Gipakita sa usa ka survey nga 97 percent sa mga batan-on ang naggamit ug social media. Ganahan ba pod ang imong anak nga mogamit ug social media? Kon mao, naay pipila ka butang nga angay nimong konsiderahon.

Niining artikuloha

•  Kon unsaon paggamit sa imong anak ang iyang panahon

•  Kon unsay hunahunaon sa imong anak sa panaghigalaay

•  Kon sa unsang paagi maapektohan ang emosyon sa imong anak

•  Kon unsay himoon sa imong anak online

•  Gikinahanglan ba gyod ang social media?

•  Ang giingon sa mga ginikanan

 “Ang social media gidesinyo aron makuha ang imong atensiyon, mag-online pirme, ug magsigeg tan-aw sa imong gadyet aron kanunay kang updated,” matod sa website nga HelpGuide.

 “Imbes kadiyot ra unta kong mogamit ug social media, daghang oras na hinuon kong magsigeg tan-aw ug mga post. Lisod kaayong mohunong ug mangitag mas maayong himoon.”—Lynne, 20.

 Pangutan-a ang kaugalingon: Masunod ba sa akong anak ang gitas-on sa panahon nga akong gitugot sa paggamit ug social media? Kaya na ba niyang limitahan ang panahon nga iyang gamiton sa social media?

 Prinsipyo sa Bibliya: ‘Pagbantay pag-ayo nga ang inyong paggawi sama sa maalamong mga tawo, nga gamiton ang inyong panahon sa kinamaayohang paagi.’—Efeso 5:15, 16.

 Ang social media gidesinyo aron bation sa usa ka tawo nga daghan siyag higala. Pero sagad, kana nga panaghigalaay dili tinuod.

 “Daghang batan-on ang naghunahuna nga kon daghan silag mga follower o makuhang likes, daghang tawo ang ganahan nila, bisan pag wa sila kaila nila.”—Patricia, 17.

 Pangutan-a ang kaugalingon: Masabtan na ba sa akong anak nga dili importante ang mga follower ug likes? Makamao ba siyang makighigala sa personal, dili lang sa social media?

 Prinsipyo sa Bibliya: “Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”—Proverbio 17:17.

 Ang mga researcher miingon nga ang sobrang paggamit ug social media sagad makapaguol, makapabalaka, ug maka-depress pa gani.

 “Kon makakita kag post nga nag-uban ang imong mga higala ug wa ka nila giapil, maguol gyod ka.”—Serena, 19.

 Pangutan-a ang kaugalingon: Malikayan na ba sa akong anak nga magpokus sa kaugalingon, makigkompetensiya, o maapektohan sa mga post nga iyang makita sa social media?

 Prinsipyo sa Bibliya: “Dili ta magpaimportante sa kaugalingon, nga mag-aghat ug kompetisyon ug magsinahay.”—Galacia 5:26.

 Kon mogamit kag social media, puwede kang maapil sa cyberbullying ug sexting, o makatan-awg pornograpiya. Bisag dili intensiyon sa imong anak nga mobuhat nianang mga butanga, puwede gihapon siyang ma-expose sa maong mga butang.

 “Namatikdan nako nga ang mga post sa social media morag maayo sa sinugdan pero naa diay sagol nga daotan. Daghan pod sa mga post ang naggamit ug bastos nga mga pulong ug dili maayong musika.”—Linda, 23.

 Pangutan-a ang kaugalingon: Responsable na ba ang akong anak sa paggamit ug Internet? Naa na ba siyay kaisog nga isalikway ang dili maayong mga post?

 Prinsipyo sa Bibliya: “Ang seksuwal nga imoralidad ug ang tanang matang sa kahugawan o kahakog dili ninyo angayng hisgotan, . . . apil niana ang makauulaw nga paggawi, binuang nga sinultihan, ug law-ay nga komedya.”—Efeso 5:3, 4.

 Ang tawo wala magkinahanglag social media aron mabuhi ug magmalipayon. Daghang batan-on ang malipayon bisag walay social media—apil na kadtong mihunong sa paggamit ana.

 “Dihang nakita nako nga naay negatibong epekto kang Ate ang paggamit ug social media, mihunong ko sa paggamit ani. Sukad adto mas malipayon na ko ug mas nag-enjoy sa kinabuhi.”—Nathan, 17.

 Ang punto: Sa dili pa nimo tugtan ang imong anak sa paggamit ug social media, paneguroa nga responsable na siya sa paggamit sa iyang panahon, pagpilig maayong mga higala, ug paglikay sa dili maayong post.

 Prinsipyo sa Bibliya: “Ang maalamon mamalandong sa matag lakang.”—Proverbio 14:15.