daghan.” (Mateo 20:28) Si Jesus nag-antos ug namatay aron makagawas ta sa sala ug kamatayon, nga napanunod nato sa unang tawo, si Adan.​—Roma 5:8, 12.

 Ang pagpakitag pagtuo kang Jesus dili lang kay basta pagtuo kaniya o pag-ila sa iyang mga nahimo para kanato. Ipakita nato ang atong pagtuo sa Anak sa Diyos pinaagi sa pagsunod kaniya ug pagsundog sa iyang panig-ingnan. (Mateo 7:24-27; 1 Pedro 2:21) Ang Bibliya nag-ingon: “Siya nga magpakitag pagtuo sa Anak makabaton ug kinabuhing walay kataposan; siya nga mosupak sa Anak dili makabaton ug kinabuhi.”​—Juan 3:36.

 Gisulti kini ni Jesus dihang nakig-estorya siya kang Nicodemo, usa ka relihiyosong lider sa mga Hudiyo. (Juan 3:1, 2) Sa ilang panag-estoryahay, si Jesus naghatag ug mga detalye bahin sa Gingharian sa Diyos c ug sa pagkahimong “ipanganak pag-usab.” (Juan 3:3) Gisulti sab niya daan kon sa unsang paagi siya mamatay. “Kinahanglang iisa usab ang Anak sa tawo aron ang tanan nga nagtuo kaniya makabaton ug kinabuhing walay kataposan.” (Juan 3:14, 15) Dayon iyang gipasiugda nga ang kinabuhing walay kataposan naposible tungod sa dakong gugma sa Diyos sa mga tawo. Gitapos ni Jesus ang ilang panag-estoryahay pinaagi sa pagsaysay nga aron maangkon ang kinabuhi, kinahanglan tang magpakitag pagtuo ug mohimog mga buhat nga makapalipay sa Diyos.​—Juan 3:17-21.