“Hunong na sa pagpaimpluwensiya niini nga sistema sa mga butang, kondili pag-usab mo pinaagi sa pagbag-o sa inyong hunahuna, aron mapamatud-an ninyo sa inyong kaugalingon ang maayo ug dalawaton ug hingpit nga kabubut-on sa Diyos.”—Roma 12:2, Bag-ong Kalibotang Hubad.

 “Ayawg sunod sa kalibotan diin nagpuyo mo. Hinunoa, usba ang inyong kaugalingon sa pagbag-o sa inyong hunahuna. Kinahanglang masayod mo sa kabubut-on sa Diyos, unsay maayo, unsay makapahimuot, unsay hingpit.”—Roma 12:2, Biblia sa Kristohanong Katilingban.

 Kadtong gustong mapalipay ang Diyos kinahanglang magsalikway sa negatibong mga impluwensiya ug magbag-o sa ilang personalidad. Dili sila pugson sa Diyos sa pagbag-o; himoon nila kini kay ilang gimahal ang Diyos ug nahibalo sila nga ang iyang mga sugo maayo, makataronganon, ug makahatag ug kaayohan.—Isaias 48:17.

 “Hunong na sa pagpaimpluwensiya niini nga sistema sa mga butang.” Ang “sistema sa mga butang,” nga mao ang kalibotan sa tawhanong katilingban, apil ang mga sukdanan, panggawi, ug kinaiya niini, wala magsunod sa mga prinsipyo o panghunahuna sa Diyos. (1 Juan 2:15-17) Kini kanunayng nagpresyur sa mga tawo nga mopahiuyon, ug busa, posibleng maumol niini ang ilang panggawi ug personalidad. Aron masimba ang Diyos sa dalawatong paagi, kinahanglang suklan sa usa ang impluwensiya sa kalibotan, kay kon dili, maugmad niya ang mga kinaiya nga makadaot sa iyang kaugalingon ug makapasuko sa Diyos.—Efeso 2:1-3; 4:17-19.

 “Pag-usab mo pinaagi sa pagbag-o sa inyong hunahuna.” Ang usa kinahanglan pong maningkamot sa pagbag-o sa iyang kinasulorang mga kinaiya ug pagbati. Dako ni nga kausaban kay ang Gregong pulong nga gihubad ug “pag-usab” nagtumong sa kausaban nga parehas nianang sa ulod ngadto sa alibangbang. Busa, kinahanglang isul-ob niadtong nagsimba sa Diyos ang “bag-ong personalidad.”—Efeso 4:23, 24; Colosas 3:9, 10.

 ‘Pamatud-i ninyo sa inyong kaugalingon ang maayo ug dalawaton ug hingpit nga kabubut-on sa Diyos.’ Gusto sa Diyos nga kadtong nagsimba kaniya kombinsido gyod sa ilang gituohan. Makombinsir sila pinaagi sa pagtuon sa Pulong sa Diyos ug pagpadapat sa giingon niini, ug sa dihang maeksperyensiyahan nila ang mga kaayohan sa pagkinabuhi sumala sa mga sukdanan sa Diyos. Busa, gipamatud-an nila sa ilang kaugalingon nga ang mga sukdanan sa Diyos mao ang kinamaayohan.—Salmo 34:8.

 Gipatin-aw sa Roma kapitulo 12 kon unsay nalakip sa paghatag sa Diyos ug dalawatong pagsimba. Kini nga pagsimba mag-apektar sa tanang bahin sa kinabuhi ug magtukmod sa usa sa paggamit sa iyang “gahom sa pagpangatarongan” imbes molihok pinasukad sa pagtuo nga walay basehanan o sa sayop nga pagbati. (Roma 12:1, 3) Kini nga kapitulo dunay praktikal nga tambag kon unsaon pagpakitag diyosnong mga hiyas, kon unsaon pagpakiglabot sa uban, ug kon unsay himoon dihang makasinatig dili maayong pagtratar.—Roma 12:9-21.