Daghang managtrato ang mag-ipon ug puyo bisag wala pa sila makasal. Ila nang ginahimo kay gusto nilang mahibaloan kon magkasinabot ba gyod sila. Naghunahuna pod sila nga makatabang ni aron magmalamposon ang ilang kaminyoon. Pero maalamon ba gyod ang pag-ipon ug puyo ayha magpakasal?

Niining artikuloha

•  Unsay giingon sa Bibliya?

•  Ang pag-ipon bag puyo mag-andam nimo sa kaminyoon?

•  Ang pag-ipon bag puyo makatabang ninyo sa pinansiyal?

•  Ang pag-ipon bag puyo makatabang nimo nga dili maminyo sa sayop nga tawo?

•  Naa bay mas maayong paagi?

•   Ang Bibliya nag-ingon nga sayop ang pagpakigsekso nga dili pa minyo. Pananglitan, kini nag-ingon: “Maglikay sa seksuwal nga imoralidad.” (1 Tesalonica 4:3; 1 Corinto 6:18) Apil niana ang pagpakigsekso sa managtrato nga nag-ipon ug puyo, bisan pag naa silay plano nga magpakasal. a Ang mga sukdanan sa Bibliya makatabang sa managtrato nga malikayan ang pagbuntis nga dili pa minyo ug ang ubang mga problema nga resulta sa pag-ipon ug puyo nga wala pay kasal.

•   Ang kaminyoon maoy kahikayan sa Diyos. Dihang iya ning gisugdan, siya miingon: “Ang lalaki mobiya sa iyang amahan ug inahan ug siya moipon sa iyang asawa, ug sila mahimong usa ka unod.” (Genesis 2:24) Ang panaad sa kaminyoon mao ang pinakamaayong pundasyon sa mahigugmaon ug malipayon nga pamilya.

 Ang uban mouyon niana. Naghunahuna sila nga ang managtrato daghag makat-onan kon mag-uban silag himo sa mga buluhaton sa balay ug maniid sa kinaiya sa usag usa. Pero aron molampos ang relasyon, kinahanglan ang panaad sa kaminyoon.

 Sa unsang paagi ang managtrato makakat-on nga magmaunongon sa usag usa sa tanang panahon? Dili pinaagi sa pag-ipon ug puyo sa wala pay kasal, nga mora bag sulayan lang usa nila kon magkasinabot ba gyod sila ug puwede rang makigbulag ang usa nila bisan kanus-a niya gusto. Hinuon, magmalamposon ang relasyon kon naa silay lig-ong panaad sa usag usa ug maningkamot nga masulbad ang mga problema.

 Ang punto: Ang pag-ipon ug puyo sa wala pay kasal dili makatabang nga maandam ang managtrato sa kaminyoon. Gani posibleng pagpangandam ni para sa panagbulag.

 Prinsipyo sa Bibliya: “Kon unsay gipugas sa usa ka tawo, mao pod ang iyang anihon.”—Galacia 6:7.

 Ang uban mouyon niana. Ang survey nga gihimo sa Pew Research Center nag-ingon nga sa United States, mga upat sa napulo ka adulto ang nag-ipon ug puyo tungod sa pinansiyal nga mga rason. Pero paglabay sa panahon nga nag-ipon silag puyo, kadtong mga gi-survey miingon nga ang mga problema sa pinansiyal gihapon ang pangunang rason kon nganong dili pa sila andam nga magminyo.

 Ang pag-ipon ug puyo nga wala pay kasal moresulta pag laing mga problema, ilabina para sa mga babaye. Pananglitan, human sa panagbulag, sagad mahimong responsibilidad sa mga babaye ang pagpadako sa anak.

 Ang punto: Ang uban moingon nga daghag kaayohan ang pag-ipon ug puyo nga wala pay kasal. Pero sa tinuod lang, mas dakog purohan nga moresulta hinuon ni sa mas daghang problema.

 Prinsipyo sa Bibliya: “Ako, si Jehova, ang imong Diyos, ang Usa nga nagtudlo kanimo aron makabaton kag kaayohan.”—Isaias 48:17.

 Ang uban mouyon ana. Pero “ang mga tawo nga nag-ipon ug puyo nga wala pay kasal sagad wala makahunahuna nga malisdan na hinuon sila nga makigbulag tungod ani,” nag-ingon ang librong Fighting for Your Marriage. Ngano? Madiskobrehan tingali sa ubang managtrato nga nag-ipon ug puyo nga dili gyod sila magkasinabot. Pero tungod sa ilang mga obligasyon sama sa binuhing mga hayop, giabangan nga balay, o kay magkaanak na sila, ang mga researcher miingon nga mapugos na lang silag puyo nga magkauban kay naanad na sila ug malisdan na sa paghimog kausaban. b Sa laing pagkasulti, “ang uban nga magbulag unta sa wala pa gikasal nagminyo na lang kay mas komplikado kon magbulag sila,” midugang ang Fighting for Your Marriage.

 Ang punto: Imbes makatabang nimo sa paghimog maayong desisyon, ang pag-ipon ug puyo makapalisod hinuon nga taposon ang dili maayong relasyon.

 Prinsipyo sa Bibliya: “Ang tawong maalamon makakita sa kapeligrohan ug molikay niana, pero ang walay kasinatian moderetso ra ug mag-antos sa resulta.”—Proverbio 22:3.

 Naa kay mahimo aron malikayan ang mga problema nga resulta sa pag-ipon ug puyo nga wala pay kasal ug makabaton ug malamposon nga kaminyoon. Unsa man? Ang pagsunod sa sukdanan sa Bibliya para sa kaminyoon. Paggahin ug panahon nga ilailahon pag-ayo ang gusto nimong maminyoan sa dili pa mo mag-ipon ug puyo ingong bana ug asawa. Makapili kag maayong kapikas pinaagi sa pagkonsiderar kon parehas ba mog mga prinsipyo sa kinabuhi ug gituohan kay mas importante ni kay sa inyong seksuwal nga pagbati.

 Ang Bibliya naay mga tambag nga makatabang nimo nga maandam aron makabaton kag malipayon ug malamposong kaminyoon sa umaabot. c Pananglitan, ang Bibliya naay mga prinsipyo nga makatabang nimo nga . . .

•   mahimong maunongon

•   mahimong maayong kapikas sa umaabot

•   makita kon ang imong trato naa bay dili maayong mga kinaiya

 Aron makakat-on ug dugang, tan-awa ang “Kaminyoon ug Pamilya” nga seksiyon sa jw.org.

 Prinsipyo sa Bibliya: “Ang tibuok Balaang Kasulatan gisulat pinaagi sa paggiya sa Diyos ug mapuslanon sa pagtudlo.”—2 Timoteo 3:16.