“Gipakita sa Diyos ang iyang gugma kanato sa pagkaagi nga, samtang kita makasasala pa, ang Kristo namatay para nato.”—Roma 5:8, Bag-ong Kalibotang Hubad.

“Ang Dios nagapasundayag sa iyang kaugalingong gugma alang kanato, nga, sa mga makasasala pa kita, si Cristo namatay tungod kanato.”—Roma 5:8, Ang Biblia, PBS.

Si Jehova a nga Diyos nagpakitag dakong gugma dihang gitugotan niya ang iyang Anak, si Jesu-Kristo, nga mamatay alang sa makasasalang katawhan. (Juan 3:16) Kay makasasala, ang mga tawo dunay tendensiya nga maghunahuna ug mobuhat ug mga butang nga supak sa matarong nga mga sukdanan sa Diyos. (Colosas 1:21, 22) Pero gipaposible sa Diyos nga mapasig-uli ta kaniya “pinaagi sa kamatayon sa iyang Anak.” (Roma 5:10) Tungod niana, duna tay kahigayonan nga makabatog suod nga relasyon sa Diyos karon ug kinabuhing walay kataposan sa umaabot.—Roma 5:11; 1 Juan 4:9, 10.

Gisulat ni apostol Pablo kining mga pulonga ngadto sa mga Kristohanon sa Roma. Sa kapitulo 5 sa iyang sulat sa mga taga-Roma, gipatin-aw ni Pablo kon nganong ang mga Kristohanon angayng maglipay ug magmasaligon sa ilang paglaom. (Roma 5:1, 2) Kana nga paglaom “dili moresultag kahigawad,” kay gibase kana sa dakong gugma sa Diyos nga gipakita pinaagi kang Jesus. (Roma 5:5, 6) Si Jesus bug-os nga nagmasinugtanon sa Diyos, nga wala gyod mahimo sa unang tawo nga si Adan. (Roma 5:19) Ang pagkamasinupakon ni Adan miresultag sala ug kamatayon alang sa iyang mga kaliwat. (Roma 5:12) Sa laing bahin, ang bug-os nga pagkamasinugtanon ni Jesus ug ang iyang paghalad sa iyang kinabuhi nagpaposible nga ang masinugtanong mga tawo makabaton ug paglaom nga mabuhi sa walay kataposan.—Roma 5:21.