Gikan sa 1990 ngadto sa 2015, ang gidaghanon sa mga nagdiborsiyo nga 50 anyos pataas nadoble sa United States, ug natriple sa mga nag-edad ug kapig 65. Unsay hinungdan niini? Unsay imong himoon aron dili ni makaapektar sa imong kaminyoon?

Niining artikuloha

•  Unsay hinungdan nga magdiborsiyo ang mga edaran?

•  Ang imong mahimo

•  Giya sa panag-estorya

•    Sagad, ang edaran nga mga magtiayon nagdiborsiyo kay anam-anam nga mihuyang ang ilang relasyon. Paglabay sa panahon, ang ubang magtiayon lainlain nag hilig maong usahay dili sila magkauyon. O dihang maglain nag puyo ang ilang mga anak, mamatikdan sa magtiayon nga nalimot na sila kon unsaon nga mahimong bana ug asawa kay taas nga panahon silang nagpokus sa ilang mga papel ingong amahan ug inahan.

•    Sa milabayng mga dekada, ang mga tawo nga eksperto kunohay sa kaminyoon nagtambag sa mga magtiayon nga hunahunaon ang ilang kaugalingong panginahanglan. ‘Nakahatag ba nakog kalipay ang akong kaminyoon?’ ‘Nakatabang ba ni nga mahimo kong mas maayong tawo?’ ‘Gipabati ba ko niya nga gimahal ug gipabilhan?’ Kon wala, ang mga tawo karon mosugyot nga kinahanglang himoon nimo kon unsay mas maayo para nimo—pakigdiborsiyo ug pagsugod ug bag-ong kinabuhi.

•   Ang mga tawo karon lahi nag panglantaw sa diborsiyo. Ang sociologist nga si Eric Klinenberg miingon: “Sa una, kon ang usa dili na malipayon sa iyang kaminyoon ug gustong makigdiborsiyo, kinahanglang naa siyay klarong rason sa iyang desisyon. Pero karon lahi na. Kay daghan kaayong tawo ang nagtuo nga angayng unahon ang kaugalingon, kinahanglang naa kay lig-ong rason kon nganong magpabilin pa ka sa imong kaminyoon bisag dili na ka malipayon.” a

 Dihang ang usa makigdiborsiyo, masulbad tingali ang usa ka problema pero mapulihan ra pod nig laing problema. Pananglitan, ang usa ka research nag-ingon nga “kon magdiborsiyo ang mga edaran, sagad maglisod sila pag-ayo sa pinansiyal ilabina ang mga babaye.”

 Naa pay lain nga angayng hunahunaon. “Puwede kang magsugod sa uno, pero mao ra gihapon ang imong pagkatawo,” miingon ang libro nga Don’t Divorce. “Kon wala mosaler ang imong paagi sa pagpakigkomunikar sa imong kapikas, naa ba kay gihimo aron mausab ni? Naa pod ba kay gihimo aron mausab ang imong paagi sa pag-atubang sa mga dili pagsinabtanay?” b

•   Dawata ang mga kausaban. Naa gyoy kausaban sa mga relasyon. Ang imong relasyon sa imong kapikas nausab tingali kay ang inyong mga anak naglain nag puyo o nausab na ang inyong mga hilig. Imbes nga magsigeg handom sa mga butang sa kagahapon, hunahunaa kon unsay imong mahimo karon aron mouswag ang inyong relasyon.

   Prinsipyo sa Bibliya: “Ayaw pag-ingon, ‘Nganong ang kanhing mga adlaw mas maayo pa kay sa karon?’ kay dili maalamon ang pagpangutana niini.”—Ecclesiastes 7:10.

•   Mentinaha ang inyong panaghigalaay. Puwede ba nimong kat-onon ang bag-ong hilig sa imong kapikas, o kaha hagaron siya sa imong bag-ong gikahiligan? Puwede ba mong magkat-on ug bag-ong butang nga kamong duha ang malingaw? Ang importante mao nga makagahin mog panahon sa usag usa, aron bation ninyo nga magtiayon gyod mo ug dili lang kay magkauban mo sa balay.

   Prinsipyo sa Bibliya: “Ang matag usa padayong magtinguha, dili sa iyang kaugalingong kaayohan, kondili nianang sa laing tawo.”—1 Corinto 10:24.

•   Padayong ipakita ang maayong pamatasan. Himoa ni bisag dugay na mong magtiayon. Sulti nga matinahoron sa imong kapikas, ug tratara siya sa buotang paagi sama niadtong managtrato pa mo. Ayawg kalimti nga moingon ug “palihog” ug “salamat.” Kanunayng ipakita sa imong kapikas nga gimahal nimo siya sa pulong man o buhat, ug pasalamati siya sa mga butang nga iyang gihimo para nimo.

   Prinsipyo sa Bibliya: “Magpakita mog kaayo sa usag usa, magmabination.”—Efeso 4:32.

•   Hinumdomi ang malipayong mga panahon. Tan-awa ninyong duha ang mga letrato sa inyong kasal o ubang okasyon nga magkauban mo. Makatabang ni nga mapadayon—o mabalik—ang gugma ug pagtahod diha sa inyong kaminyoon.

   Prinsipyo sa Bibliya: “Kinahanglang higugmaon sa matag usa ang iyang asawa sama sa iyang kaugalingon; sa laing bahin, ang asawa angay nga dunay dakong pagtahod sa iyang bana.”—Efeso 5:33.