“Pagbaton ug tumang kalipay diha kang Jehova, ug ihatag niya kanimo ang mga tinguha sa imong kasingkasing.”—Salmo 37:4, Bag-ong Kalibotang Hubad.

 “Paglipay diha sa GINOO, ug siya maghatag kanimo sa mga tinguha sa imong kasingkasing.”—Salmo 37:4, Ang Biblia, 2011.

 Giawhag sa salmista ang mga magsisimba sa Diyos nga maglipay tungod sa pagbaton ug suod nga relasyon Kaniya. Kadtong naay suod nga relasyon kang Jehova a nga Diyos makaseguro nga iyang ihatag ang ilang hustong mga tinguha.

 “Pagbaton ug tumang kalipay diha kang Jehova.” Kini nga prase puwede pod hubaron nga “pagbaton ug dako kaayong kalipay diha kang Jehova,” “kalipayi ang pag-alagad sa GINOO,” o “kalipayi ang gisaad kanimo sa GINOO.” Sa ato pa, magmalipayon gyod ta sa pagsimba sa matuod nga Diyos. Nganong makaingon ta niana?

 Kadtong nagsimba kang Jehova nagbaton sa iyang panghunahuna, nga gipadayag sa Bibliya. Gawas nga nakaila sila sa Diyos nahibalo pod sila nga maalamon ang pagsunod kaniya. Ingong resulta, naa silay maayong konsensiya ug nalikayan nila ang daghang sayop ug dili maayong desisyon. (Proverbio 3:5, 6) Pananglitan, dihang ang hakog o dili matinud-anong mga tawo morag nagmalamposon, dili tugotan sa katawhan sa Diyos nga mawala ang ilang kalinaw sa hunahuna tungod sa kalagot o kasina. (Salmo 37:1, 7-9) Ang katawhan sa Diyos nalipay sa pagkahibalo nga sa dili madugay iyang taposon ang tanang inhustisya ug gantihan ang mga matinumanon sa ilang maayong binuhatan. (Salmo 37:34) Nalipay pod sila pag-ayo kay nahibalo sila nga nabatonan nila ang pag-uyon sa ilang langitnong Amahan.—Salmo 5:12; Proverbio 27:11.

 “Ihatag niya kanimo ang mga tinguha sa imong kasingkasing.” Kini nga mga pulong puwede pod hubaron nga “tubagon niya ang imong mga pag-ampo” o “ihatag niya kon unsa gyoy imong gitinguha.” Siyempre, dili ihatag ni Jehova ang tanan natong gipangayo. Samag maayong ginikanan, nahibalo si Jehova kon unsay pinakamaayo para sa Iyang mga anak. Dugang pa, ang atong mga hangyo, apil ang atong paagi sa pagkinabuhi, kinahanglang nahiuyon sa iyang mga sukdanan ug kabubut-on. (Proverbio 28:9; Santiago 4:3; 1 Juan 5:14) Kon kana ang kahimtang, makaduol ta sa “Tigpatalinghog sa pag-ampo” ug makasalig ta nga maminaw siya nato.—Salmo 65:2; Mateo 21:22.

 Ang Salmo 37 gikomposo ni Haring David sa karaang Israel. Gisulat niya ang salmo sumala sa pagkasunodsunod sa alpabeto. b

 Si David nag-antos ug daghang inhustisya. Nagtagotago siya kang Haring Saul ug sa uban kay gusto nila siyang patyon. (2 Samuel 22:1) Pero si David kanunayng naay bug-os nga pagsalig sa iyang Diyos. Nahibalo si David nga silotan ra ni Jehova ang mga daotan. (Salmo 37:10, 11) Bisan pa ug morag nagmalamboon sila, samag “lunhaw nga sagbot” mahanaw ra pod sila sa ulahi.—Salmo 37:2, 20, 35, 36.

 Gitandi sa Salmo 37 ang mahitabo niadtong nagsunod sa sukdanan sa Diyos ug niadtong nagbalewala niini. (Salmo 37:16, 17, 21, 22, 27, 28) Busa kini nga salmo motabang nato nga makabaton ug kaalam ug mahimong klase sa mga tawo nga uyonan sa Diyos.

 Tan-awa kining mubo nga video nga nagsumaryo sa basahon sa Salmo.