“Bansaya ang bata sa dalan nga angay niyang subayon; bisag matigulang na siya dili siya motipas gikan niini.”—Proverbio 22:6, Bag-ong Kalibotang Hubad.

 “Tudloi ang bata sa hustong gawi, ug mahinumdoman niya kini hangtod siya matigulang.”—Panultihon (Proverbio) 22:6, Ang Pulong sa Dios.

 Ang mga ginikanan nga nagtudlo sa ilang mga anak nga higugmaon ang Diyos ug tahoron ang iyang mga balaod makaseguro nga kini nga pagbansay makatabang sa ilang anak sa tibuok nilang kinabuhi.

 “Bansaya ang bata sa dalan nga angay niyang subayon.” Kini nga mga pulong puwede pod hubaron nga “sukad sa sinugdan pasubaya ang bata sa hustong dalan.” Sa basahon sa Proverbio, balikbalik nga gidasig ang mga ginikanan nga tudloan ang ilang anak kon unsay husto ug sayop samtang bata pa. (Proverbio 19:18; 22:15; 29:15) Pero ang mahigugmaong ginikanan nakasabot nga ang ilang anak, samag adulto, naay kagawasan sa pagpili. Busa imbes sultihan lang ang ilang anak kon unsay himoon, pasabton nila sila ug tabangan nga mahimong hamtong ug responsable nga mga adulto nga makahimog maayong mga desisyon sa ilang kaugalingon.—Deuteronomio 6:6, 7; Colosas 3:21.

 Ang ubang eskolar sa Bibliya nag-ingon nga kini nga ekspresyon nagpasabot nga “bansaya ang bata sumala sa iyang kinaiya,” o tendensiya. Kana nga interpretasyon tingali praktikal paminawon, pero ang Hebreohanong ekspresyon nga gihubad ug “sa dalan nga angay niyang subayon” posibleng nagtumong sa pagkinabuhi nga maayo ug matarong. Ang basahon sa Proverbio nagpasiugda sa duha ka dalan nga puwedeng subayon sa usa ka tawo. Ang usa gitawag nga “dalan sa maayong mga tawo,” “dalan sa kaalam,” ug ang “hustong dalan.” (Proverbio 2:20; 4:11; 23:19) Ug ang lain gitawag nga “dalan sa daotan,” “dalan sa buangbuang,” ug ang “daotang dalan.” (Proverbio 4:14; 12:15; 16:29) Ang dalan nga ‘angayng subayon’ sa bata nagtumong sa “hustong dalan”—ang dalan sa kinabuhi nga gitudlo sa Pulong sa Diyos, ang Bibliya.—Salmo 119:105.

 “Bisag matigulang na siya dili siya motipas gikan niini.” Kon tudloan sa mga ginikanan ang ilang anak sa moral nga mga sukdanan sa Diyos, mas magpabilin tingali siya sa hustong dalan sa tibuok niyang kinabuhi. Pero, wala ni magpasabot nga ang bata nga nakadawat ug hustong pagbansay dili gyod “motipas” sa hustong dalan o sa mga balaod sa Diyos. Pananglitan, kon ang usa makig-uban niadtong mga tawo nga daotan ug impluwensiya, mobiya tingali siya sa “matarong nga mga dalan” ug mohimog daotan. (Proverbio 2:12-16; 1 Corinto 15:33) Bisan pa niana, kon bansayon sa mga ginikanan ang ilang mga anak sa pagsunod sa mga sukdanan sa Diyos, ilang gihatagan sila sa kinamaayohang kahigayonan nga molampos sa kinabuhi.—Proverbio 2:1, 11.

 Ang Proverbio kapitulo 22 naay mga panultihon nga makatabang nato sa pagpadapat sa kaalam sa Diyos diha sa lainlaing situwasyon sa kinabuhi. Kini nga mga panultihon nagpasiugda sa kaimportante sa pagbaton ug maayong reputasyon atubangan ni Jehova, a nga mabatonan sa usa ka tawo kon siya mapainubsanon, mahinatagon, ug kugihan. (Proverbio 22:1, 4, 9, 29) Sa laing bahin, gipakita sa ubang mga bersikulo nga kadtong wala magsunod sa mga sukdanan sa Diyos ug nagdaogdaog sa mga pobre mag-antos sa dili maayong mga resulta.—Proverbio 22:8, 16, 22-27.

 Bisag ang kadaghanang bersikulo sa Proverbio kapitulo 22 wala magtumong sa pagbansay ug bata, gipakita niini ang dalan sa kinabuhi nga motultol sa pag-uyon sa Diyos ug tinuod nga kalipay. (Proverbio 22:17-19) Pinaagi sa pagbansay sa ilang anak nga mosubay niana nga dalan, mapakita sa mga ginikanan nga gusto nila nga mabatonan sa ilang mga anak ang kinamaayohang kinabuhi.—Efeso 6:1-3.

 Tan-awa ning mubo nga video nga naghatag ug sumaryo sa basahon sa Proverbio.