Sa ngadtongadto, ang imong anak makaeksperyensiyag kapakyasan ug madismaya. Unsaon nimo siya pagtabang?

•  Ang angay nimong mahibaloan

•  Ang imong mahimo

 Kitang tanan mapakyas usahay. Ang Bibliya nag-ingon nga “kitang tanan mapandol.” (Santiago 3:2) Ang mga bata mapandol o mapakyas pod. Pero ang mga kapakyasan maghatag ug kahigayonan sa mga bata nga magmalig-on sa pag-atubang sa lisod nga mga kahimtang. Ang mga bata wala matawo nga nakabaton na niini nga katakos, pero puwede ni nilang makat-onan. “Kami sa akong bana nakamatikod nga mas maayog resulta kon ang mga bata makakat-on kon unsaon pag-atubang sa kapakyasan kay sa magpakaaron ingnon nga wala sila mapakyas,” miingon ang inahan nga si Laura. “Makakat-on sila kon unsaon paglahutay dihang ang ilang gidahom wala mahitabo.”

 Daghang bata ang dili kaayo makamao moatubang sa kapakyasan. Ang ubang bata wala makakat-on kon unsaon pag-atubang sa kapakyasan kay ipabati sa ilang mga ginikanan nga wala silay nahimong sayop. Pananglitan, kon ang bata gamayg grado, basolon dayon sa ubang ginikanan ang titser. Kon ang bata nag-away uban sa iyang amigo, basolon dayon sa iyang ginikanan ang iyang amigo.

 Pero sa unsang paagi makakat-on ang mga bata sa pag-angkon sa ilang sayop ug sa pagsulbad niini kon protektahan sila sa ilang mga ginikanan gikan sa dili maayong resulta sa ilang gihimo?

•   Tudloi ang imong anak nga ang iyang mga binuhatan dunay resulta.

   Ang Bibliya nag-ingon: “Kon unsay gipugas sa usa ka tawo, mao pod ang iyang anihon.”—Galacia 6:7.

   Ang tanan natong buhat dunay resulta. Kon duna tay maguba, kinahanglan nig bayad aron maayo. Kon makahimo tag sayop, moresulta nig dili maayo. Kinahanglang mahibaloan sa mga bata ang prinsipyo sa hinungdan ug epekto ug masabtan nga duna silay tulubagon sa kon unsay nahitabo. Busa likayi ang pagbasol sa uban o ang pagkonsentir sa sayop sa imong anak. Hinuon, tugoti nga maeksperyensiyahan niya ang haom nga gibug-aton sa dili maayong mga resulta sa iyang gihimo, samtang imong konsiderahon kon unsay makaya sa mga bata nga sama niyag edad. Siyempre, kinahanglang masabtan sa bata nga ang sayop nga iyang nahimo mao ang nakaingon sa dili maayong mga resulta.

•   Tabangi ang imong anak sa pagpangitag solusyon.

   Prinsipyo sa Bibliya: “Ang tawong matarong mahimong matumba sa makapito, ug siya mobangon pag-usab.”—Proverbio 24:16.

   Ang kapakyasan mahimong sakit dawaton, pero dili kini ang kataposan sa tanan. Tabangi ang imong anak nga magpokus sa pagpangitag solusyon imbes nga magreklamo sa nahitabo. Pananglitan, kon ang imong anak nahagbong sa eksam sa eskuwelahan, tabangi siya nga mouswag pinaagi sa pagtuon ug pagpaningkamot sa sunod higayon. (Proverbio 20:4) Kon ang imong anak nga babaye ug ang iyang amiga naglalis, tabangi siya sa pagpangitag paagi nga mangayog pasaylo, bisag kinsa pay hinungdan sa di pagsinabtanay, aron masulbad ang problema.—Roma 12:18; 2 Timoteo 2:24.

•   Tabangi ang imong anak nga dili magdahom ug sobra.

   Prinsipyo sa Bibliya: “Sultihan ta mo nga dili maghunahuna nga importante kaayo mo.”—Roma 12:3.

   Ang pagsulti sa imong anak nga siya “ang pinakamaayo” sa usa ka butang dili realistiko ug dili makatabang niya. Bisan ang mga bata nga maayo sa eskuwelahan dili kanunayng ma-perfect sa eksam. Ug ang mga bata nga maayo sa usa ka sport dili kanunayng makadaog. Ang mga bata nga dili sobra ug pagdahom sa kaugalingon mas makamao moatubang sa mga kapakyasan ug problema.

   Ang Bibliya nag-ingon nga ang kalisdanan makatabang nato nga mahimong mas lig-on ug maugmad ang pagkamalahutayon. (Santiago 1:2-4) Busa bisag makapadismaya ang mga kapakyasan ug problema, matabangan nimo ang imong anak sa pagbaton ug balanseng panglantaw niini.

   Sama sa pagtudlog usa ka skill, ang pagtudlo sa mga anak kon sa unsang paagi molampos sa pag-atubang sa mga problema nagkinahanglag panahon ug paningkamot. Pero dili kini makawang kay magamit ni nila dihang sila mohamtong na. “Ang mga batan-on nga makamao moatubang sa ilang mga problema mas gamayg purohan nga mohimog butang nga peligroso o binuang dihang sila mabug-atan sa problema,” sumala sa libro nga Letting Go With Love and Confidence. “Mas dakog purohan nga maayo ilang mahimo dihang makaatubang silag bag-o o wala damhang mga panghitabo.” Siyempre, ang mga kaayohan sa pagkahimong lig-on mapahimuslan sa imong anak hangtod sa iyang pagkahamtong.

 Tip: Mahimong maayong panig-ingnan. Hinumdomi nga ang imong paagi sa pag-atubang sa makapadismaya nga mga kahimtang makatabang nga mabansay ang imong anak sa pag-atubang sa iyang mga kapakyasan.