“Kay walay isulti ang Diyos nga dili niya matuman.”—Lucas 1:37, Bag-ong Kalibotang Hubad.

 “Kay walay butang nga dili mahimo sa Dios.”—Lucas 1:37, Ang Biblia—Bag-ong Hubad Nga Binisaya.

 Ang Labing Gamhanang Diyos makahimo sa mga butang nga imposible sa panglantaw sa tawo. Walay makapugong niya sa pagtuman sa iyang mga saad o isulti.

 Kay kanunayng tumanon ni Jehova a nga Diyos ang iyang isulti, ang orihinal nga Gregong teksto sa Lucas 1:37 puwede sab hubaron nga “Kay ang mga saad sa Diyos dili gyod mapakyas” o “Kay sa Diyos, walay imposible.” Kini nga mga hubad nagpasiugda sa pangunang kamatuoran: Walay saad o isulti ang Diyos nga dili matuman, kay walay imposible para niya.—Isaias 55:10, 11.

 Dunay susamang mga ekspresyon bahin sa mga saad sa Diyos nga mabasa diha sa Bibliya. Pananglitan, gitagna ni Jehova, pinaagi sa iyang anghel, nga ang walay anak nga asawa ni Abraham nga si Sara magmabdos bisag tigulang na siya. Ang Diyos midugang: “Duna bay imposible kang Jehova?” (Genesis 18:13, 14) Human mamalandong ang patriarkang si Job bahin sa kalalangan sa Diyos siya miingon: “Ang tanan nga gihunahuna nimong buhaton, imo gayong mahimo.” (Job 42:2) Ug sa dihang nagduhaduha ang mga sumusunod ni Jesus kon maabot ba nila ang mga sukdanan sa Diyos alang sa kaluwasan, gipahinumdoman sila ni Jesus nga “sa Diyos ang tanang butang posible.”—Mateo 19:25, 26. b

 Ang anghel nga si Gabriel misulti sa mga pulong sa Lucas 1:37 ngadto sa batan-ong Hudiyo nga ulay nga si Maria. Bag-o lang siyang gisultihan ni Gabriel nga manganak siya sa “Anak sa Labing Hataas” ug ang bata iyang ‘nganlan ug Jesus.’ Si Jesus ang mahimong Hari sa Gingharian sa Diyos, nga magmando sa walay kataposan.—Lucas 1:26-33; Pinadayag 11:15.

 Nangutana si Maria kon sa unsang paagi na mahitabo nga dili man siya minyo ug “wala man [siya] makigdulog ug lalaki.” (Lucas 1:34, 35) Miingon si Gabriel nga gamiton sa Diyos ang Iyang balaang espiritu, o aktibong puwersa. Nianang panahona, si Jesus usa ka espiritung anak sa Diyos didto sa langit. Busa gigamit ni Jehova ang iyang balaang espiritu aron ibalhin ang kinabuhi sa iyang anak gikan sa langit ngadto sa tagoangkan ni Maria. (Juan 1:14; Filipos 2:5-7) Tungod niana, si Maria milagrosong nagmabdos. Aron palig-onon ang iyang pagtuo sa gahom sa Diyos, giingnan siya sa anghel nga ang iyang paryente nga si Elisabet nagmabdos ug batang lalaki “bisag tigulang na” kini. Si Elisabet ug ang iyang bana nga si Zacarias walay anak kay si Elisabet baog. (Lucas 1:36) Ang ilang anak nahimong Juan nga Tigbawtismo, ug ang iyang ministeryo gitagna sab ni Jehova.—Lucas 1:10-16; 3:1-6.

 Dayon gisulti sa anghel nga si Gabriel ang mga pulong sa Lucas 1:37, nga lagmit naghunahuna bahin kang Maria ug Elisabet. Ang maong mga pulong nagpasalig sa mga magsisimba ni Jehova karon nga padayon niyang tumanon ang iyang mga saad. Kana naglakip sa iyang saad nga pulihan ang mga gobyerno sa tawo sa matarong nga pagmando sa iyang anak nga si Jesu-Kristo, ang Hari sa langitnong Gingharian sa Diyos.—Daniel 2:44; 7:13, 14.

 Tan-awa kining mubo nga video nga nagsumaryo sa basahon sa Lucas.