“Itugyan kang Jehova bisan unsay imong ginahimo, ug ang imong mga plano molampos.”—Proverbio 16:3, Bag-ong Kalibotang Hubad.

 “Itugyan sa GINOO ang tanan mong buhaton ug magmalampuson ka.”—Panultihon (Proverbio) 16:3, Ang Pulong sa Dios.

 Kini nga panultihon nagpasalig niadtong nagsimba sa matuod nga Diyos nga ang ilang mga plano magmalamposon kon mosalig sila kaniya ug mosunod sa iyang giya.

 “Itugyan kang Jehova bisan unsay imong ginahimo.” Sa dili pa mohimog desisyon, ang mga magsisimba ni Jehova a mapainubsanong mangayo sa iyang giya. (Santiago 1:5) Ngano? Ang usa sa mga rason mao nga ang mga tawo wala kaayo o wala gyoy kontrol sa mga hitabo nga makaapektar sa ilang kinabuhi. (Ecclesiastes 9:11; Santiago 4:13-15) Gawas pa ana, basin kulang silag kaalam sa paghimo sa ilang mga giplano. Tungod niini nga mga rason, maalamong gitugyan, o gisalig, sa daghan ang ilang mga plano ngadto sa Diyos. Ila nang gihimo pinaagi sa pag-ampo alang sa giya ug sa paglihok uyon sa iyang kabubut-on sumala sa giingon sa iyang Pulong, ang Bibliya.—Proverbio 3:5, 6; 2 Timoteo 3:16, 17.

 Ang prase nga “itugyan sa GINOO b ang tanan mong buhaton” literal nga nagkahulogang “iligid ang imong mga buluhaton ngadto sa GINOO.” Sumala sa usa ka reperensiya, kini nga prase naghulagway sa “usa ka tawo nga nagbalhin sa iyang gipas-an ngadto sa usa nga mas kusgan kay kaniya.” Kadtong mapainubsanong mosalig sa Diyos makaseguro sa iyang tabang.—Salmo 37:5; 55:22.

 Ang prase nga “bisan unsay imong ginahimo” wala magpasabot nga uyonan o panalanginan sa Diyos ang tanang plano sa mga tawo. Aron panalanginan ni Jehova, ang ilang mga plano kinahanglang uyon sa iyang mga sukdanan ug kabubut-on. (Salmo 127:1; 1 Juan 5:14) Dili ta panalanginan sa Diyos kon mosupak ta niya. Gani, “ginapakyas niya ang mga plano sa mga daotan.” (Salmo 146:9) Pero iyang suportahan kadtong magpasakop niya kay ilang gisubay ang iyang mga sukdanan nga naa sa Bibliya.—Salmo 37:23.

 “Ug ang imong mga plano molampos.” Ang ubang hubad niini nag-ingon, “ang imong mga tuyo mamalig-on.” Sa Hebreohanong Kasulatan, o komon nga nailhang Daang Tugon, ang pulong nga gihubad nga “mamalig-on” dunay ideya sa pagpahimutang ug pundasyon, ug sagad nagtumong ni sa kalig-on sa mga butang nga gilalang sa Diyos. (Proverbio 3:19; Jeremias 10:12) Busa palig-onon, o palamposon, sa Diyos ang mga plano niadtong nagbuhat kon unsay husto sa iyang panan-aw, ug iya silang tabangan nga makabaton ug kinabuhi nga may kasegurohan ug malipayon.—Salmo 20:4; Proverbio 12:3.

 Kini nga panultihon gisulat ni Haring Solomon, nga maoy nagsulat sa kadaghanan sa basahon sa Proverbio. Nakasulti siyag linibo ka panultihon tungod sa iyang kaalam nga gikan sa Diyos.—1 Hari 4:29, 32; 10:23, 24.

 Gisugdan ni Solomon ang kapitulo 16 pinaagi sa pagdayeg sa kaalam sa Diyos ug sa pagpakita nga Iya gyong gidumtan ang mga garboso. (Proverbio 16:1-5) Dayon gipakita niini nga kapitulo ang importanteng kamatuoran nga balikbalik nga gihisgotan sa basahon sa Proverbio: Ang mga tawo tinuod lang nga magmaalamon ug magmalamposon kon sila magmapainubsanon ug magpagiya sa Diyos. (Proverbio 16:3, 6-8, 18-23) Kining simple nga kamatuoran balikbalik nga gihisgotan sa Bibliya.—Salmo 1:1-3; Isaias 26:3; Jeremias 17:7, 8; 1 Juan 3:22.

 Tan-awa kining mubo nga video nga nagsumaryo sa basahon sa Proverbio.