Ang paggamit ug gadyet makapalig-on o makapahuyang sa inyong kaminyoon. Sa unsang paagi nakaapektar kana sa inyong kaminyoon?

•  Ang angay ninyong mahibaloan

•  Ang inyong mahimo

•  Ang giingon sa mga magtiayon

•  Giya sa panag-estorya

•   Ang maalamong paggamit sa gadyet makapalig-on sa kaminyoon. Pananglitan, ang pipila ka magtiayon naggamit niini aron magkaestoryahay sila kon dili sila magkauban.

   “Bisan ang pag-text lang ug ‘Gimahal ti ka’ o ‘Naghunahuna ko nimo’ makapasuod ninyo.”​—Jonathan.

•   Ang dili maalamong paggamit sa gadyet makapahuyang sa kaminyoon. Pananglitan, ang pipila ka magtiayon magsigeg gamit sa ilang gadyet, maong makuhaan na ang ilang panahon ug atensiyon sa usag usa.

   “Seguradong may mga panahon nga ganahan untang makig-estorya nako ang akong bana kon wâ pa ko magsigeg gamit ug cellphone.”​—Julissa.

•   Ang uban moingon nga puwede ra silang makig-estorya sa ilang kapikas samtang naggamit ug gadyet. Pero ang sociologist nga si Sherry Turkle nag-ingon nga dili posible ang multitasking. Klaro nga bisag naghunahuna ang mga tawo nga maayo ang multitasking, dili nâ tinuod. Siya miingon nga sa tinuoray lang, “mosamot nga dili maayo ang resulta kon magkadaghan ang atong buhaton sa samang higayon.” a

   “Ganahan kaayo kong makig-estorya sa akong bana kon dili siya mag-multitasking. Kon mag-multitask siya, bation nako nga balewala ra niya kon naa ko o wala.”​—Sarah.

 Ang punto: Ang inyong paagi sa paggamit sa gadyet makapalig-on o makapahuyang sa inyong kaminyoon.

 Pagtakdag mga prayoridad. Ang Bibliya nag-ingon: ‘Seguroa ninyo ang mas importanteng mga butang.’ (Filipos 1:10) Pangutan-a ang kaugalingon, ‘Naa na ba sa gadyet ang panahon ug atensiyon nga angay unta namong ihatag sa usag usa?’

 “Makapaguol nga makita ang usa ka lalaki ug babaye nga naggamit sa ilang mga cellphone samtang nangaon sa restawran​—duha ka tawo nga nagsigeg tan-aw sa ilang gadyet. Dili nato gustong maulipon sa gadyet ug makalimtan ang pinakaimportante​—ang atong relasyon sa usag usa.”​—Matthew.

 Pagtakdag mga limitasyon. Ang Bibliya nag-ingon: “Pagbantay pag-ayo nga ang inyong paggawi dili sama sa dili maalamon kondili sa maalamong mga tawo, nga gamiton ang inyong panahon sa kinamaayohang paagi.” (Efeso 5:15, 16) Pangutan-a ang kaugalingon, “Makagahin ba kog espesipikong panahon sa pagbasa ug pagtubag sa mga text o email nga dili emergency imbes tubagon dayon kini?’

 “Nakita nako nga maayong i-silent ang cellphone ug ayha pa moreply sa mga text kon makalugar na. Talagsa ra nga emergency gyod ang tawag, text, o email, maong dili ra kinahanglan nga tubagon dayon ni.”​—Jonathan.

 Kon posible, ayaw pagtrabaho kon dili tingtrabaho. Ang Bibliya nag-ingon: “Dunay gitakdang panahon alang sa tanang butang.” (Ecclesiastes 3:1) Pangutan-a ang kaugalingon, ‘Nadisturbo ba ang akong panahon sa pamilya kay magsige gihapon kog trabaho gamit ang cellphone bisag naa na ko sa balay? Kon mao, unsay epekto niini sa akong kaminyoon? Unsa may ikaingon sa akong kapikas?’

 “Tungod sa gadyet mahimo nato ang atong trabaho sa bisan unsang oras ug sa tanang panahon. Mao nga kon kauban nako ang akong asawa, kinahanglan kong maningkamot nga dili magsigeg tan-aw sa akong cellphone aron atimanon ang akong trabaho.”​—Matthew.

 Estoryahi ninyong magtiayon ang paggamit ug gadyet. Ang Bibliya nag-ingon: “Ang matag usa padayong magtinguha, dili sa iyang kaugalingong kaayohan, kondili nianang sa laing tawo.” (1 Corinto 10:24) Pakig-estorya sa imong kapikas kon giunsa ninyo paggamit ang gadyet ug kon unsang mga kausaban, kon naa man, ang angayng himoon. Mahimo ninyong gamiton ang giya sa panag-estorya niining artikuloha.

 “Kami sa akong bana prangka sa usag usa, ug mosulti mi kon gibati namo nga sobra na ang among paggamit sa cellphone o tablet. Nahibalo mi nga puwede ning mopatunghag problema, maong konsiderahon namo pag-ayo ang hunahuna sa matag usa.”​—Danielle.

 Ang punto: Seguroa nga ikaw ang agalon, dili ang ulipon, sa imong gadyet.