“Himayaon ang Diyos sa kahitas-an, ug sa yuta ang katawhan nga iyang giuyonan makabatog kalinaw.”—Lucas 2:14, Bag-ong Kalibotang Hubad.

 “Dalaygon ang Dios sa langit. May kalinaw na dinhi sa yuta, sa mga tawo nga iyang gikahimut-an!”—Lucas 2:14, Ang Pulong sa Dios.

 Kini nga mga pulong sa pagdayeg, nga gisulti sa mga anghel sa panahon nga natawo si Jesus, nagpakita nga kadtong naay pagtuo kang Jesus mahimong makabaton sa pag-uyon sa Diyos ug makaeksperyensiyag kalinaw.

 “Himayaon ang Diyos sa kahitas-an.” Pinaagi niini nga mga pulong, gipasiugda sa mga anghel nga ang Diyos takos modawat sa tanang himaya. Nagpasiugda pod ni nga ang pagkatawo ni Jesus ug ang iyang ministeryo makahatag ug dakong kahimayaan kang Jehova a nga Diyos. Pananglitan, sa pagpanudlo ni Jesus, kanunay niyang gihatag ang pagdayeg ngadto sa Diyos, sama dihang siya miingon: “Ang akong gitudlo dili akoa, kondili iya sa nagpadala kanako.” (Juan 7:16-18) Dihang si Jesus naghimog mga milagro, ang mga nakakita “naghimaya sa Diyos.” (Lucas 5:18, 24-26; Juan 5:19) Bisan ang kamatayon ni Jesus nakahatag ug kahimayaan sa Diyos. Gipaposible niini nga matuman sa Diyos ang iyang nindot kaayo nga katuyoan nga pun-on ang yuta ug mga tawo nga matarong ug mahigugmaon sa kalinaw.—Genesis 1:28.

 “May kalinaw na dinhi sa yuta.” Kini nga kalinaw wala lang magpasabot nga walay gubat, kondili naglakip ni sa kalinaw sa hunahuna nga mabatonan lang sa tawo nga may pag-uyon ni Jehova. Ug kining malinawong relasyon uban sa Diyos naposible tungod kang Jesus. (Santiago 4:8) Ingong Hari sa Gingharian sa Diyos, ipahinabo ni Jesus ang tinuod ug walay kataposang kalinaw sa tibuok yuta.—Salmo 37:11; Lucas 1:32, 33.

 “Katawhan nga iyang giuyonan.” Kini nga ekspresyon nagtumong sa katawhan nga giuyonan, o gipaboran, sa Diyos tungod sa ilang tinuod nga pagtuo kaniya ug sa usa nga iyang gipadala, si Jesus. Wala ni magtumong sa pagpakita sa Diyos ug pag-uyon ngadto sa tanang tawo bisan unsa pay ilang tinamdan ug binuhatan. Wala sab ni magtumong sa pag-uyon nga ginapakita sa mga tawo. Ang ubang hubad sa Bibliya, sama sa King James Version, naghubad niini nga ekspresyon ingong “pag-uyon ngadto sa mga tawo.” Pero ang mas karaan ug kasaligang Gregong mga manuskrito nagsuportar sa hubad sa Bag-ong Kalibotang Hubad ug daghang uban pang modernong hubad nga nagpakita sa ideya sa kalinaw sa katawhan nga giuyonan sa Diyos.—Tan-awa ang “ Lucas 2:14 sa Ubang Hubad.”

 Ang Lucas kapitulo 2 naghisgot sa unang mga tuig sa kinabuhi ni Jesus ingong tawo. Pagkatawo ni Jesus, dihay anghel nga nagpakita sa mga magbalantay sa karnero nga “nagpabilin sa gawas sa tibuok gabii, nga nagbantay sa ilang mga hayop.” b (Lucas 2:4-8) Usa ka “maayong balita nga makapalipay pag-ayo” ang gipahibalo sa anghel ngadto sa mga magbalantay sa karnero: “Karong adlawa natawo sa siyudad ni David ang inyong manluluwas, nga mao ang Kristo nga Ginoo.” (Lucas 2:9-11) Giingnan ang mga magbalantay sa karnero kon diin nila makita ang masuso, ug dayon nakita nila ang usa ka panon sa mga anghel nga nagdayeg sa Diyos. Pag-abot sa mga magbalantay sa karnero didto sa Betlehem, ilang nakita si Maria, Jose, ug ang masuso nga si Jesus. (Lucas 2:12-16) Human nila iasoy ang ilang makapahingangha nga kasinatian, ang mga magbalantay namalik sa ilang mga karnero ug sila “nagpasalamat ug nagdayeg sa Diyos tungod sa tanan nilang nadungog ug nakita.”—Lucas 2:17-20.

 “Dalaygon ang Dios sa kahitas-an, ug sa yuta panagdait sa mga tawo nga iyang gikahimut-an!”—Lucas 2:14, Ang Bag-ong Maayong Balita Biblia.

 “Himaya sa Dios sa kalangitan, ug sa yuta panagdait sa mga tawo nga iyang gikahimut-an.”—Lucas 2:14, Ang Balaan Nga Kasulatan.

 “Himaya sa Dios sa kahitas-an ug kalinaw sa yuta ngadto sa mga tawo nga iyang gikahimut-an.”—Lucas 2:14, Ang Biblia, NCV.

 Tan-awa kining mubo nga video nga nagsumaryo sa basahon sa Lucas.