Nadunggan ni Elias ang balita: Si Haring Ahab patay na. Lagmit mahanduraw nato ang tigulang nga propeta nga naghapyodhapyod sa iyang bungot ug layog tinan-awan, samtang gihinumdoman niya ang iyang daghang tuig nga pagpakiglabot sa maong daotang hari. Daghan kaayo siyag giantos! Siya gihulga, gipangita, ug nameligro pa ganing mamatay​—kining tanan tungod kang Ahab ug sa iyang rayna nga si Jezebel. Walay gihimo ang hari aron mapugngan si Jezebel sa pagsugo nga patyon ang daghang propeta ni Jehova. Tungod sa kahakog, nagkunsabo usab sila sa pagpatay sa inosente ug matarong nga tawo nga si Nabot, uban sa iyang mga anak. Tungod niini, gipahayag ni Elias ang mensahe ni Jehova sa paghukom batok kang Ahab ug sa tibuok niyang dinastiya. Karon, natuman gayod ang mga pulong sa Diyos. Si Ahab namatay sumala sa paagi nga gitagna ni Jehova.​—1 Hari 18:4; 21:1-26; 22:37, 38; 2 Hari 9:26.

Apan nahibalo si Elias nga kinahanglang padayon siyang molahutay. Buhi pa si Jezebel, ug nagpadayon gihapon ang iyang daotang impluwensiya diha sa iyang pamilya ug sa nasod. Daghan pag atubangon nga problema si Elias, ug daghan pa siyag angayng itudlo sa iyang kauban ug manununod nga si Eliseo. Busa hisgotan nato ang tulo sa kataposang mga asaynment ni Elias. Samtang makita nato kon sa unsang paagi ang iyang pagtuo nakatabang niya sa paglahutay, mas mahibalo ta kon unsaon pagpalig-on ang atong pagtuo niining lisod nga mga panahon.

Si Ahazias, nga anak ni Ahab ug Jezebel, mao na karon ang hari sa Israel. Imbes nga makakat-on sa resulta sa kabuangan sa iyang mga ginikanan, misundog hinuon siya sa ilang pagkadaotan. (1 Hari 22:52) Sama kanila, si Ahazias nagsimba kang Baal. Ang Baalismo maoy relihiyon nga nagtukmod sa mga tawo sa paghimog daotan sama sa pagpasiugdag prostitusyon sa templo ug paghalad pa ganig mga anak. Duna bay makapabag-o kang Ahazias ug makagiya sa iyang katawhan sa pagbiya sa maong grabeng pagkadili-maunongon kang Jehova?

Dihay trahedya nga kalit nga midangat sa aroganteng batan-ong hari. Siya nahulog sa bangag nga may rehasrehas diha sa iyang lawak sa atop ug grabeng naangol. Bisag posible siyang mamatay, wala gihapon siya mangayog tabang kang Jehova. Hinuon, nagpadala siyag mga mensahero ngadto sa kaaway nga Filistehanong siyudad sa Ekron aron magpakisayod sa diyos nga si Baal-zebub kon maulian pa ba siya. Wala gayod malipay si Jehova. Nagpadala siyag anghel kang Elias aron sultihan kini nga pugngan ang maong mga mensahero. Gipabalik sila sa propeta ngadto sa hari dala ang sakit kaayo nga mensahe. Si Ahazias grabeng nakasala kay milihok siya nga daw ang Israel walay Diyos. Gihukman ni Jehova si Ahazias nga siya dili na gyod maulian.​—2 Hari 1:2-4.

Kay dili mahinulsolon, si Ahazias nangutana: “Unsa ang panagway sa tawo nga miabot sa pagsugat kaninyo ug dayon misulti niining mga pulonga kaninyo?” Ang mga mensahero mitubag pinaagi sa paghubit sa simpleng besti sa usa ka propeta, ug si Ahazias miingon dayon: “Si Elias kadto.” (2 Hari 1:7, 8) Matikdi nga si Elias nagkinabuhing simple ug nakapokus sa pag-alagad sa Diyos mao nga dali ra siyang mailhan pinaagi lang sa iyang simpleng besti. Dili gayod kana ikaingon bahin kang Ahazias o sa iyang mga ginikanan, kinsa hakog ug materyalistiko. Ang panig-ingnan ni Elias nagpahinumdom kanato karon nga magkinabuhing simple uyon sa tambag ni Jesus, nga nakapokus ang mata sa kon unsa gyoy importante.​—Mateo 6:22-24.

Kay gusto gyong manimalos, gipadala ni Ahazias ang 50 ka sundalo ug ang pangulo niini aron dakpon si Elias. Dihang nakita nila si Elias nga “naglingkod sa tumoy sa bukid,” * ang pangulo sa kasundalohan binagis nga nagmando kang Elias, sa ngalan sa hari, sa ‘paglugsong’​—lagmit aron patyon siya. Tiaw mo na! Bisag nahibalo sila nga si Elias “tawo sa matuod nga Diyos,” ang maong mga sundalo naghunahuna nga husto lang nga siya ilang hadlokon ug hulgaon. Sayop gyod sila! Giingnan ni Elias ang pangulo: “Buweno, kon ako usa ka tawo sa Diyos, pakanaogon unta ang kalayo gikan sa mga langit ug magaut-ot kanimo ug sa imong kalim-an.” Unya milihok ang Diyos! “Ang kalayo nanaog gikan sa mga langit ug nag-ut-ot kaniya ug sa iyang kalim-an.” (2 Hari 1:9, 10) Ang pait nga kamatayon sa maong mga sundalo klarong nagpahinumdom nga dili balewalaon ni Jehova kon ang iyang mga alagad tamayon o dili tahoron sa mga tawo.​—1 Cronicas 16:21, 22.

Gipadala ni Ahazias ang laing pangulo uban sa 50 ka sundalo niini. Ang ikaduhang pangulo mas dili maalamon kay sa nauna. Kay sa usa ka rason, wala siya mahibalo nga namatay ang naunang 51 ka sundalo, bisag lagmit nagkatag pa ang ilang mga abo diha sa bungtod. Lain pa, wala lang niya isulti pag-usab ang binagis nga mando kang Elias sa naunang pangulo sa ‘paglugsong,’ gidugangan pa gyod niya sa mga pulong nga “sa madali”! Pagkabinuang! Busa siya ug ang iyang mga sundalo namatay sa paagi nga sama sa naunang grupo. Apan mas labi na gyong buangbuang ang hari. Kay wala matandog sa nahitabo, gipadala niya ang ikatulong grupo sa mga sundalo. Maayo na lang nga kining ikatulong pangulo maalamon. Mapainubsanon siyang miduol kang Elias ug mihangyo nga siya ug ang iyang mga sundalo dili patyon. Seguradong gisundog ni Elias, nga tawo sa Diyos, ang kaluoy ni Jehova dihang gitubag niya ang mapainubsanong pangulo. Gisultihan sa anghel ni Jehova si Elias sa pag-uban niini nga mga sundalo. Misunod si Elias ug iyang gipahayag pag-usab ang paghukom ni Jehova sa daotang hari. Si Ahazias namatay sumala sa mga pulong sa Diyos. Duha ka tuig lang siyang nagmando.​—2 Hari 1:11-17.

Sa unsang paagi si Elias nakalahutay bisan pag ang mga tawo sa iyang palibot gahig ulo ug rebelyoso? Dili ba mapadapat usab kanato karon ang maong pangutana? Naglagot na ba ka kay ang usa nga imong gihatagag pagtagad nagbalewala sa imong maayong tinguha ug nagpadayon sa pagbuhat ug dili maayo? Sa unsang paagi ta makalahutay sa maong mga kahigawad? Duna tay makat-onan sa dapit diin nakita sa mga sundalo si Elias, “sa tumoy sa bukid.” Dili nato masulti ang rason kon nganong tua didto si Elias, apan makaseguro ta nga ingong tawong mainampoon, iyang nakita nga ang kamingaw sa maong dapit maghatag kaniyag kahigayonan nga mas masuod sa iyang minahal nga Diyos. (Santiago 5:16-18) Sa susama, puwede tang regular nga mogahin ug panahon nga mag-inusara uban sa Diyos, nga mosangpit sa iyang ngalan ug mopahayag kaniya sa atong mga problema ug kabalaka. Nianang paagiha, kita mas makalahutay dihang ang mga tawo sa atong palibot dili maalamon ug naghimog kadaot sa ilang kaugalingon.

Panahon na nga ipasa ni Elias ang iyang asaynment. Matikdi kon unsay iyang gibuhat. Sa mobiyaay na siya ug si Eliseo sa lungsod sa Gilgal, giawhag ni Elias si Eliseo nga magpabilin didto samtang siya mag-inusarang moadto sa Bethel, mga 11 kilometros ang gilay-on. Lig-on ang tubag ni Eliseo: “Ingon nga si Jehova buhi ug ingon nga ang imong kalag buhi, dili ako mobiya kanimo.” Pag-abot nila sa Bethel, giingnan ni Elias si Eliseo nga mag-inusara siyang moadto sa Jerico, mga 22 kilometros ang gilay-on. Lig-on gihapon ang iyang tubag sama sa miagi. Sa ikatulong higayon, sa Jerico, mao ra gihapon ang nahitabo sa wala pa sila mopaingon sa Suba sa Jordan, mga walo ka kilometros ang gilay-on. Susama gihapon ka lig-on ang tubag sa batan-ong lalaki. Dili siya mobiya kang Elias!​—2 Hari 2:1-6.

Gipakita ni Eliseo ang importante nga hiyas, ang maunongong gugma. Kini ang matang sa gugma nga gipakita ni Ruth kang Noemi, ang gugma nga mounong gyod ug modumili sa pagbiya. (Ruth 1:15, 16) Gikinahanglan kanang hiyasa sa tanang alagad sa Diyos​—ilabina karon. Nakita ba gyod nato ang kaimportante niini sama kang Eliseo?

Seguradong nadasig pag-ayo si Elias sa maunongong gugma sa iyang batan-ong kauban. Tungod niini, nakapribilehiyo si Eliseo nga makita ang kataposang milagro ni Elias. Sa may tampi sa Suba sa Jordan, nga sagad kusog ang sulog ug lawom, gihapak ni Elias sa tubig ang iyang opisyal nga kupo. Ang tubig nabahin! Nakakita usab niini nga milagro ang “kalim-an ka tawo sa mga anak nga lalaki sa mga manalagna,” nga dayag nga lakip sa nagkadaghang gibansay aron manguna sa putli nga pagsimba sa yuta. (2 Hari 2:7, 8) Lagmit si Elias ang nagdumala niini nga pagbansay. Katuigan kanhi, dihay panahon nga mibati si Elias nga siya na lang ang nagpabiling matinumanon sa yuta. Sukad niadto, gipanalanginan ni Jehova ang paglahutay ni Elias, nga gitugotan siyang makita ang dakong pag-uswag sa Iyang mga magsisimba.​—1 Hari 19:10.

Sa nakatabok na sila sa Jordan, giingnan ni Elias si Eliseo: “Pangayo kon unsay akong buhaton alang kanimo sa dili pa ako kuhaon gikan kanimo.” Nahibalo si Elias nga panahon na nga mobiya na siya. Wala niya ihikaw sa iyang batan-ong higala ang mga pribilehiyo ug ang kadungganan nga madawat unya niini. Hinunoa, si Elias gusto kaayong motabang niya sa bisan unsang paagi. Kini lang ang gipangayo ni Eliseo: ‘Palihog, nga duha ka bahin sa imong espiritu ang mahianhi kanako.’ (2 Hari 2:9) Wala kini magpasabot nga gusto niyang makadawat ug balaang espiritu nga doble sa gidaghanon sa nadawat ni Elias. Hinuon, nangayo siyag panulondon nga sama nianang sa panganayng anak nga lalaki, nga sumala sa balaod makadawat sa kinadak-an, o doble, nga panulondon nga motumbas sa iyang bag-ong mga responsibilidad ingong ulo sa pamilya. (Deuteronomio 21:17) Ingong espirituwal nga manununod ni Elias, dayag nga nakita niya nga gikinahanglan niya ang maisogong espiritu ni Elias aron matapos niya ang buluhaton.

Mapainubsanong gitugyan ni Elias kang Jehova ang tubag. Kon tugotan ni Jehova nga makita ni Eliseo nga gikuha sa Diyos ang tigulang nga propetang si Elias, nan ang tubag sa Diyos sa gipangayo ni Eliseo maoy oo. Ug sa wala madugay, samtang naglakaw ang duha ka dugay nang managhigala, “nga nagsultihanay samtang naglakaw,” dihay talagsaong nahitabo!​—2 Hari 2:10, 11.

Usa ka katingalahang kahayag ang misidlak sa kalangitan ug nagkaduol kini kanila. Mahunahunaan tingali nato ang kabanha ug dinahunog sa hangin samtang dihay kalit nga mitunghang alimpulos, nga may hayag nga butang nga tuling nagpaingon sa duha ka lalaki, nga tungod niana sila nagkabulag ug lagmit nakaatras sa kalisang. Nakakita silag sakyanan, usa ka karo, nga nagdilaab samag kalayo. Nahibalo si Elias nga miabot na ang iyang panahon. Misakay ba siya? Walay giingon ang asoy. Bisan unsa man, gibati niya nga mora siyag gipataas sa kahanginan, nga gidala sa alimpulos!

Si Eliseo nagtan-aw nga nahingangha. Kay nakita man niya kining katingalahang hitabo, nahibalo si Eliseo nga hatagan gayod siya ni Jehova ug “duha ka bahin” sa maisogong espiritu ni Elias. Apan tungod sa kaguol, dili kana ang gihunahuna ni Eliseo. Wala siya mahibalo kon asa paingon ang iyang minahal nga higala, apan lagmit wala na siya magdahom nga makita pa pag-usab si Elias. Siya misinggit: “Amahan ko, amahan ko, ang karo nga iggugubat sa Israel ug ang iyang mga mangangabayo!” Siya nagtan-aw samtang ang iyang hinigugmang magtutudlo nagkahanaw palayo; unya gigisi ni Eliseo ang iyang mga besti sa kaguol.​—2 Hari 2:12.

Samtang mikayab si Elias sa langit, nadunggan kaha niya ang iyang batan-ong higala nga naghilak? Mihilak pod kaha siya? Bisan unsa man, nahibalo gayod siya nga ang pagbaton ug ingon niana nga higala nakatabang niyang makalahutay sa lisod nga mga panahon. Angay kitang mokat-on sa panig-ingnan ni Elias ug makighigala sa mga tawo nga nahigugma sa Diyos ug naningkamot sa pagbuhat sa iyang kabubut-on!

Diin miadto si Elias? Ang pipila ka relihiyon nagtudlo nga siya gidala sa langit aron makauban ang Diyos. Apan imposible kana. Kasiglohan sa ulahi, si Jesu-Kristo miingon nga wala pay nakasaka sa langit sa wala pa ang iyang panahon. (Juan 3:13) Busa dihang mabasa nato nga “si Elias mikayab diha sa alimpulos ngadto sa kalangitan,” angay tang mangutana, Unsa nga kalangitan? (2 Hari 2:11) Sa Bibliya, ang “kalangitan” wala lang magtumong sa dapit nga gipuy-an ni Jehova apan nagtumong usab sa kalangitan diha sa atmospera sa atong yuta, diin nag-utaw-utaw ang mga panganod ug maglupadlupad ang mga langgam. (Salmo 147:8) Diha nga kalangitan si Elias mikayab. Unsay sunod nga nahitabo?

Gibalhin ra ni Jehova ang minahal nga propeta ngadto sa bag-ong asaynment, nga niining higayona diha sa silingang gingharian sa Juda. Gipakita sa rekord sa Bibliya nga si Elias naa gihapoy buluhaton didto, lagmit kapig pito ka tuig sa ulahi. Ang nagmando sa Juda niadtong panahona mao ang daotang hari nga si Jehoram. Giminyoan niya ang anak ni Ahab ug Jezebel, busa anaa gihapon ang ilang daotang impluwensiya. Gisugo ni Jehova si Elias sa paghimog sulat nga nagpahayag ug paghukom kang Jehoram. Sumala sa gitagna, ngilngig ang kamatayon ni Jehoram. Labaw pa, ang asoy mihinapos: “Siya mitaliwan nga wala kawilihi.”​—2 Cronicas 21:12-20.

Lahi gayod kaayo ang maong daotang tawo kang Elias! Wala ta mahibalo kon sa unsang paagi o kon kanus-a namatay si Elias. Apan nahibalo ta nga ang iyang pagkamatay dili sama kang Jehoram, nga wala gayoy nawili. Gimingaw si Eliseo sa iyang higala. Mao man usab ang ubang matinumanong mga propeta. Bisag mga 1,000 ka tuig na ang milabay, gipabilhan gihapon ni Jehova si Elias, kay siya migamit ug representasyon sa maong hinigugmang propeta diha sa transpigurasyon. (Mateo 17:1-9) Gusto ba nimong makakat-on kang Elias ug makaugmad ug pagtuo nga molahutay bisan pa sa mga kalisdanan? Pakighigala sa mga nahigugma sa Diyos, pabiling nakapokus sa espirituwal nga mga butang, ug pag-ampo kanunay nga kinasingkasing. Hinaot nga maanaa ka usab kanunay sa mahigugmaong kasingkasing ni Jehova!