“Ang gitakdang panahon miabot na, ug ang Gingharian sa Diyos duol na. Paghinulsol mo, ug pagbaton ug pagtuo sa maayong balita.”—Marcos 1:15, Bag-ong Kalibotang Hubad.

 “Karon na ang panahon. Ania na ang gingharian sa Diyos. Bag-oha ang inyong kinabuhi ug too sa Maayong Balita.”—Marcos 1:15, Biblia sa Kristohanong Katilingban.

 Si Jesu-Kristo miingon nga ang Gingharian sa Diyos a “ania na” o “duol na” kay siya, ingong umaabot nga Hari niana nga Gingharian, kauban nila niadtong tungora.

 Wala ipasabot ni Jesus nga nagsugod nag mando ang Gingharian niadtong panahona. Gani, sa ulahi gipakita niya sa iyang mga tinun-an nga sa umaabot pa ang Gingharian. (Buhat 1:6, 7) Bisan pa niana, miabot siya sa eksaktong tuig nga gitagna sa Bibliya nga motungha siya ingong ang umaabot nga Hari. b Maong si Jesus miingon: “Ang gitakdang panahon miabot na”​—ang panahon nga sugdan niya ang iyang ministeryo sa pagsangyaw sa maayong balita bahin sa Gingharian.—Lucas 4:16-21, 43.

 Aron makabenepisyo ang mga tawo sa maayong balita bahin sa Gingharian, kinahanglan silang maghinulsol, sa ato pa, magbasol sa ilang mga sala ug magkinabuhi uyon sa mga sukdanan sa Diyos. Gipakita sa mga tawong naghinulsol nga sila mituo sa maayong balita bahin sa umaabot nga Gingharian.

 Gisulti ni Jesus kining mga pulonga sa pagsugod sa iyang ministeryo sa Galilea. Ang susamang asoy sa Mateo 4:17 nag-ingon nga “sukad niadto,” si Jesus nagsangyaw bahin sa Gingharian sa Diyos. Ang Gingharian mao ang tema sa ministeryo ni Jesus. Gani, ang Gingharian gihisgotan sa kapig 100 ka beses sa upat ka Ebanghelyo c, nga sagad si Jesus ang nagsulti. Sa Bibliya, kadaghan hisgoti ni Jesus ang Gingharian sa Diyos kay sa ubang topiko.