•   OK ra nimo ang pakalitkalit; pero gusto niya nga planado tanan.

•   Hilomon ka ug dili ganahag saba; pero siya bibohon ug gustog daghang tawo.

 Naa bay kinaiya ang imong bana o asawa nga makapalagot nimo? Kon pirme kang maghunahuna ana, posibleng madaot ang inyong kaminyoon. Gani, ang Bibliya nag-ingon nga “kadtong magsigeg hisgot niini magpabulag sa suod nga managhigala.”—Proverbio 17:9.

 Imbes himoong hinungdan sa away ang makapalagot nga kinaiya sa imong bana o asawa, makatabang kon mas masabtan nimo ang iyang kinaiya.

Niining artikuloha

•  Kon unsay makatabang

•  Ang giingon sa mga magtiayon

•  Giya sa panag-estorya

 Ang iyang kinaiya nga makapalagot nimo tingali konektado sa kinaiya nga imong ganahan. Konsideraha ning tulo ka pananglitan:

 “Ang akong bana sagad hinay molihok o dugay mahumag pangandam kon manglakaw mi. Pero tungod ani, pasensiyoso kaayo siya—bisan sa akoa. Bisag maglagot ko usahay sa iyang kahinayan, pero apil nâ sa kinaiya nga akong nagustohan niya.”—Chelsea.

 “Ang akong asawa metikulosa sa pagplano; gusto niya nga susihon ang tanan mao nga usahay maglagot ko. Pero tungod sa iyang pagkametikulosa, hapsay ang tanan.”—Christopher.

 “Usahay, maglagot ko kay ang akong bana morag way pagpakabana. Pero relaks pod siya nga pagkatawo, ug mao nay usa sa akong nagustohan niya. Bilib ko niya kay kalmado gihapon siya sa lisod nga mga kahimtang.”—Danielle.

 Sama sa nakat-onan ni Chelsea, Christopher, ug Danielle, ang kahuyangan sa usa sagad laing anggulo lang sa iyang maayong kinaiya. Kon mao nay kahimtang, dili nimo matangtang ang makapalagot nga kinaiya nga dili maapil ang maayong kinaiya, sama ra nga dili nimo malabay ang usa lang ka side sa sensilyo.

 Siyempre, dili tanang kinaiya naay maayong anggulo. Pananglitan, ang Bibliya nag-ingon nga ang ubang tawo “daling masuko.” (Proverbio 29:22) Niana nga kahimtang, ang usa angayng maningkamot nga wad-on “ang tanang klase sa pagdumot, kasuko, kapungot, siningkahay, ug sakit nga sinultihan.” a—Efeso 4:31.

 Pero kon dili ingon ana ang kahimtang ug igo ra gyod kang naglagot sa iyang kinaiya, sunda ang tambag sa Bibliya: “Padayon sa pagpailob sa usag usa … kon ang usa dunay reklamo batok sa lain.”—Colosas 3:13.

 Dugang pa, pangitaa ang maayong anggulo sa iyang kinaiya, nga tingali maoy hinungdan nga nagustohan nimo siya. Ang usa ka bana nga si Joseph miingon, “Kon magpokus ka sa makapalagot nga kinaiya, mora kag nagtan-aw sa hait nga parte sa diamond, dili sa kanindot niini.”

 Puwede mong magtinagsa sa pagtubag sa mosunod nga mga pangutana. Dayon hisgoti ninyo ang inyong mga tubag.

•   Naa bay kinaiya ang imong bana o asawa nga para nimo maoy hinungdan nga di mo magkasinabot? Kon naa, unsa nâ nga kinaiya?

•   Maot ba gyod nâ nga kinaiya, o makapalagot lang?

•   Naa bay maayong anggulo ang maong kinaiya? Kon naa, unsa man nâ, ug nganong ganahan ka ana?