Daghang bana ug asawa ang miingon nga panagsa na lang silang mag-estoryahay sa ilang kapikas bisag magkauban sila. Unsay mga hinungdan?

•  Magkauban pero nag-iyahay—ngano?

•  Ang imong mahimo

•  Ang giingon sa ubang magtiayon

•  Giya sa panag-estorya

•   Sobrang kakapoy

   “Kon kanus-a nga naa mi panahon nga magkaestoryahay sa akong bana, maatol pod nga usa namo ang gikapoy pag-ayo. Kon kapoyon ko, dali ra kong maglagot bisan sa simpleng mga butang. Maong mas okey pa nga manan-aw na lang mig TV.”—Anna.

•   Social media ug online nga kalingawan

   “Makahurot sa imong panahon ang social media ug online nga mga kalingawan. Basin daghang oras na kang nalingaw niana, ug wala pa nimo maestorya ang imong kapikas. Morag wala ra gihapon mo mag-uban sa usa ka kuwarto.”—Katherine.

•   Lainlain ug hilig

   “Inig-uli sa akong bana gikan sa trabaho, sagad himoon dayon niya ang iyang mga gikahiligan. Kinahanglan pod siyang maglingawlingaw, kay naghago baya siya sa iyang trabaho. Pero unta mas daghan mig panahon para sa usag usa.”—Jane.

•   Trabaho

   “Kay naa man mi mga gadyet, makatrabaho gihapon mi bisag naa sa balay. Kasagaran, magsige kog reply sa mga e-mail ug text bahin sa trabaho imbes nga naa na unta koy panahon para sa akong asawa.”—Mark.

•   Isipa nga kinahanglan gyod kang mogahin ug panahon sa imong kapikas, ug dili kon makalugar lang.

   Prinsipyo sa Bibliya: ‘Seguroa ninyo ang mas importanteng mga butang.’—Filipos 1:10.

   Hunahunaa kini: Makita ba sa imong mga lihok nga mas importante nimo ang inyong kaminyoon kay sa imong trabaho o mga hilig? Salin na lang ba nga oras o atensiyon ang imong ginahatag sa imong kapikas?

   Tip: Ayaw pag-agad sa panahon nga makalugar mo. Pag-eskedyul ug panahon para sa imong kapikas ug seguroa nga walay mga kabaldahan.

   “Malipay gyod ko dihang maghimog plano ang akong bana nga para lang namong duha. Mobati ko nga espesyal ug nga gusto niya nga makauban ko. Tungod ana, mas nahigugma ko niya.”—Anna.

•   Kontrolaha ang imong paggamit ug mga gadyet.

   Prinsipyo sa Bibliya: “Dunay gitakdang panahon alang sa tanang butang.”—Ecclesiastes 3:1.

   Hunahunaa kini: Pirme bang mabalda ang imong atensiyon para sa imong kapikas tungod sa mga text message o alert?

   Tip: Paningkamoti nga magdungan mog kaon bisag kausa lang sa usa ka adlaw—ug ibilin ang inyong mga cellphone sa kuwarto. Ang pagpangaon maoy nindot nga panahon nga maestoryahan ang inyong nahimo sa tibuok adlaw.

•   Kon posible, pag-uban mo sa paghimo sa mga buluhaton.

   Prinsipyo sa Bibliya: “Ang duha mas maayo kay sa usa kay sila makadawat ug mas dakong kaayohan sa ilang paghago.”—Ecclesiastes 4:9, footnote.

   Hunahunaa kini: Pirme ba mong mag-iyahay sa imong kapikas sa pagbuhat sa mga buluhaton, sama sa pagpamalengke?

   Tip: Pagtinabangay mo—bisan sa mga buluhaton nga puwede rang mabuhat sa usa ka tawo.

   “Imbes isipon nga trabaho lang ang pag-grocery, paghugas ug plato, pagpamilo, o pag-garden, isipa ni ingong kahigayonan nga magkauban mo.”—Nina.

•   Magmakataronganon sa imong mga pagdahom

   Prinsipyo sa Bibliya: “Ipakita sa tanan ang inyong pagkamakataronganon.”—Filipos 4:5.

   Hunahunaa kini: Unsay imong himoon aron dili ka magdahom ug labaw pa sa imong kapikas?

   Tip: Pag-estorya mo aron masabtan ninyo kon unsay gikinahanglan sa matag usa. Saboti ninyo kon unsaon paggamit ang inyong panahon nga parehas mong malipay ug makahimo niini.

   “Ang akong bana laski kaayo, pero ako dili kay naa koy problema sa panglawas. Pirme nakong ingnon ang akong bana nga mogawas ug magrelaks, ug magkita ra mi inigbalik niya. Magpahulay lang ko sa balay kay kinahanglan nako ni, samtang siya mag-ehersisyo kay mao pod nay iyang gikinahanglan. Parehas mi nga nalipay kay nahimo namo kon unsay among gikinahanglan.”—Daniela.

 Puwede mong mag-iyahay sa pagtubag sa mosunod nga mga pangutana. Dayon, hisgoti ninyong duha ang inyong mga tubag.

•   Kon bahin sa panahon nga magkauban mo, igo na ba kini o kulang pa?

•   Unsang komendasyon ang imong ikasulti sa imong kapikas bahin sa iyang mga paningkamot nga magkauban mo?

•   Unsay gusto nimong pauswagon sa imong kapikas?

•   Mabahin ba usahay ang imong atensiyon samtang mag-estorya ang imong kapikas tungod sa mga gadyet?

•   Unsaon ninyo pagpakitag pagkamakataronganon sa inyong pagdahom sa usag usa?

•   Unsang mga kausaban ang inyong himoon karong semanaha aron madugangan ang inyong panahon sa usag usa nga walay kabaldahan?