“Hinaot nga ang Diyos nga nagahatag ug paglaom magpuno sa inyong kasingkasing ug kalipay ug kalinaw tungod sa inyong pagsalig kaniya, aron molig-on pa gyod ang inyong paglaom pinaagi sa gahom sa balaang espiritu.”—Roma 15:13, Bag-ong Kalibotang Hubad.

 “Ang Dios sa paglaom magpuno unta kaninyo sa tumang kalipay ug kalinaw tungod sa inyong pagtuo, aron nga pinaagi sa gahom sa Espiritu Santo magmadagayaon kamo sa paglaom.”—Roma 15:13, Ang Biblia, 2011.

 Niining mga pulonga, si apostol Pablo nanghinaot nga pun-on sa Diyos ang iyang mga isigkamagtutuo ug “kalipay ug kalinaw.” Kining maayo nga mga hiyas konektado sa paglaom nga gihatag sa Diyos ug sa gahom sa balaang espiritu.

 Mahibaloan nato ang paglaom nga gihatag sa Diyos diha sa iyang Pulong, ang Bibliya. Ang Roma 15:4 nag-ingon nga “ang tanang gisulat kaniadto [diha sa Bibliya] gisulat aron tudloan ta, aron nga pinaagi sa atong paglahutay ug pinaagi sa paghupay gikan sa Balaang Kasulatan kita makabatog paglaom.” Gipadayag sa Bibliya ang saad sa Diyos nga sulbaron ang mga problema nga nakapalisod pag-ayo sa atong kinabuhi karon, sama sa kapobrehon, inhustisya, sakit, ug kamatayon. (Pinadayag 21:4) Pinaagi kang Jesu-Kristo, tumanon sa Diyos kini nga mga saad, maong makalaom gyod ta ug mas maayong kaugmaon.—Roma 15:12.

 “Molig-on pa gyod,” o “mag-awas-awas,” ang paglaom nga gihatag sa Diyos kanato kon mosalig ta Niya. Dihang mas mailhan nato siya, mas segurado ta nga kasaligan gyod siya. (Isaias 46:10; Tito 1:2) Tungod sa kasaligang paglaom nga gihatag sa Diyos, ang usa ka tawo mapuno gihapon sa kalipay ug kalinaw bisag nag-atubang ug mga kalisdanan.—Roma 12:12.

 Ang kalinaw, kalipay, ug paglaom konektado pod sa “balaang espiritu,” nga mao ang aktibong gahom sa Diyos. a Gigamit sa Diyos ang iyang balaang espiritu sa pagtuman sa iyang mga saad, nga naghatag natog paglaom. Ang balaang espiritu makatabang pod sa mga tawo sa pag-ugmad ug maayong mga hiyas, sama sa kalipay ug kalinaw.—Galacia 5:22.

 Ang basahon sa Roma maoy sulat para sa mga Kristohanon nga nagpuyo sa siyudad sa Roma. Ang pipila kanila Hudiyog kagikan, ug ang uban dili. Gidasig silang tanan ni Pablo nga maningkamot nga magkahiusa sa hunahuna ug buhat bisan pag lainlain silag kagikan ug kultura.—Roma 15:6.

 Gipahinumdoman ni Pablo ang mga Kristohanon sa Roma nga dugay nang gitagna sa Diyos nga ang mga tawo sa tanang kanasoran magkahiusa sa pagdayeg Kaniya. Aron pamatud-an kana, kaupat gikutlo ni Pablo ang Hebreohanong Kasulatan. b (Roma 15:9-12) Kini ang iyang punto: Uban sa mga Hudiyo, ang mga tawo sa tanang kanasoran makabenepisyo sa ministeryo sa Kristo. Ang paglaom nga gihatag sa Diyos sa mga Hudiyo ug sa mga dili Hudiyo parehas ra. Busa ang tanan sa kongregasyon sa Roma, bisag unsa pay ilang kagikan, gidahom nga ‘magdawat sa usag usa’ o mahigugmaong mag-abiabi sa usag usa.—Roma 15:7.